د ښځو د آزادۍ غوښتونکو غورځنګ په غور ولایت کې د عابدې په نوم یوې ځوانې نجلۍ د زړه‌بوږنوونکې ځان‌ وژنې پېښه سخته غندلې ده.

دغه غورځنګ وایي، دا پېښه د طالبانو د ظلم، د ښځو ضد چلند او د بشري حقونو د مدافعو ادارو د چوپتیا څرګند ثبوت دی.

د دوی په وینا، عابده د کورني تاوتریخوالي او نارینه‌محورې ټولنې پر وړاندې د ژوند پر ځای مړینه غوره کړه او ځان یې وسوځوو.

یاد غورځنګ د یوه بې‌طرفه، شفاف او خپلواکه تحقیق غوښتنه کړې او له نړیوالو ادارو یې غوښتي چې د افغان مېرمنو ملاتړ وکړي او د طالبانو جنسیتي اپارتاید په رسمیت وپېژني.

وروسته له هغې چې د کشمیر په پېښه کې ۲۶ تنه ووژل شول او د هند او پاکستان ترمنځ اړیکې ترینګلې شوې، امریکا د دواړو هېوادونو ترمنځ د وضعیت ارامولو لپاره ډیپلوماټیک گامونه پورته کړي دي.

د امریکا د بهرنیو چارو وزیر مارکو روبیو ټاکل شوې چې د چهارشنبې په ورځ د پاکستان او هند له بهرنیو چارو وزیرانو سره جلا جلا خبرې وکړي.

د امریکا د بهرنیو چارو وزارت ویاندې ټامي بروس ویلي، دا هڅې د دې لپاره کېږي چې د تاوتریخوالي له زیاتېدو مخنیوی وشي او دواړه هېوادونه د زغم له لارې ستونزې حل کړي.

امریکا د اپرېل ۲۲مې د پهلګام پېښې د پلټنو لپاره پر بې‌طرفه نړیوال تحقیق هم ټینګار کړی، کوم چې پاکستان هم ورته چمتووالی ښودلی.

د هند او پاکستان اړیکې تر دې پېښې وروسته خرابې شوې دي؛ خو واشنګټن وایي چې له دواړو هېوادونو سره تماس لري او د سیمې ثبات ته ژمن دي.

د پاکستان پخوانی لومړی وزیر عمران خان، چې دا مهال په اډیاله زندان کې بندي دی، ویلي چې پاکستان که څه هم له داخلي اختلافونو سره مخ دی؛ خو د هند د لومړي وزیر نریندرا مودي د جنګ‌خوښۍ او یرغل پر وړاندې متحد او یو موټی ملت دی.

نوموړي دا څرګندونې د وکیلانو یوې ډلې ته د خبرو پر مهال کړې او ویلي یې دي چې د مودي خطرناک ارمانونه د سیمې ثبات ته ګواښ دي؛ خو پاکستان به ورته کلک ځواب وایي.

دا څرګندونې له هغه وروسته شوې چې په کشمیر کې د سیلانیانو پر موټر برید وشو او هند یې پړه پر پاکستان واچوله؛ خو اسلام‌آباد دا تورونه رد کړي او د بې‌طرفه تحقیق غوښتنه یې کړې ده.

د پاکستان حکومت ویلي، که هند هر ډول یرغل وکړي، سخت ځواب به ورکړي.

د اسلامي همکاریو سازمان ویلي، چې د طالبانو تر ادارې لاندې د افغان سرې میاشتې ټولنې سره یې یو هوکړه‌لیک لاسلیک کړی، چې له مخې به یې ۳۰ د زړه ناروغ ماشومان درملنه ترلاسه کړي.

دا هوکړه‌لیک د دغه سازمان د کابل د دفتر مشر سعید العیاش او د طالبانو د سرې میاشتې مشر شهاب‌الدین دلاور ترمنځ لاسلیک شوی دی.

یاد سازمان ویلي، چې دغه هوکړه به ماشومانو ته د حیاتي خدماتو عادلانه لاسرسي تضمین کړي.

د یادونې ده، چې افغان سره میاشت له یوې آلماني موسسې سره هم تړون لري چې هر کال شاوخوا ۴۰ ماشومان درملنې ته آلمان ته لېږي.

په سویلي حوزه کې د ملګرو ملتونو له دفتره سرچینو رسنیو ته ویلي، چې د بشري چارو د همغږۍ لپاره د ملګرو ملتونو د سرمنشي مرستیال، ټام فلېچر، پرون کندهار ته سفر کړی دی.

نوموړي په دې سفر کې د بشري مرستو پر روان وضعیت خبرې کړې او ځینې روغتیايي مرکزونه یې هم لیدلي دي.

