الجزیره وایی چې د ۳۵۰ څوکيو لپاره نن په بنګله‌دیش کې پارلماني ټاکنې ترسره شوې.

د الجزیرې په وینا، د طارق رحمان په مشرۍ د بنګله‌دیش ملي ګوند (BNP) او د شفیق‌رحمان په مشرۍ د ۱۱ ګوندیز جماعت اسلامي اتحاد تر منځ نږدې سیالي رامنځته شوې.

د راپورونو له مخې، ټاکنې په عمومي ډول سوله‌ییزې وې، خو د ځینو سیمو راپورونه د جعلي رایو او د رایه ورکوونکو ځورونې څرګندوي، چې جماعت اسلامي په درې حوزو کې د بیا ټاکنو غوښتنه کړې ده.

ویل کېږي چې نږدې ۱۲۷ میلیونه وګړي د رایې ورکولو لپاره ثبت شوي، چې له دې جملې پنځه میلیونه وګړو تر دې مهاله رایه ورکولو کې ګډون کړی.

راپورونو کې دا هم ویل شوي چې د ماسپښین په ۲ بجو د ګډون کچه شاوخوا ۴۸ سلنه وه.

په ورته وخت کې د بنګله دېش د لنډمهاله حکومت مشر محمد یونس د ټاکنو ستاینه کړې او له ګوندونو یې وغوښتل چې د پایلو له اعلان وروسته د ډیموکراسۍ اصولو ته ژمن پاته شي.

همدا رنګه، د اروپایي ټولنې ۹۰ څارونکو، د ټاکنو شفافیت څارلی دی.

په داسې حال کې چې د عوامي لیګ ګوند برخه اخیستنه منع شوې ده، د دغه ټاکنو اصلي پایله به د طارق رحمان او شفیق‌رحمان تر منځ سیالي وټاکي.

د روسیې حکومت په رسمي ډول اعلان وکړ چې په ټول هېواد کې د واټس‌اپ پیغام‌رسوونکي اپلیکیشن فعالیت بند شوی دی.

کرملین وایي، دا پرېکړه وروسته له هغې عملي شوه چې یاد اپلیکیشن د روسي قوانینو له پلي کولو انکار وکړ.

د روسیې د ولسمشر ویاند دیمیتري پسکوف ویلي، دا اقدام د ملي امنیت او سایبري حاکمیت د ساتنې په موخه شوی او له دې مخکې هم خلکو ته خبر ورکړل شوی و، خو د واټس‌اپ اصلي شرکت «میټا» دغه بندیز سیاسي فشار بولي او وایي، مسکو غواړي کاروونکي دې ته اړ کړي چې له دولتي څار لاندې پیغام‌رسوونه وکاروي.

میټا خبرداری ورکړی چې د شخصي او کوډ شويو اړیکو بندول د خلکو ډیجیټلي ازادي کمزورې کوي.

له بلې خوا، د ټیلیګرام بنسټګر پاول دورف هم دا اقدام غندلی او ویلي یې دي چې د اړیکو محدودول د ستونزو حل نه، بلکې د سانسور پراخول دي.

د طالبانو حکومت د کورنیو چارو وزارت ستر امنیتي معینیت د جېمر دستګاوو د وېش او کارونې لپاره رسمي لارښود تصویب کړی چې له مخې یې، ټولې ادارې، شرکتونه او اشخاص چې غواړي په خپلو وسایطو کې د جېمر دستګاوې نصب کړي، اړ دي چې د چاودېدونکو توکو سره د مبارزې انجنیرۍ ریاست ته مراجعه وکړي او رسمي جواز ترلاسه کړي.

وزارت ټینګار کړی چې هر ډول جواز، استعلام یا لیک چې د یادې مرجعې له لوري نه وي صادر شوی، قانوني اعتبار نه لري.

د افغانستان لپاره بریتانیا د بهرنیو چارو وزارت ځانګړي استازي ریچارډ لېنډزي د افغانستان د خپلواکو رسنیو له استازو سره په یوه انلاین ناسته کې ویلي، چې رسنۍ د هېواد دننه او بهر د افغانانو د غږ د رسولو لپاره بنسټیز رول لري.

