راپورونه وايي چې تر اوږدو خبرو اترو وروسته، د طالبانو حکومت توانېدلی د چې سياياې هغه دریځ بدل کړي چې د ګوانتانامو وروستی افغان بندي، محمد رحیم الافغاني، به هېڅکله نه ازادیږي.
د درې امریکايي بنديانو د تبادلې په بدل کې ټاکل شوې چې رحیم الافغاني په راتلونکې میاشت کې قطر ته ولېږدول شي.
هغه په ۲۰۰۳ کال کې په لاهور کې ونیول شو.
د پاکستان د کورنیو چارو د دولت وزیر طلال چودري ویلي، حکومت یې د ترهګرۍ پر وړاندې پرېکنده دریځ لري او که د ډیورنډ کرښې د امنیت په اړه له طالبانو سره خبرې بېنتیجې پاتې شي، اسلاماباد به له هغوی سره د ټوپک په ژبه خبرې وکړي.
هغه ترهګري د پاکستان ستره ننګونه بللې او ادعا یې کړې چې د دغه هېواد په بریدونو کې ډېری بریدګر افغانان دي.
چودري ټینګار کړی چې د ډیورنډ کرښې د خوندي کولو لپاره به کلک امنیتي تدابیر ونیول شي او پوځي عملیات به د کورني امنیت او پانګونې د خوندیتوب لپاره دوام وکړي.
په داسې حال کې چې تېره شپه یو بل امریکایي وګړی د طالبانو حکومت له بنده خوشې شو؛ خو د سيانان د راپور له مخې، لږ تر لږه درې نور امریکايي وګړي لا هم د طالبانو په زندانونو کې دي.
ويل شوي چې يو بل امريکايي بندی وګړی، پل اووربي، ښايي مړ شوی وي.
راپور زياتوي چې د امير اميري ازادېدل د طالبانو له مستقيم امتياز پرته ترسره شوي او هيله شته چې دا د نورو بنديانو د خوشې کېدو پيل وي.
د طالبانو حکومت د بهرنیو چارو وزارت د درېیم سیاسي ډیسک رییس ذاکر جلالي ویلي، د افغانستان او امریکا ترمنځ په لوړه کچه ناستې او د بنديانو خوشې کېدل کولی شي هغه زمینه برابره کړي چې د متقابل درناوي او ګډو ګټو پر بنسټ، په نورو برخو کې د اړیکو د پراختیا لپاره لاره پرانیزي.
هغه په خپله ایکسپاڼه لیکلي، مهمه دا ده چې دواړه لوري دې درک ته رسېدلي او په دې هڅه کې دي چې د بنديانو موضوع په مناسب ډول حل کړي او پر نورو موضوعاتو خبرې دوام ومومي.
جلالي ټینګار کړی چې د لورو د واقعیتونو او حساسیتونو درک کولای شي د تعامل راتلونکو پړاوونو سره مرسته وکړي.
په سویس کې د افغانستان سفیر نصیر احمد اندېشه د افغانستان او پاکستان ترمنځ د تېرو پنځوسو کلونو اړیکې ترینګلي بللي او ویلي یې دي چې دغه ژور کړکېچونه د فقر، نیابتي جګړو او افراطیت د پراخېدو لامل شوي، چې ناوړه پایلې یې نه یوازې پر سیمه، بلکې له سیمې بهر هم اغېز کړی دی.
اندېشه ټینګار کړی چې دواړه هېوادونه باید د یو بل پر وړاندې د درناوي پر بنسټ یو نوی فصل پیل کړي، څو د روښانه راتلونکي لپاره لاره هواره شي.
دی خبرداری ورکوي که د پاکستان او افغانستان چلند بدل نه شي، د طالبانو واکمني به دوام ومومي او سیمه به د نړیوال تروریزم، تاوتریخوالي او پراخو کډوالیو مرکز شي.
د اکسیوس خبري اژانس خبریال، باراک راوید د یوه لوړپوړي امریکایي چارواکي په حواله راپور ورکړی چې د سټیو ویتکاف او جرد کوشنر له خبرو وروسته، د امریکا او اسراییلو چارواکي د غزې جګړې د پای ته رسولو پر پلان د هوکړې نږدې کېدو ته رسېدلي دي.
