د طالبانو حکومت ویاند ذبیح‌الله مجاهد په یوه تازه ټویټ کې د امریکا د استازو جرګې له‌خوا هغه شوې ادعاوې په کلکه رد کړې، چې ګواکې په افغانستان کې بهرنۍ وسله‌والې ډلې شتون لري یا له هغه ځايه نورو ته ګواښ متوجه دی.

مجاهد لیکلي چې افغانستان یو «واحد او قوي حکومت» لري، چې پر ټول هېواد بشپړ واک او کنټرول لري او هیچاته اجازه نه ورکوي چې د افغانستان له خاورې د بل هېواد پر ضد کار واخیستل شي.

دا څرګندونې داسې مهال کېږي چې د امریکا کانګرس ځینو غړو تازه ادعا کړې وه چې ګواکې افغانستان کې لا هم د ترهګرو ډلو فعالیت شته.

د اسراییل د پوځ ویاند دانیال هاګاري ویلي، چې ایران سره “۱۲ ورځنۍ جګړه” کې یې بشپړه هوایي برتري ترلاسه کړې وه.

د هاګاري په وینا، اسراییلي ځواکونو په دې عملیاتو کې له ۳۵ زیات توغندیز مرکزونه او ۲۰۰ د توغندیو توغولو مېدانونه بمبار کړي.

خبرپاڼه کې راغلي، چې تر ۸۰ ډېر د هوايي دفاع سیستمونه، ۱۵ الوتکې او ۶ پوځي هوايي ډګرونو باندې بریدونه تر سره کړي.

د معلوماتو له مخې، سلګونه تنه نظاميانو په شمول ۳۰ لوړپوړي قومندانان، په نښه او له منځه وړل شوي.

د جرمني په جنوبي ښار وانګن کې یو ۲۷ کلن افغان کډوال هغه مهال ووژل شو، چې د راپورونو له مخې، هڅه یې کوله پر پولیسو د چړې برید وکړي.

نړۍوالو رسنیو د جرمني د پولیسو په حواله ویلي، چې دا پېښه هغه مهال رامنځته شوه، کله چې دوه پولیس افسران دغه افغان د یو شمېر تورونو له امله زندان ته لېږدول.

پولیسو ویلي، چې د برید پر مهال یو افسر سخت ټپي شوی دی او دا مهال تر درملنې لاندې دی.

د پېښې نور جزئیات تر دې دمه نه‌دي خپاره شوي، خو پلټنې روانې دي.

د افغانستان لپاره د ازبکستان ځانګړي استازي، عصمت الله ارګاشیف په تاشکند کې د سویس له سفیر کنستانتین اوبولنسکي سره لیدنه کړې ده.

د ازبکستان د بهرنیو چارو وزارت په یوه خپره شوې خبرپاڼه کې ویلي، چې دواړو لوریو د افغانستان په تړاو د همکاریو پر امکاناتو او د منځنۍ آسیا د اوبو د سرچینو د مدیریت پر موضوعاتو مفصلې خبرې کړې دي.

دا لیدنه په داسې حال کې ترسره شوې چې سیمه ییز هېوادونه د افغانستان د وضعیت، بشري مرستو او امنیتي مسائیلو په اړه وخت ناوخت اندېښنې شریکوي.

په ننګرهار کې د طالبانو تر واک لاندې د عامې روغتیا ریاست ډاکټرانو یو ژوندی ټپي ځوان چې د مړي ګمان يې پری کړی د بې پروایې له امله یوه شپه د مړو په یخچال کې ساتلی، او په سبا یې ژوندی جسد د هغه کورنۍ ته سپارلی دی.

د ایاز کورنۍ چې کله جسد کور ته راوړي د هغه زړه او بدن ولړزیږي، او کورنۍ یې بیا ژوندی جسد عامې روغتیا ریاست ته انتقالوي، چې دا ځل ایاز د ډاکترانو د بې پروایي له امله ساه ورکوي.

ځوان ایاز د لفظي شخړې وروسته په چاقوانو ټپي شوی و.