د ملګرو ملتونو ویاند سټیفان دوجاریک ویلي، فلېچر د کندهار د طالبانو له والي ملا شیرین اخوند سره هم لیدلي دي.

د کندهار طالب چارواکو تر اوسه په دې اړه څه نه‌دي ویلي.

د هند لومړي وزیر نریندرا مودي ویلي، چې هېواد یې د ترهګرۍ پر ضد د سخت غبرګون لپاره پیاوړی هوډ لري.

نوموړي دا څرګندونې د امنیتي کابینې په یوه مهمه غونډه کې کړې، چې پکې د دفاع وزیر، د ملي امنیت سلاکار، د ګډو ځواکونو مشر او د پوځ لوړپوړي افسران برخه‌وال وو.

مودي ټینګار کړی چې وسله‌والو ځواکونو ته بشپړه آزادي ورکړل شوې چې د غبرګون ډول، هدف او وخت خپله وټاکي.

له بلې خوا، د پاکستان د اطلاعاتو وزیر عطاالله تارړ خبرداری ورکړی چې هند ښايي د پهلګام پېښې په پلمه په راتلونکو ساعتونو کې پوځي برید وکړي.

د پاکستان د بهرنیو چارو وزیر اسحاق ډار هم ویلي، چې پاکستان به هر برید ته لوټه په ډبره ځواب ورکړي.

د هند د کلکتې ښار په یوه ګڼ مېشته سیمه کې په یوه هوټل کې اورلګېدنه رامنځته شوې، چې له امله یې ۱۵ تنه وژل شوي دي.

سیمه‌ییز چارواکي وايي، ډېری قربانیانو د خپلو خونو دننه د ساه بندېدو له امله ژوند له لاسه ورکړی، او یو تن هغه مهال مړ شوی چې له شپږ پوړیزې ودانۍ څخه یې ځان غورځولی و.

د اور لګېدنې علت تر اوسه نه دی څرګند شوی، خو چارواکي وايي چې څېړنې پیل شوي دي.

یاد هوټل «ریتوراج» نومېږي او د ښار په یوه له ګڼې ګوڼې ډکې سیمه کې موقعیت لري.

نیپال تر دې وروسته هغو کسانو ته د ایوریسټ څوکې ته د ختلو اجازه ورکوي، چې تر دې وړاندې یې اووه زره متره لوړ ختل کړي وي.

دا اقدام د ایوریسټ څوکې ته د غر ختونکو کسانو د ګڼې ګوڼې مخنیوي لپاره کېږي.

د یادونې ده چې ایوریسټ څوکې ته ختونکي ډېر کله د کم اکسیجن له کبله د مرګ له ګواښ سره مخ وي.

تېر کال هم دغې څوکې ته د ختلو پر تکل اته غر ختونکي مړه شوي وو.

له طالبانو سره پخواني بندي جورج ګلزمن ویلي، چې طالبانو د مسیحیت دین له کبله سخت روحي اوفزیکي شکنجه کړی.

هغه د اسرائیل ټلویزون ۲ سره خبرو کې ویلي، چې طالبانو ورته ویل، که اسلام دین ومنې، نو دوو ورځو کې به ازاد شي.

ګلزمن زیاتوي، د دې لپاره چې هغوی په مسلسل ډول شکنجه کوو؛ نو ځکه یې اسلام دین ونه منه.

نوموړی وایي، د مسلمانانو عقیدو ته درناوی لري؛ خو طالبانو به داسې فکر کوو چې یوازیني ریښتیني مسلمانان دوی دي.

هغه زیاتوي، بیا به هم خپلو سفرونو ته دوام ورکړي؛ خو د افغانستان په څېر خطرناکو ځایونو ته به لاړ نشي.

د یادونې ده چې جورج ګلزمن څه موده وړاندې د طالبانو له بنده خوشې شو.

د طالبانو د اطلاعاتو او فرهنګ وزارت اعلان کړی چې د کابل خصوصي تلویزیون «راه فردا» فعالیتونه د دې شبکې د کارکوونکو د شکایتونو له امله چې معاشونه یې نه دي ورکړل شوي، ځنډول شوي دي.

د وزارت په وینا، د دې تلویزیون خبریالانو او کارکوونکو شکایت کړی چې د څو کلونو معاشونه او امتیازات نه دي ورکړل شوي.

یاد وزارت زیاته کړې، د تلویزیون قضیه محکمې ته استول شوې او د محکمې تر پرېکړې پورې به ددغه تلویزیون فعالیت بند وي.

د یادونې ده چې دغه تلویزیون د محمد محقق په مشرۍ د اسلامي وحدت ګوند مالي ملاتړ درلود.

تر اوسه د تلویزیون له خوا کوم رسمي غبرګون نه دی خپور شوی.