د افغانستان کرکټ بورډ د شپږیزې لیګ یوولسم پړاو سیالیو وخت، ځای، لوبډلې او مهالوېش اعلان کړ.
د ټاکلي مهالوېش له مخې به د شپږیزې لیګ سیالۍ د جولای له لومړۍ نېټې تر ۱۴مې نېټې پورې د خوست ولایت په کوربتوب دوام ولري او په لړ کې به یې ټولې ۲۱ لوبې ترسره شي.
یو ځل بیا هم پنځه لوبډلې «د راشد خان په لوبډلمشرۍ سپین غر زمریان، د رحمن الله ګربز په لوبډلمشرۍ مس عینک اتلان، د حشمت الله شهیدي په لوبډلمشرۍ بندامیر ښاماران، د ابراهیم ځدراڼ په لوبډلمشرۍ بست ساتونکي او د عظمت الله عمرزي په لوبډلمشرۍ به آمو نهنګان لوبډلې» په دې سیالیو کې ګډون ولري.
لومړۍ لوبه د دفاعي اتلې آمو نهنګانو او بندامیر ښاماراتو په لوبه پیلیږي او د ټورنمنټ په پای کې به دوه مخکښې لوبډلې د جون په ۱۴مه پایلوبه ترسره کړي.
د یادونې وړ ده چې دا لومړی ځل د شپږیزې لیګ سیالۍ له کابل بهر او په خوست ولایت کې ترسره کیږي.