نوموړي په خپله ایکس پاڼه ویلي، چې د رسنیو ترمنځ ګډ کار کولای شي د افغانانو غږ نړیوالو ته ورسوي او د ټولنې ستونزې په اغېزمن ډول منعکس کړي.

لېنډزي زیاته کړې، چې د بیان ازادي د یوه خوندي، ټول‌شموله او سوکاله افغانستان لپاره اساسي ارزښت لري او پرته له ازادو رسنیو د ټولنې پرمختګ ناشونی دی.

دا څرګندونې په داسې حال کې کېږي، چې په وروستیو کلونو کې په افغانستان کې پر رسنیو محدودیتونه زیات شوي او ګڼ خبریالان د فعالیت له ستونزو سره مخ دي.

د دیامر ولسوالۍ د تانګر په سیمه کې د پاکستاني پوځیانو د ګزمې یو موټر نن د سړک په څنډه د نصب شوي بم تر برید لاندې راغلی چې د موټر چلوونکی یو سرتیری پکې ځای په ځای وژل شوی او څلور نور مرګوني ټپیان شوي دي.

د امنیتي سرچینو په وینا، پېښه د معمول ګزمې پر مهال رامنځته شوې او د بم چاودنې موټر په مجموعي توګه له منځه وړی.

د پاکستان د بهرنیو چارو وزارت ویاند طاهر اندرابي یو ځل بیا ویلي، د تحریک طالبان پاکستان په ګډون یو شمیر وسله والې ډلې په افغانستان کې شتون لري.

ښاغلي اندرابي ویلي وروستۍ ناامنۍ او دغه وسله والې ډلې دغه هیواد لپاره په جدي سرخوږي بدل شوي دي.

د پاکستان د بهرنیو چارو وزارت ویاند په خپلې اونیزې خبرې ناستې کې د طالبانو حکومت تورن کړ چې ګڼو ناقانونه وسله والو ډلو ته یې پناه ورکړې.

طاهر اندرابي زیاته کړه، پاکستان به دا راپور د ملګرو ملتونو د امنیت شورا له غړو هېوادونو سره شریک او تعقیب کړي، څو د سیمې پر امنیت د دې ډلو د اغېزو په اړه جدي ګامونه واخیستل شي.

په افغانستان کې د طالبانو حکومت په وار وار د پاکستان دا ډول تورونه او ادعاوې رد کړي او ویلي یې دي، چې دغه هیواد باید د خپلو امنیتي ناکامیو مسولیت په افغانستان نه اچوي.

په دې وروستیو کې د تحریک طالبان پاکستان د مرستیال په ګډون د داعش یو شمیر لوړپوړي قوماندانان او غړي د پاکستان په بیلابیلو ښارونو کې وژل شوي او یا هم نیول شوي دي.

د امریکا د خزانې وزیر سکاټ بسنت ویلي، چې د ایران پر وړاندې د واشنګټن دریځ لا هم سخت دی او د فشار ټولې لارې پرانیستې دي.

بسنت د فاکس نیوز سره په مرکه کې ویلي، چې ولسمشر ډونالډ ټرمپ او د جنګ وزیر پیت هګسټ د ایران پر لور د پوځي تجهیزاتو د لېږد پرېکړه کړې او حکومت یې د بېلابېلو انتخابونو ارزونه کوي.

نوموړي زیاته کړه، چې ټرمپ باور لري له ایران سره د یو ښه تړون امکان شته، خو دا به په دې پورې تړلې وي چې تهران څومره نرمښت ښيي.

د امریکا د خزانې وزیر د ایران چارواکي تورن کړل چې یوازې «د زور په ژبه» پوهېږي او ویې ویل، چې واشنګټن د اقتصادي بندیزونو، مالي فشار او پوځي ځواک له لارې د اعظمي فشار سیاست عملي کړی او دوام به ورکړي.

بسنت همدارنګه وویل، چې امریکا د ایراني چارواکو بهرنیو شتمنیو ته څارنه کوي او که اړتیا شي، دا پیسې به د ایران خلکو ته وسپارل شي.

د پاکستان د بهرنیو چارو وزیر اسحاق ډار اعلان کړی، چې حکومت یې د افغانستان په دوو مهمو ښارونو، کندهار او بلخ کې د خپلو دیپلوماتیکو استازولیو لپاره نوي سرقونسلان ټاکلي دي.

