د طالبانو حکومت د حج او اوقافو وزارت تایید کړې چې سږکال د حج په مراسمو کې ۲۰ افغان حاجیان مړه شوي دي.

د دغه وزارت د معلوماتو له مخې، ۱۷ حاجیان د طبیعي ناروغیو له امله او درې نورو د ګڼې ګوڼې په پېښو کې خپل ژوند له لاسه ورکړی دی.

د یاد وزارت سرپرست مولوي نورمحمد ثاقب وايي، د سږني حج لپاره له شاوخوا ۳۰ زره حاجیانو څخه څه باندې ۸ میلیارده افغانۍ راټولې شوې وې، چې نږدې ټولې لګول شوې دي.

هغه زیاتوي، له هر حاجي څخه ۲ لکه او ۸۲ زره افغانۍ اخیستل شوې وې، چې تر ډېره‌یې ۲ لکه او ۷۸ زره مصرف شوي دي.

طالب چارواکي وایي د حج روانه پروسه په بریالۍ توګه ترسره شوې او د تېرو کلونو په پرتله پکې ستونزې کمې وې.

رویټرز راپور ورکړی، چې تېره په غزه کې د اسراییلي هوايي بریدونو او ډزو له امله ۴۰ فلسطینیان وژل شوي، چې لس یې د مرستو د اخیستو پر مهال په نښه شوي دي.

د روغتیايي سرچینو په وینا، پنځه نور کسان د لوږې له امله مړه شوي دي.

ملګرو ملتونو ویلي، له ۲۰۲۵ کال د می میاشتې راهیسې د مرستو پر مهال له ۱۰۰۰ زیات فلسطینیان وژل شوي، چې ډېری یې د اسراییلي ځواکونو د ډزو ښکار شوي دي.

خبریال او د سیاسي چارو شنونکي سمیع یوسفزي د ‏یوې امریکایي سرچینې له قوله ویلي، چې د طالبانو حکومت د بهرنیو چارو وزیر مولوي امیر خان متقې وړاندې په ورته ډول د طالبانو د استخباراتو د مشر ملا عبدالحق وثیق د یو خارجې سفر مخه هم نیول شوی وه.

هغه د سرچینې له قوله په خپل ایکس لیکلي، چې په طالبانو دا د امریکا له لورې د فشار ښکاره هڅه ده.

سمیع یوسفزي لیکلي چې امریکا د طالبانو استخباراتو ته د محمودشاه حبیبې د نیونې او زندان ټول شواهد ورکړي دي.

یوسفزي د سرچینې له قوله زیاته کړې، چې طالبان اوس له ولسمشر ټرمپ سره مخ دي او هغه ته د امریکایي اتباعو خلاص لومړیتوب دی.

د یادونې وړ ده چې د ملګرو ملتونو امنیت شورا روانه اونۍ پاکستان ته د طالبانو د بهرنیو چارو وزیر مولوي امیرخان متقي ته د سفر اجازه ورنه کړه

اسراييل وایي، چې د حماس سره د خبرو تر ناکامېدو وروسته د امنیتي ادارو بېړنۍ غونډه کوي، څو د راتلونکي اقدام په اړه پرېکړه وکړي.

یو لوړپوړي اسراییلي چارواکي خبرداری ورکړی، چې ښایي په غزه کې جګړه نوره هم پراخه شي.

د اسراییلو د بهرنیو چارو وزیر وایي، دوی د جګړې د پای غوښتونکي دي؛ خو دا کار د مناسب شرایطو له رامنځته کېدو سره تړلی دی.

په عین حال کې قطر او مصر د فرانسې او سعودي طرحه منلې، چې له حماس غواړي وسله کېږدي؛ خو حماس دغه غوښتنه رد کړې ده.

د هند د بهرنیو چارو وزارت د امریکا د ولسمشر ډونالډ ټرمپ له هغو څرګندونو وروسته غبرګون وښود، چې له روسیې د تېلو د پېرلو له امله یې پر هند د لوړو تعرفو ګواښ کړی و.

د هند د بهرنیو چارو وزارت ویلي، هغه هېوادونه چې نیوکه کوي، پخپله له روسیې سره پراخه سوداګري لري؛ نو د هند په نښه کول بې‌ځایه او ناعادلانه دي.

هند ټینګار کړی چې د خپلو ملي ګټو او اقتصادي امنیت د خونديتوب لپاره به هر اړین ګام پورته کړي.

