د ننګرهار په شېرزادو ولسوالۍ کې د یوې پوستې اشپز پنځو طالبانو ته مرګ ژوبله اړولې.
سیمهییزې سرچینې وایي، پېښه نن د پیټلو سیمه کې رامنځته شوې.
د سرچینو د مالوماتو له مخې، لومړی د دوی ترمنځ لفظي شخړه شوې، چې وروسته اشپز د طالبانو د خوب کوټې ته ورغلی او پر هغوی یې ډزې کړې.
دغه پېښه کې درې طالبان وژل شوي او دوه نور ټپیان دي.
د معلوماتو له مخې، اشپز د طالبانو له لوري نیول شوی.
د چین د لیائونینګ ولایت په شمالي ښار کې نن په یوه رستورانت کې د اورلګیدنې له امله ۲۲ تنه وژل شوي او درې تنه نور ټپیان شوي دي.
د چین دولتي تلویزیون د پېښې پخلی کړی؛ خو د اورلګېدنې د دقیق لامل په اړه یې جزئیات نه دي وړاندې کړي.
د چین ولسمشر شي جینپینګ له سیمهییزو چارواکو غوښتي چې ژر تر ژره د پېښې علت معلوم کړي.
د یادونې ده، چې په چین کې د تېرو کلونو په ترڅ کې د ګازو د نللیکو او د خوندیتوب د اصولو نه رعایت له امله څو ورته پېښې رامنځته شوې دي، چې پکې انساني تلفات هم رامنځته شوي دي.
د طالبانو حکومت د ریاست الوزرا اداري مرستیال عبدالسلام حنفي ویلي، چې سږکال له افغانستان څخه ۳۰ زره افغانان د حج مراسمو لپاره ځي.
نوموړي ویلي، چې د حاجیانو د انتقال تړون له کام ایر او اریانا افغان هوایي شرکتونو سره شوی.
په همدې حال کې د طالبانو د حج او اوقافو وزارت سرپرست مولوي نور محمد ثاقب ویلي، چې نن ۲۳۰ تنه افغان حاجیان مکې مکرمې ته روان شول.
نوي ډهلي اعلان کړی، چې له فرانسې څخه به د ۲۶ جنګي الوتکو تړون لاسلیک کړي.
دا الوتکې د ۴.۷ میلیارده ډالرو ارزښت لري.
هند ویلي، چې دا جنګي الوتکې د خپل سمندري ځواک د پیاوړتیا لپاره پېري.
د هند دفاع وزارت زیاتوي چې دوی ته به دا الوتکې تر ۲۰۳۰ کال پورې ور وسپارل شي.
سعودي عربستان وایي، د حج موسم پر مهال به هغو کسانو ته سختې سزاوې ورکړي، چې د حج ترسره کولو لپاره په غیر قانوني ډول هڅې کوي.
د سعودي عربستان د نویو مقرراتو پر اساس؛ که څوک په غیر قانوني ډول د حج هڅه وکړي؛ نو ۲۰ زره درهمه به جریمه شي.
د یاد هېواد د بهرنیو چارو.وزارت دغه راز ویلي، چې هغه کسان به هم لس زره درهمه جریمه کړي، چې په غیر قانوني ډول حاجیانو ته د ټرانسپورت اوسېدو او نورې اسانتیاوې برابروي.
د افغانستان د ژغورنې لپاره د ملي مقاومت عالي شورا یو پلاوی د محمد محقق په مشرۍ ایران ته تللی، څو د افغان کډوالو د وضعیت په اړه له ایراني چارواکو سره خبرې وکړي.
په پلاوي کې الماس زاهد، خواجه محبوب صدیقي، عبدالله قرلق او حبیبالرحمان سیاف هم شامل دي.
یادې شورا له ایران څخه د افغان کډوالو د اوږدمهاله مېلمستیا مننه کړې او هیله یې ښودلې چې دا سفر به د لا همکاریو او د کډوالو د ملاتړ لپاره ګټور تمام شي.