د نوموړي په وینا، شهباز حسین د کندهار د سرقونسل په توګه او اویس احمد خان د بلخ د سرقونسل په توګه معرفي شوي دي، څو د پاکستان د قونسلګریو چارې مخ ته یوسي.

دا په داسې حال کې ده چې له ۲۰۲۵ کال د اکتوبر له ۱۰مې نیټې راوروسته د افغانستان او پاکستان ترمنځ سرحدي لارې تړلي او هر ډول قانوني تګ راتګ پر دغو لارو د دواړو لوریو ترمنځ محدود پاتې شوي.

د ترکیې د بهرنیو چارو وزیر هاکان فیدان ویلي، چې امریکا او ایران دواړه د اټومي تړون لپاره د نرمښت نښې ښيي، خو خبرداری یې ورکړی چې که واشنګټن د ایران د توغندیو پروګرام او سیمه‌ییزو ډلو ملاتړ هم د خبرو برخه کړي، نو دا به یوازې یوې “بلې جګړې” ته لاره هوارول وي.

فیدان د فایننشل ټایمز سره په مرکه کې ویلي، امریکا ښایي له خپلې پخوانۍ غوښتنې شاته شي چې ایران باید په بشپړه توګه د یورانیمو غني کول بند کړي، او اوس د محدودو شرایطو لاندې د دې پروسې منلو ته چمتو ښکاري.

هغه وویل ایران هم “ریښتینی هوډ لري چې تړون ته ورسېږي او د غني کولو کچه راکمه کړي، همدارنګه د نړیوالو سختو تفتیشونو منلو ته چمتو دی، لکه څنګه چې د ۲۰۱۵ کال په تړون کې یې منلې وه.”

هاکان فیدان زیاته کړه: “ایرانیان پوهېږي چې باید له امریکا سره هوکړې ته ورسېږي، او امریکایان هم درک کوي چې ایران خپلې سرې کرښې لري. په زور څه نشي کېدای.”

دا څرګندونې وروسته له هغه کېږي چې د امریکا ځانګړي استازي سټیو وېتکاف او جیرډ کوشنر د ایران له بهرنیو چارو وزیر عباس عراقچي سره په عمان کې غیرمستقیمې خبرې کړې دي، کومې چې دواړو لورو “مثبت لومړنی ګام” بللی دی.

د طالبانو حکومت د بهرنیو چارو وزیر امیر خان متقي، په کابل کې د تاجکستان سفیر سعدي شریفي سره لیدلي دي.

د طالبانو حکومت د بهرنیو چارو وزارت ویاند حافظ ضیاء احمد تکل ویلي، چې په دې لیدنه کې مولوي امیرخان متقي د افغانستان او تاجکستان ترمنځ د ډیپلوماتیکو اړیکو پر پراختیا خبرې کړي او زیاته کړې یې ده چې دواړه هېوادونه د ګاونډیتوب، اسلامي ورورولۍ او ګډو فرهنګي او ژبنیو اړیکو له امله کولی شي په سیاسي، اقتصادي او سوداګریزو برخو کې خپلې اړیکې لا پراخې کړي او هېڅ لوری نشي کولای د دواړو هېوادونو ترمنځ دوستانه اړیکې زیانمنې کړي.

نوموړي ویلي، د “اسلامي امارت” مشرتابه له تاجکستان سره د اړیکو د لا پراختیا لپاره قوي ژمنتیا لري.

بلخوا، د تاجکستان سفیر ویلي، چې تاجکستان د دواړو هېوادونو پر ګډه پوله د مهمو اقتصادي پروژو د پلي کولو پلان لري او غواړي د موجودو واقعیتونو پر بنسټ له افغانستان سره اقتصادي اړیکې پیاوړې کړي.

د بهرنیو چارو وزارت په خبرپاڼه کې راغلي، چې دواړو لورو د ګډ اقتصادي کمېسیون د جوړېدو، د سرحدي او امنیتي همکاریو د پراختیا او د دواړو هېوادونو د بهرنیو چارو وزارتونو د راتلونکو کلنیو پروګرامونو په اړه هم خبرې او نظرونه تبادله کړل.