د اسراییلو لومړي وزیر بنیامین نتانیاهو خبرداری ورکړی چې د ایران له لوري پر اسراییلو د هر ډول زیان رسولو هڅه به له سخت او قاطع ځواب سره مخ شي.

نتانیاهو ویلي، پر اسراییلو احتمالي برید به لویه تېروتنه وي او زیاته کړې یې ده چې هماغه یو ځل هم ډېر دی.

هغه ټینګار کړی چې اسراییل به د خپل امنیت پر وړاندې هېڅ ډول ګواښ ونه زغمي.

د اسراییلو لومړي وزیر همدارنګه ویلي چې د هر ډول ګواښ پر وړاندې، چې د ده په وینا د «اختاپوس له سر» څخه راولاړېږي، اسراییلي ځواکونه په بشپړ چمتووالي کې دي او د هرې سناریو مقابلې ته تیار دي.

د لبنان د حزب‌الله عمومي منشي نعیم قاسم د امریکا د ولسمشر ډونالډ ټرمپ وروستیو څرګندونو ته په توند غبرګون کې ویلي: “د ایران د رهبر امام سید علي خامنه‌اي ګواښل یوازې د یوه شخصیت پر وړاندې دریځ نه دی، بلکې د هغو لسګونو میلیونو کسانو سپکاوی او ګواښ دی چې له هغه پیروي کوي”.

نوموړي زیاته کړې، چې د دغسې ګواښونو پر وړاندې چوپ پاتې کېدل د منلو وړ نه دي، او ټینګار یې کړی چې ټول اړین ګامونه او چمتووالی به ونیول شي، تر څو د دې ډول فشارونو او ګواښونو پر وړاندې ځواب ورکړل شي.

هغه خبرداری ورکړی چې پر علي خامنه‌اي برید به ټولې سیمې ته په ډېر نه جبرانیدونکي قیمت تمام شي.

متحده عربي اماراتو په تازه اعلامیه کې ویلي، چې د ایران پر وړاندې به هېڅ ډول پوځي عملیاتو لپاره خپله هوايي فضا، خاوره او سمندري حوزې و نه کاروي او په دې اړه به هېڅ لوجیستیکي ملاتړ هم نه برابروي.

د اماراتو د بهرنیو چارو وزارت په تازه اعلامیه کې واضحه کړې، چې هېواد به یې د سیمه‌ییزو کړکېچونو د حل یوازینۍ لار په خبرو اترو، د تاوتریخوالي کمولو، د هېوادونو حاکمیت ته پر درناوي او د نړیوالو قوانینو په رعایت کې ویني.

دوی ټینګار کړی چې د سیمې د ثبات لپاره د زور کارول نه بلکې ډیپلوماتیکې لارې چارې او د باور فضا رامنځته کول اړین دي.

متحده عربي اماراتو یاد وضاحت په داسې مهال کې ورکړ چې، له ایران سره د امریکا او اسرائیل ګډو پوځي ګواښونو زور اخیستی، او د ایران له ګواښونو څخه یې خپله بې طرفي واضحه کوي چې د دوی له خاورې او اډو به پر ایران هیڅ ډول ګوزار نکېږي.

په افغانستان کې د سره صلیب نړیوالې کمېټې استازې سیلویا ایزو د طالبانو حکومت د زندانونو چارو د سمون ادارې له مرستیال محمد بلال فاتح سره د ښځینه زندانیانو د وضعیت په اړه خبرې کړې دي.

د طالبانو حکومت د یادې ادارې په وینا، په دې لیدنه کې د ښځینه زندانیانو لپاره د مناسبې تغذیې، روغتیایي خدماتو، د متخصصو ډاکټرانو ګومارنې او د روزنیزو توکو د برابرولو غوښتنه شوې ده.

د سره صلیب پلاوي یادو برخو کې د همکارۍ ډاډ ورکړی دی.

د ایټالیا د بهرنیو چارو وزیر انتونیو تجاني ویلي، چې د ایران د روانو اعتراضونو پر مهال د ملکي وګړو پر ضد ځپنه د نړیوالې ټولنې له لوري یو روښانه او قاطع غبرګون ته اړتیا لري.

تجاني په خپله ایکس پاڼه ویلي، چې د پنجشنبې په ورځ به په بروکسل کې د اروپايي اتحادیې د بهرنیو چارو وزیرانو په غونډه کې، د نورو اروپايي شریکانو سره په همغږۍ، د ایران د «سپاه پاسداران انقلاب اسلامي» د ترهګرو سازمانونو په رسمي لېست کې د شاملولو وړاندیز وړاندې کړي.

د ایټالیا د بهرنیو چارو وزیر ټینګار کړی، چې هغه تاوتریخوالی چې د ایران رژیم د خپلو خلکو پر ضد کارولی، نور د زغملو نه دی او باید د مستقیمو سیاسي او اقتصادي پایلو سره مخ شي.