د سپینې ماڼۍ دغه چارواکي ویلي، د هر ډول وروستۍ هوکړې لپاره د حماس رضايت هم اړین دی، خو تر اوسه د دغې ډلې رسمي موافقه نه ده ترلاسه شوې.
ټرمپ وړاندې هیله څرګنده کړې وه چې د غزې د سولې پلان به د دوشنبې په ناسته کې د اسراییل له لومړي وزیر بنیامین نتنیاهو سره سره وروستی کړي.
د امریکا دفاع وزارت د اوریګن په ایالت کې د ملي ګارډ ۲۰۰ سرتېري ګومارلي دي.
دا اقدام وروسته له هغې وشو چې د امریکا ولسمشر ډونالډ ټرمپ د دغو ځواکونو د لېږلو اعلان وکړ.
ټرمپ ویلي، دغه ځواکونه به د کډوالو د فدرالي ادارې د تاسیساتو د امنیت د ټینګښت لپاره کار کوي او په اړتیا کې یې د لا ډېرو سرتېرو د کارولو امکان هم شته.
د راپورونو له مخې، ولسمشر ټرمپ دا پرېکړه د پورټلنډ ښار د تاوتریخوالي د زیاتېدو په غبرګون کې کړې ده، خو د اوریګن ځايي چارواکو د ده اقدام کلکه نیوکه کړې او هغه یې د فدرالي مداخلې ناسم مثال بللی دی.
د افغانستان لپاره د امریکا پخواني ځانګړي استازي زلمي خلیلزاد د طالبانو حکومت له لوري د امریکايي وګړي امیر امیري خوشې کېدل “مثبت پرمختګ” بللی دی.
امیر امیري د یکشنبې په ورځ د طالبانو حکومت د بهرنیو چارو وزارت د سرپرست او د امریکا د ولسمشر ځانګړي استازي اډم بولر تر کتنې وروسته ازاد شو.
خلیلزاد په ټولنیزه شبکه اېکس کې لیکلي چې امیري په ناحقه نیول شوی و او د هغه خوشې کېدل کولی شي د واشنګټن او کابل ترمنځ د باور فضا ته لاره هواره کړي.
هغه ټینګار کړی چې باید ډاډ ترلاسه شي طالبان په راتلونکي کې د امریکایانو د برمته کولو دا کار تکرار نه کړي.
د یادونې ده چې د افغان الاصله امریکايي محمود شاه حبیبي او درې نورو امریکایانو برخلیک لاهم روښانه نه دی.
په اسیا جام کرکټ پایلوبه کې هندوستان یو ځل بیا پاکستان ته د پنځو وېکټو په توپیر ماتې ورکړه او د جام اتلولي یې په خپل نوم کړه.
د هند لوبډلې له دې وړاندې هم په همدې سیالیو کې د ګروپ او سوپر۴ پړاوونو کې دوه ځله پاکستان مات کړی و او په درېیمه لوبه کې یې د جام اتلولي هم ترې وګټله.
د طالبانو حکومت د بهرنیو چارو وزیر مولوي امیر خان متقي د بندیانو په چارو کې د امریکا د ولسمشر ځانګړي استازي اډم بولر په مشرۍ له یو امریکایي پلاوي سره کتلي.
د طالبانو حکومت مرستیال ویاند حمدالله فطرت په خپله ایکسپاڼه لیکلي، چې په دې ناسته کې مولوي متقي ویلي، چې «اسلامي امارت» د امیر امیري په نامه امریکايي تبعه، نن له بند څخه آزاد کړ.
متقي زیاته کړې چې «اسلامي امارت» د اتباعو مسایل له سیاسي لیدلوري نه څېړي او باور لري چې د ډیپلوماسۍ له لارې د ستونزو د حل لارې موندل کېدای شي.
نوموړي ټینګار کړی چې د امریکايي تبعه خوشې کول د دواړو لوریو ترمنځ د مثبت پرمختګ یوه نښه ده.
هغه د قطر د دولت له مؤثر رول څخه هم مننه کړې ده.
د امریکا استازي د طالبانو حکومت له خوا د امیر امیري د خوشې کولو هرکلی کړی او دا یې یو ښه ګام بللی دی.
اډم بولر د دواړو لوریو ترمنځ د خبرو پخوانی پړاو رغنده یاد کړی او هیله یې څرګنده کړې چې په پاتې موضوعاتو به هم خبرې دوام ومومي.