د یادونې ده، چې ډونالډ ټرمپ د هند له لوري د روسیې د تېلو پېرلو له کبله پر نوي ډیلي تعرفې لوړې کړې او ویلي یې دي، چې دا کار ورته د منلو نه دی.

په همدې حال کې بیا هند وايي، له خپلو اقتصادي سرچینو به تل ګټه واخلي.

د برازیل سترې محکمې د دغه هېواد پخوانی ولسمشر ژایر بولسونارو د کودتاه د تور له امله ونیوو.

د یاد هېواد قاضي القضات اليګزانډر دي مورایس د بندیزونو د سرغړونې له امله د هغه د نیولو امر ورکړی و.

د بولسونارو وکیلانو دا پرېکړه ناعادلانه بللې.

په ورته مهال بیا د امریکا ولسمشر ډونالډ ټرمپ دا ګام سیاسي غچ بللی او پر برازیل یې د تعرفو د لوړولو ګواښ کړی.

ملګرو ملتونو کې د افغانستان دایمي استازي نصیر احمد فایق د طالبانو حکومت پر کړنو توندې نیوکې کړي دي.

هغه په خپله د اېکس پاڼه کې لیکلي، چې طالبان د ډول، ډول ظلمونو او فساد ښکار دي؛ خو تر اوسه هېڅ لوړپوړی طالب چارواکی نه دی لیدل شوی، چې شریعت پرې عملي شوی وي.

فایق ویلي، د قانون نشتوالی او د هغه نه پلي کېدل هر نظام د سقوط کندې ته بیايي.

هغه زیاته کړې، که څه هم د پخواني جمهوریت پر مهال هم د قانون له سرغړونو نظام زیانمن شو؛ خو لږ تر لږه قانون، قانوني ادارې او خپلواکې رسنۍ موجودې وې چې دغه سرغړونې یې رسوا کولې.

د افغانستان د پخواني حکومت لومړي مرستیال امرالله صالح ویلي، چې د طالبانو حکومت د بهرنیو چارو سرپرست وزیر امیرخان متقي اسلام‌اباد ته سفر ځکه وځنډېد، چې د ملګرو ملتونو د بندیزونو کمېټې د هغه د سفر مخه نیولې ده.

ښاغلي صالح پر اېکس پاڼه لیکلي: «متقي د بندیزونو په نوملړ کې شامل دی. طالبان او پاکستان په افغانستان کې د لسیزو جګړو، وژنو او ویجاړیو مسوول دي. نپوهېږم، چې د ملګرو ملتونو د بندیزونو په کمیټه کې چا د دغه سفر مخه نیولې؛ خو له ډېرې مودې وروسته دغه سازمان یو سم او پرځای اقدام کړی دی.»

ټاکل شوې وه، چې امیرخان متقي د زمري ۱۳مه اسلام‌اباد ته سفر وکړي؛ خو د طالبانو حکومت د بهرنیو چارو وزارت ځینو سرچینو دا ځنډ «تخنیکي ستونزې» بللي دي.

د طالبانو حکومت او پاکستان تر اوسه د متقي د سفر په اړه رسمي څه نه دي ویلي.

د افغان سولې لپاره د امریکا پخوانی ځانګړی استازی زلمی خلیلزاد وایي، کابل ته د مس‌عینک د لرغونو اثارو انتقال خواشینی کړی او د طالبانو حکومت باید په دې اړه له بدیلو لارو کار واخلي.

نوموړي ویلي، چینایان د افغانستان د تاریخ په اړه بې تفآوته دي؛ خو د طالبانو حکومت ته پکار وه، چې په دې اړه یې نورې لارې سنجولې وی.

خلیلزاد زیاتوي، لوګر کې د دغو اثارو پاتې کېدو سره دا ساحه خوندي پاتې کېدله.

د یادونې ده،.چې له مس‌عینک کان څخه ۱۴۳۰ قلمه بېلابېل تاریخي توکي کابل ته را انتقالیږي.

د اوکراين ولسمشر ولادمير زلينسکي نن د ختیځ اوکراين د خارکيف سيمې له جګړه‌ييزې کرښې څخه ليدنه وکړه.

هغه پر خپله ایکس پاڼه کې ليکلي، چې له قوماندانانو سره يې د ووچانسک ښار د دفاع، د جګړې وضعيت او روانو جګړو په اړه خبرې کړې دي.

زلينسکي زياته کړې، چې د دوی سرتېري راپور ورکوي، چې له چين، تاجکستان، ازبکستان، پاکستان او ځينو افريقايي هېوادونو څخه اجرتي جګړه‌ماران د روسيې تر څنګ په جګړه کې برخه اخلي.