اسرائیل یو وار بیا د ایران پر بېلابېلو سیمو بریدونه پیل کړي.

دمګړۍ پر اصفحان، عباس بندر او یو شمېر نورو سیمو د اسرائیل بریدونه جریان لري.

ایران تر اوسه کوم غبرکون نه دی ښودلی.

د کریملین د بهرني سیاست لوړپوړي سلاکار یوري اوشاکوف اعلان کړی، چې ولادیمیر پوتین او ډونالډ ټرمپ د شنبې په ورځ د ایران او اسرائیلو ترمنځ د وروستیو نښتو په اړه ۵۰ دقیقې خبرې کړي دي.

اوشاکوف دغه تماس “مانا لرونکی او ګټور” بللی او زیاته کړې یې ده، چې پوتین په خبرو کې د ایران پر ضد د اسرائیلو پوځي عملیات غندلي دي.

د اوشاکوف په وینا، ټرمپ هم د منځني ختیځ اوسنی وضعیت د اندېښنې وړ بللی او پوتین ته یې ویلي، چې امریکایي مذاکراتو کوونکي د ایران له استازو سره د خبرو بیا پیل ته چمتو دي.

د اسرائیلو لومړي وزیر بنیامین نتانیاهو ویلي، چې هېواد یې تهران ته د پوځي اقدام لاره پرانیستې او ډېر ژر به د اسرائیلو الوتکې د تهران پر فضا وویني.

نتانیاهو زیاته کړې، چې اسرائیل د ایران د توغندیو پروګرام او احتمالي اټومي وسلو د جوړولو پر وړاندې د دغه هېواد پوځي ظرفیتونه په نښه کړي دي.

هغه ویلي: «موږ نشو کولای د هغوی د زرګونو توغندیو تولید وزغمو؛ نو ځکه مو د تولیدي ظرفیت د له‌منځه وړلو پرېکړه کړې.»

د کونړ طالب چارواکو ویلي چې د دغه ولایت د دانګام ولسوالۍ په سرحدي سیمه کې د طالب او پاکستاني ځواکونو ترمنځ نښته شوې.

دوی ویلي، چې د دغې نښتې په نتیجه کې یو سرحدي طالب سرتېری ټپي شوی دی.

تر پېښې وروسته په سیمه کې تاوتریخوالی لا هم دوام لري.

د سعودي عربستان ولیعهد محمد بن سلمان د حج او عمرې وزارت چارواکو ته امر کړی، چې د ایراني حاجیانو ټولو ستونزو ته رسېدنه وکړي.

نوموړي ویلي، تر هغې باید د حاجیانو لپاره ټول خدمات برابر شي؛ ترڅو دوی بېرته خپل وطن ته ستنیږي.

تېره ورځ پر ایران د اسرائیل تر برید وروسته؛ ایران د حجاجو راتګ هم د نامعلوم وخت لپاره وځنډوو.

د اسرائیلو پوځ وايي چې د تېرو ۲۴ ساعتونو په ترڅ کې ۷۰ جنګي الوتکو د تهران په مختلفو سیمو کې ۴۰ هدفونه بمبار کړي دي.

د پوځ په وینا، په دغو بریدونو کې لسګونه د توغندیو توغولو ځایونه هم له منځه وړل شوي دي.

د یادونې ده چې د اسراییلو د بریدونو له کبله په ایران کې له تېرې ورځې راهیسې ګڼو خلکو ته مرګ ژوبله اوښتې ده.

د هند چارواکو ویلي چې د ایر انډیا یوه بوئینګ ۷۸۷ الوتکه چې د احمدآباد ښار ته نږدې سقوط شوې وه د مړو شوو کسانو شمېر یې ۲۷۰ تنو ته رسېدلی دی.

دغه الوتکه چې برېتانیا ته روانه وه، له پرواز وروسته له یوې ودانۍ سره ټکر شوې او چاودنه یې کړې ده.

د هند د هوایي چلند وزیر ویلي، ټولې بوئینګ ۷۸۷ الوتکې تر څېړنې لاندې دي، او ایر انډیا ته د لا زیاتې تخنیکي ارزونې امر شوی دی.

د اسرائیل د بریدونو په غبرګون کې د ایران د بهرنیو چارو وزارت په تهران کې د سویس سفیره او د امریکا د ګټو د دفتر مسووله نادین لوزانو احضار کړې.

ایران ویلي، چې متحده ایالات باید د دغو بریدونو مسؤولیت پر غاړه واخلي او ځواب‌ویونکي واوسي.

د ایران د بهرنیو چارو وزارت د امریکا څانګې عمومي رییس عیسی کاملي مېرمن لوزانو ته ویلي، چې نه شي تصور کېدلی چې د اسراییلو دا یرغلګر بریدونه پر ایران د امریکا له همغږۍ یا شنه څراغ پرته ترسره شوي وي.

تر دې وړاندې امریکا ویلي، چې له بریدونو وړاندې خبر وو؛ خو هیڅ وخت په کې مستقیم ښکېل نه دي.

د اسرائیلو پوځ اعلان کړی چې په وروستیو بریدونو کې یې په ایران کې د اتومي پروګرام ۹ فعال متخصصین وژلي.

په یادو کسانو کې فریدون عباسي، محمد مهدي تهرانچي، امیر حسن فکري، منصور عسکري، عبدالحمید منوچهر، علي بکایي او سعید برجي شامل دي.

د اسراییل پوځ وایي، ټول وژل شوي متخصصین او کارپوهان د ایران د اتومي پروژې کلیدي څېرې وې چې مهمه پوهه او د وسلو د پراختیا په برخه کې د لسیزو تجربه یې لرله.

د یاد پوځ په وینا، دغه کسانو د ایران د اتومي وسلو د پراختیا په لاره کې مهم رول لوباوه.

د ایران سپاه پاسداران په سیمه کې امریکایي اډې ګواښلي.

دغه ځواک پورې تړلې رسنۍ ویلي، چې سپاه پاسداران وایي، راتلونکي کې به جګړه نوره هم پراخه شي.

دوی ګواښ کړی، چې سیمه کې به د اسرائیلو د مرسته کوونکو نظامي اهداف له منځه یوسي.

خو تر دې وړاندې، د امریکا د متحده ایالاتو دایمي استازولۍ په ملګرو ملتونو کې، د دې سازمان د امنیت شورا په یوه تازه بېړني غونډه کې، له داسې بریدونو څخه د سختو پایلو خبرداری ورکړی او ویلي یې دي چې د امریکا پر پوځي اډو او کارکوونکو بریدونه به «سختې پایلې» ولري.

بل لوري ته، د اسراییلو پوځ په یو بیان کې چې د ټیلیګرام له لارې خپور شوی، ویلي چې پر ایراني هدفونو بریدونه به دوام ولري.

په دغه بیان کې راغلي: «د اسراییلو هوایي ځواک لا هم د هغو هدفونو په نښه کولو ته دوام ورکوي چې د ګواښونو د له منځه وړلو لپاره اړین ګڼل کېږي.»