د ایران د خراسان رضوي ولایت والي، غلام‌حسین مظفري، ویلي چې ایران د طالبانو له حکومت سره د قیمتي او معدني ډبرو د استخراج او پروسس په برخه کې د همکارۍ لپاره پراخ پلانونه لري.

مظفري افغانستان د خپلو شتمنو معدني زیرمو له امله د ایران لپاره یو کلیدي او ستراتیژیک تجارتي شریک بللی دی.

د نوموړي په وینا، ایران او طالبان په ګډه د دوغارون ازادې سیمې په چوکاټ کې یوه ځانګړې اقتصادي او معدني سیمه رامنځته کوي، ترڅو د دواړو هېوادونو ترمنځ اقتصادي همکاري لا پراخه شي.

د خراسان والي زیاته کړې چې تیر کال د ایران صادرات افغانستان ته له ۲.۲ میلیاردو ډالرو څخه اوښتي، چې دا د دواړو هېوادونو د ژورو اقتصادي اړیکو څرګندونه کوي.

رویټرز ویلي، چې د ډونالډ ټرمپ له لوري د سعودي عربستان په سفر کې پر سوریه د لګېدلو بندیزونو ناڅاپي لغوه کېدو د سیمې تر څنګ د امریکا دننه لوړپوړي چارواکي هم حیران کړي دي.

د رویټرز د راپور له مخې، د امریکا د بهرنیو چارو او خزانې وزارتونو چارواکي له مخکې خبر نه وو، او له اعلان وروسته یې سمدستي هڅې پیل کړې څو د اوږدمهاله بندیزونو د لغوه کولو څرنګوالی وڅېړي.

امریکایي چارواکو ویلي، سپینې ماڼۍ نه کوم رسمي سند ورکړی و، نه کوم خبرداری.

کارپوهان وایي، دا ډول بندیزونه یوازې په شفاهي اعلان نه لرې کېږي، بلکې قانوني او اداري مراحلو ته اړتیا لري.

د پښتون ژغورنې غورځنګ مخکښ غړی حنیف پښتین وایي، منظور پښتین او د هغه کورنۍ د پاکستاني استخباراتو له سخت او پرلپسې تعقیب لاندې ده.

حنیف پښتین په خپله ایکس پاڼه لیکلي چې پاکستاني ریاست نن د منظور پښتین ورور چې غازي امان الله نومېږي نېولی دی.

حنیف پښتین زیاته کړې چې پاکستاني ریاست د منظور پښتین شا نیولې او غواړي یو څه وکړي چې دا چاره یو څه خطرناکه ښکاري.

هغه دغه راز ویلي، چې یواځې پښتین نه، بلکې د هغه د کورنۍ هر ناروغ چې روغتون ته هم ځي درول کېږي او ګواښل کېږي.

نوموړي ویلي، چې له موږ اکثریت ملګري د منظور پښتین د ګوشه نشینۍ پوښتنې کوي؛ خو اصلیت کې د هغه ژوند د سختو خطرونو سره مواجع دی.

د پاکستان پوځ د عامه اړیکو دفتر ویلي، چې د هند د وسله‌والو ځواکونو له لوري د ۲۰۲۵ کال د مې د شپږمې او اوومې نېټې په شپه؛ ترسره شوي برید کې بې‌ګناه ولسي وګړي او د پاکستان د پوځ سرتیري وژل شوي دي.

له یاد دفتره خپره شوې خبر پاڼه کې راغلي، چې په دغه برید کې ښځې، ماشومان او مشران هدف ګرځېدلي، او د پاکستان پوځ دوه نور ټپي شوي سرتېري نن مړه شوي دي، چې ورسره د وژل شویو شمېر ۱۳ ته پورته شوی دی.

د پوځ د معلوماتو له مخې، ۷۸ نور سرتېري د دندې پر مهال ټپیان شوي دي.

تازه مړه شوي سرتېرو څخه یو یې د پوځ او بل یې د هوایي ځواک اړوند وو.

د افغانستان لپاره د امریکا پخواني ځانګړي استازي زلمي خلیلزاد په یوه تازه ټویټ کې ویلي، چې نن د سوریې لپاره یو ښه او مهمه ورځ ده.