د هغه په وینا، سربېره پر دې به د هغو چارواکو پر ضد هم هدفمند بندیزونه ولګول شي چې د اعتراض کوونکو د ځپلو او د ملکي وګړو د وژلو مسؤل دي.

د طالبانو حکومت د عامې روغتیا وزیر مولوي نور جلال جلالي اعلان کړی چې هند له افغانستان سره د روغتیا په برخه کې د همکارۍ ژمنه کړې ده.

د هغه په وینا، د دې همکارۍ په چوکاټ کې به هند په افغانستان کې د سرطاني او تلسیمیا ناروغیو د تشخیص او درملنې لپاره یو عصري او سمبال روغتیایي مرکز جوړ کړي.

جلالي ویلي، یاد مرکز به د هغو ناروغیو په تشخیص او درملنه کې مهم رول ولري چې تر اوسه یې درملنه په هېواد کې له ستونزو سره مخ وه، او تمه ده چې د زرګونو ناروغانو روغتیایي اړتیاوې به پرې پوره شي.

د خیبرپښتونخوا وزیر اعلی سهیل اپریدی خبرداری ورکړی، چې که په تیرا سیمه کې روان پوځي عملیات په نږدې دوو تر درېیو ورځو کې ونه درېږي، نو صوبایي حکومت به د وضعیت د کنټرول لپاره نوې سیاسي او اداري پرېکړې اعلان کړي.

اپریدي د پاکستان تحریک انصاف یوې ولسي غونډې ته ویلي، چې فدرالي حکومت د تیرا د کړکېچ په اړه روښانه تګلاره نه لري او وروستۍ رسمي خبرتیا هم د ولس د ایستلو یا نه ایستلو په اړه هېڅ وضاحت نه لري، چې له امله یې خلک په وېره او بې‌باورۍ کې کډوالۍ ته اړ شوي دي.

هغه ټینګار کړی، چې صوبایي حکومت د امنیتي ادارو مخالف نه دی، خو د سیاسي حل پر ځای د زور کارول د ولس د بې‌ځایه کېدو او د بحران د پراخېدو لامل ګرځي.

د تیرا د پوځي عملیاتو له امله زرګونه کورنۍ خپلو کورونو پرېښودو ته اړ شوې دي.

د آلمان پارلمان غړي نوربرت رودګن په تازه څرګندونو کې ویلي، چې د ایران حکومت پر خپلو خلکو وحشتناک بریدونه کړي دي او موږ یې شاهدان یو.

نوموړي په خپله ایکس پاڼه لیکلي، چې په دې وضعیت کې هېڅ حکومت په وجدان سره نشي کولای د ایران د سپاه پاسداران (IRGC) د تروریستي سازمان په توګه نه ګڼلو پرېکړه وکړي.

رودګن همدارنګه له نړیوالو غوښتنه کړې چې د شفافیت او عامه فشار له لارې په دې موضوع کې اقدام وکړي.

د ټاپي (TAPI) د ګاز نل‌لیکې د پروژې د مسیر ۹۱ کیلومتره برخه په هرات ولایت کې بشپړه شوې او ټاکل شوې چې د روان میلادي کال تر پایه د دې پروژې اړوند چارې په دغه ولایت کې پای ته ورسېږي.

د هرات د طالبانو حکومت والي نوراحمد اسلام‌جار د افغانستان لپاره د ټاپي پروژې له مشر بېګنج عبدالله‌یف او په هرات کې د ترکمنستان له قونسل جنرال باتیروف یولوف سره کتلي او د پروژې د پرمختګ ارزونه یې کړې ده.

د ټاپي د پروژې مسؤلینو ویلي چې د نل‌لیکې د غځولو لپاره د ۹۱ کیلومتره مسیر چمتووالی بشپړ شوی او د عملي کار لپاره زمینه برابره شوې ده.

د هرات والي دفتر په وینا، تمه ده چې په هرات ولایت کې د ټاپي پروژې ساختماني چارې د روان کال تر پایه بشپړې شي.

په بشکیک کې د طالبانو حکومت سفارت خبر ورکړی چې د دې سفارت سرپرست مولوي عبدالشکور حقاني د قرغیزستان د بهرنیو چارو وزارت د څلورمې سیاسي څانګې له رییس ایبېک مالابېکوویچ سره وکتل.

سفارت ویلي، دواړو لورو د افغانستان او قرغیزستان ترمنځ د سیاسي او اقتصادي اړیکو پر پیاوړتیا خبرې کړي.

سفارت ویلي، مالابېکوویچ د افغانستان د ثبات، پرمختګ او اقتصادي ودې د ملاتړ ډاډ ورکړی.