دهغه کورنۍ وایي:«کله مو چې جسد کور ته راوړ، سترګې او د بدن غړي یې په حرکت راغلل؛ له ژغورنې وروسته چې بېرته روغتون ته وړل شوی، د ډاکټرانو د نه‌پاملرنې له امله یې په روغتون کې ساه ورکړه.»

کورنۍ یې او د ټولنیزو رسنیو فعالان دا پېښه د ډاکترانو بې‌پروايي بولي.

د ایران سپاه پاسداران (IRGC) ویلي، چې دوی وروستی سخت توغندیز برید کړی چې د اسراییلو سره د اوربند سبب شو.

دوی دا برید دومره شدید بللی، چې په خبره یې، د دښمن د اوربند چیغې یې راووتلې.

سپاه زیاته کړې، چې د امریکا پوځ ونشو کولی وضعیت ته بدلون ورکړي او په قطر کې د العُدید اډې باندې د ایران غچ اخیستونکی برید یې د ایران ځواک ښودنه بللې.

په اعلامیه کې ویل شوي، چې دوی به په آرام پاتې نشي او ژمنه یې کړې چې له سیمې د امریکا اېستل به تل تعقیبوي.

د طالبانو حکومت د بهرنیو چارو وزارت وایي، په مسکو کې افغان سفارت د یوه دوه کلن افغان ماشوم د وهلو پېښه څېړلې.

یاد وزارت ویلي، چې ماشوم اوس ښه روغتیایي وضعیت لري او وزارت به یې په ټول توان درملنه او قضیې تعقیب کړي.

یاد ماشوم د مسکو په هوایي ډګر کې د یو بلاروسي سړي له لوري بې له کوم دلیله پر ځمکه ویشتل شوی و.

د تهران والي محمد صادق معتمدیان ویلي، چې په دې وروستیو ورځو کې دغه ښار کې د بهرنیو وګړو نیول او اېستل څلور برابره زیات شوي دي.

هغه ویلي، چې د “ناقانونه بهرنیانو” پر وړاندې به عملیات دوام لري.

نوموړی وایي، تهران کې په ناقانونه توګه مېشتېدل په هیڅ ډول د منلو نه دي.

معتمدیان زیاتوي، د پلازمېنې امنیت یې سره کرښه ده او د ناقانونه بهرنیانو د ورتګ او اوسېدو په برخه کې به هیڅ ډول زغم ونه لري.

د روسیې د دفاع وزیر، آندری بلوسوف، ویلي چې له منځني ختیځه ترهګریزې ایډیولوژۍ پراخېږي او وسله‌وال کسان لا هم افغانستان ته انتقالېږي.

نوموړي ټینګار کړی چې په افغانستان کې دوامداره بې‌ثباتي د شانګهای سازمان د غړو هېوادونو لپاره د ترهګرۍ او سرحدي جرمونو یوه لویه سرچینه ده.

هغه د شانګهای همکاریو سازمان له غړو وغوښتل، چې له افغانستان، سوریې او اوکراین څخه د پېښو خطرونو پر وړاندې خپلې ګډې هڅې پراخې کړي.

‏د ايران مذهبي مشر، علي خامنه‌اي، د اسرائيل پر وړاندې د روانې جګړې له پیله په خپل درېيم ویډیويي پيغام کې ویلې، که امریکا پوځي مداخله نه وای کړې د اسرائیل حالت به تردې ډیر خراب وای.

خامنه‌ای ویلي، زموږ پرلپسې ځوابي بریدونو امریکا وویروله، او مداخله یې وکړه ترڅو اسرائیل د ایران له توغندیز بریدونو څخه خلاص کړي.

نوموړي وويل: «سره له دومره شور او ادعا، اسرائيل د ایران د اسلامي جمهوريت تر بریدونو لاندې وپرځېد او مات شو.»

په ورته وخت کې، هغه د ټولنیزې شبکې “ایکس” له لارې د «اسرائيل پر وړاندې د بريا» پیغام هم خپور کړی او خپلو پلویان ته یې د دې بریا له امله مبارکي ورکړه.