هغه زیاتوي، د سوریې حکومت، سیاسي مشران او ولس باید دا فرصت له لاسه ور نه کړي.

خلیلزاد د سوریایانو لپاره د بریا دعا کړې او ویلي یې دي، «خدای دې سوریایان وساتي».

نوموړی دا څرګندونې داسې مهال کوي، چې ټرمپ پر سوریې لګېدلي بندیزونه لرې کړل.

د ملي ټلویزیون پخوانی مشر اسماعیل میاخېل وایي، څلور کاله وروسته هم د طالبانو له واکمنۍ سره د مبارزې لپاره منسجم او د باور وړ بدیل نه‌دی رامنځته شوی.

نوموړي نیوکه کړې چې یو شمېر سیاستوال او مدني فعالان یوازې په ځان‌محورۍ، د یو بل په تخریب، او بې‌ځایه سیالیو بوخت دي.

هغه ویلي طالب له همدې حالت څخه د ځان په ګټه کار اخیستی.

میاخېل ټینګار کوي چې بدلون تشو شعارونو نه، بلکې ملي فکر، ګډ مسئولیت، او دوامدار عمل ته اړتیا لري.

د حزب اسلامي مشر ګلبدین حکمتیار د هند او پاکستان ترمنځ وروستۍ نښته کې د ځینو افغانانو خوښۍ د تاسف وړ بللې او ویلي یې دي، چې دا پایله به سرچپه راوخيژي.

حکمتیار خبرداری ورکړی چې که جګړه دوام ومومي، لمبې به یې تر افغانستان هم ورسېږي.

هغه ویلي، ځیني هغه کسان او رسنۍ چې د دې جګړې ملاتړ کوي، پخوا هم د شوروي او امریکا یرغلونو ته خوشحال وو.

دا شخړه د امریکا د ولسمشر ډونالډ ټرمپ تر منځګړیتوب وروسته پای ته ورسېده.

پاکستان ویلي چې په دې جګړه کې یې ۱۱ سرتېري وژل شوي او ګڼ نور ټپیان دي.

د طالبانو حکومت د رییس الوزرا اقتصادي مرستیال ملا عبدالغني برادر په مشرۍ پلاوی کازان ته ورسېد.

طالب سرچینو لیکلي، چې د هغه هرکلي ته د تاتارستان د لومړي وزیر مرستیال ورغلی و.

ټاکل شوې چې ملا برادر به د کازان ۱۶فورم اقتصادي ناسته کې ګډون وکړي.

یوه لوړپوړي اسرائیلي چارواکي ویلي چې د اسرائیلو لومړی وزیر بنیامین نتانیاهو لا هم د امریکا د ولسمشر ډونالد ټرمپ له هغې طرحې ملاتړ کوي چې له مخې یې غزه د منځني ختیځ یو پرمختللی او مطلوب ځای وګرځي.

د اسرائیلو پخواني وزیر او د نیویارک سرقونسل، اوفیر آکونیس، نیوزویک ته ویلي، چې غزه د طبیعي شتمنیو، اوږده ساحل، پراخ سمندر او ښه اقلیم له امله د پرمختګ پراخ ظرفیت لري.

نوموړي زیاته کړې: «زه د دې طرحې ملاتړ کوم. زما ماډل متحده عربي امارات دي. په غزه کې د اوبو تصفیې، کرنې، د اوبو ټکنالوژۍ او خوراکي صنعتونو کې پانګونه کولای شي دا سیمه یوه پرمختللې اقتصادي حوزه وګرځوي.»

د سپینې ماڼۍ ویاندې کارولین لویت ویلي، چې د سوریې د موقت حکومت مشر احمد الشرع د امریکا له ولسمشر ډونالډ ټرمپ سره د لیدنې پر مهال له امریکايي شرکتونو غوښتنه کړې چې د سوریې د نفتو او ګازو په برخه کې پانګونه وکړي.

لویت زیاته کړې، چې دغه غوښتنه د سوریې د اقتصادي بیا رغونې لپاره شوې ده.

هغې دا هم ویلي، چې ټرمپ له الشرع څخه غوښتي چې د اسرائیل سره د اړیکو د عادي کولو ابراهیم تړون لاسلیک کړي او همداراز فلسطیني وسله‌وال له سوریې وباسي.