دا لومړی ځل دی چې ایران د طالبانو د مخالفې دې شورا پلاوی د یو رسمي پلاوی په توګه مني.
د خوست ولایت د تڼیو ولسوالۍ اوسېدونکو د یادې ولسوالۍ په غرنیو سیمو کې د بادامو بڼونه جوړ کړي.
دوی ویلي، چې دا کار یې له یوې خوا د چاپېریال ساتنې او شنو سیمو د پراخولو لپاره ګټور ګڼل کېږي، او له بلې خوا خلکو ته دوامداره عاید او کاري بوختیا برابروي.
د ځایي باغوانانو په وینا، تر اوسه په دې غرنیو سیمو کې له ۲۰ زیات بڼونه جوړ شوي او شاوخوا ۲۰،۰۰۰ بادامو نیالګي پکې کرل شوي دي.
د خوست د طالبانو د کرنې، اوبو لګولو او مالدارۍ رییس شېر محمد ذبیح رسنیو ته ویلي، چې تڼي، نادرشاه کوټ او کربوزه هغه ولسوالۍ دي چې د بادامو د کرلو لپاره ښه اقلیم لري، او که بزګران او اړوندې ادارې ګډ کار وکړي؛ نو خوست به د کرنیز اقتصاد له مخې پراخ پرمختګ وکړي.
د ایران د کورنیو چارو وزیر اسکندر مومني اعلان کړی چې د بندر عباس په رجايي بندر کې شوې چاودنه د خوندیتوب د مقرراتو د نه رعایت او بېپروايۍ له امله رامنځته شوې.
مومني ویلي، چې ددې پېښې په تړاو تورن کسان پېژندل شوي او احضار شوي دي.
دا چاودنه چې د شنبې په ورځ وشوه، تر اوسه یې لږ تر لږه ۷۰ کسان وژلي او شاوخوا ۱۰۰۰ تنه یې ټپیان کړي دي.
د هرمزګان ولایت چارواکو ویلي، اور لا هم بشپړ نه دی مړ شوی، او د اور وژنې هڅې روانې دي.
د ایران ولسمشر او د ستر مشر آیتالله خامنهاي له لورې د پېښې د څېړنې امر شوی، او سیمهییز چارواکي وايي چې څېړنه روانه ده.
د ملګرو ملتونو سرمنشي انتونیو ګوتریش د هند تر ولکې لاندې جمو او کشمیر کې د تېرې اوونۍ د وسله وال برید له امله د هند او پاکستان ترمنځ د زیاتېدونکي کړکېچ په اړه خپله ژوره اندېښنه څرګنده کړې ده.
رویټرز ویلي، چې د ګوتریش مرستیال ویاند فرحان عزیز حق ویلي، چې انتونیو ګوتریش دواړو هېوادونو ته د زیات زغم سپارښتنه کړې او د تاوتریخوالي د زیاتېدو د مخنیوي غوښتنه یې کړې ده.
ښاغلي ګوتریش ټینګار کړی چې تر ټولو سختې شخړې هم د معنا لرونکو او رغوونکو خبرو اترو له لارې په سوله ییز ډول حل کېدلی شي.
هغه زیاته کړې، که دواړه خواوې ومني، ملګري ملتونه چمتو دي چې د کړکېچ د کمولو او د خبرو اترو د بیا پیل لپاره هر ډول سولهییز حل ته لاره هواره کړي.
د بلوچستان د نوشکي ولسوالۍ مرستیال کمېشنر امجد حسین ویلي، چې د تېلو یو ټانکر د ویلډینګ پر مهال اور اخیستی او چاودېدلی دی.
هغه ویلي، چې په دې پېښه کې موټر چلوونکی ځای پر ځای وژل شوی او له ۴۰ زیات کسان، چې پکې پولیس هم شامل دي، سخت ټپیان شوي دي.
پاکستاني چارواکي وايي د اور لګېدو علت معلومولو لپاره پلټنې روانې دي.