د امریکا د تګزاس ایالت کې مکسیکو پورې اړوند یوه کوچنۍ الوتکه لوېدلې چې له امله یې د یوه ماشوم په ګډون شپږ کسان وژل شوي دي.
د رویټرز خبري اژانس د راپور له مخې، دغه الوتکه یو دوه کلن ماشوم چې سخت سوځېدلی و، د بیړنۍ درملنې لپاره له مکسیکو څخه امریکا ته لېږداوه.
چارواکو ویلي، الوتکه د الوتنې پر مهال له ستونزې سره مخ شوه او وروسته ولوېده.
په راپور کې راغلي چې په الوتکه کې ټول اته کسان سپاره وو، چې له ډلې یې شپږ تنو خپل ژوند له لاسه ورکړی او دوه نور ژغورل شوي دي.
د ترکیې د کورنیو چارو وزارت تایید کړی چې د لیبیا د پوځ لوی درستیز محمد علي احمد الحداد د الوتکې د لوېدو له پېښې وروسته انقرې کې مړ شوی دی.
د لیبیا ولسمشرۍ شورا هم خبر ورکړی چې الحداد له څو نورو لوړپوړو نظامي چارواکو سره وژل شوی دی.
د ترکیې د کورنیو چارو وزیر په وینا، الوتکې د حیمانا سیمې په فضا کې د بېړنۍ ناستې غوښتنه وکړه؛ خو له هغې وروسته یې اړیکه پرې شوه.
د لیبیا لومړي وزیر عبدالحمید الدبیبه د پېښې له امله د خپل هېواد د پوځ د لوی درستیز پر مړینه خواشیني څرګنده کړې ده.
د پښتنو یوې قبایلي جرګې له پاکستاني حکومت غوښتي چې د چمن دروازه دې ژر پرانیزي، څو هغه زرګونه مسافر او سوداګر بېرته خپلو کورونو ته ستانه شي چې له اکتوبر راهیسې په افغانستان کې بند پاتې دي.
قبایلي مشرانو ویلي، د ډیورنډ کرښې د تړل کېدو له امله سوداګریز فعالیتونه ځنډېدلي او بشري ستونزې رامنځته شوې دي.
دوی زیاته کړې چې ډېری مسافر قانوني اسناد لري، خو د ستنېدو اجازه نه ورکول کېږي، او زرګونه بار وړونکې لارۍ هم د خوړو له کمښت سره مخ دي.
مشرانو د ازاد سفر غوښتنه کړې او د درې ورځنۍ جرګې د جوړېدو اعلان یې کړی.
له ۵۰ څخه زیاتو نامتو جرمني سیاستوالو، فرهنګي څېرو او د بشري حقونو فعالانو د یوه پرانیستي لیک له لارې له فدرالي حکومت غوښتي، هغه افغان وګړي دې ژر تر ژره جرمني ته ولېږدوي چې مخکې ورسره د منلو رسمي ژمنه شوې ده.
د جرمني رسنیو د راپورونو له مخې، په لیک کې راغلي چې شاوخوا ۱۸۰۰ افغانان، چې پخوا یې له جرمني بنسټونو سره همکاري کړې او دا مهال په پاکستان کې مېشت دي، د جبري ستنولو له جدي ګواښ سره مخ دي.
لیکوالانو خبرداری ورکړی چې دغو کسانو ته په افغانستان کې د بېرته ستنېدو په صورت کې امنیتي خطرونه متوجه دي.
د لیک لاسلیک کوونکو پر جرمني حکومت غږ کړی چې د خپلو بشري او اخلاقي مسوولیتونو له مخې دې د دغو افغانانو د خوندي انتقال بهیر چټک کړي او ځنډ دې پای ته ورسوي.
په جلا وطنۍ کې د افغانستان د ازادو رسنیو د ملاتړ بنسټ (نی) د پاکستان له لومړي وزیر شهباز شریف څخه غوښتي چې په دغه هېواد کې د مېشتو افغان خبریالانو او رسنیزو کارکوونکو د ویزو د غځولو، خوندیتوب او امنیت په برخه کې همکاري وکړي.
نی ویلي، د افغان خبریالانو وضعیت ډېر بحراني دی، ځینې د شړل کېدو له وېرې په خپلو کورونو کې محدود شوي او له لومړنیو او روغتیايي خدماتو بېبرخې دي.
دغه بنسټ همداراز د کورنیو چارو وزارت ته د انساني او باوقاره چلند غوښتنه کړې او د افغان خبریالانو د مالي ستونزو د حل لپاره یې د بیړنیو ګامونو اخیستو ټینګار کړی دی.
د طالبانو حکومت وايي، د ډیورنډ کرښې ته څېرمه د داعش د یوه غړي نیول کېدل دا ثابتوي چې دغه ډله په پاکستان کې مرکزونه لري.
د طالبانو حکومت ویاند ذبیحالله مجاهد ادعا کړې چې د داعش ځالې د پولې هغې غاړې ته دي او ځینې بریدونه هم هلته طرحه شوي دي.
پاکستان تر اوسه دې ادعا ته غبرګون نه دی ښودلی.
بل لور ته، د ترکیې دولتي رسنیو راپور ورکړی چې د ترکیې استخباراتو د افغانستان او پاکستان پولې ته نږدې د ځانګړو عملیاتو پر مهال یو ترکي وګړی، محمد ګورن، نیولی چې د داعش خراسان څانګې غړی بلل کېږي.
د آلمان رسنیو راپور ورکړی چې د دغه هېواد حکومت ۱۴۱ افغان وګړي آلمان ته لېږدولي دي.
د راپورونو له مخې، دغه افغانان د یوه چارټر الوتنې له لارې د نیدرزاکسن ایالت د هانوفر هوايي ډګر ته رسېدلي دي.
د آلمان د کورنیو چارو وزارت ویاند ویلي، چې دا کسان به تر لومړنیو اداري چارو وروسته د آلمان بېلابېلو ایالتونو ته واستول شي.
چارواکي زیاتوي چې دا لېږد د هغو افغانانو لپاره شوی چې د آلمان د بشردوستانه او ځانګړو منلو پروګرامونو کې شامل دي.
د هرات د ولایتي ادارې مسوولان وايي چې د دې ولایت له صنعتي ښارګوټي څخه د لومړي ځل لپاره تازه تولید شوې بټرۍ بهرنیو هېوادونو ته صادرې شوې دي.
د دوی په وینا، د شاوخوا ۴۰ زره ډالرو په ارزښت بټرۍ چې ټولیز وزن یې ۲۷ ټنه کېږي، نن سعودي عربستان او متحده عربي امارت ته ولېږدول شوې.
په ورته وخت کې، د هرات له صنعتي ښارګوټي څخه د فولادو یوه بله جوپه هم صادره شوې ده.
دغه محموله چې ۱۱ کانټینره جوړوي، نن د تاجیکستان پر لور حرکت کړی دی.
ولایتي چارواکي وايي، دا صادرات د کورني تولید د پیاوړتیا او د افغانستان د صادراتو د پراخېدو په لور یو مهم ګام بلل کېږي.
د پاکستان لومړي وزیر شهباز شریف یو ځل بیا د پاکستان تحریک انصاف ګوند ته د خبرو اترو بلنه ورکړې ده.
هغه د کابینې غونډې ته ویلي چې د هېواد د پرمختګ او سوکالۍ لپاره د سیاسي ګوندونو ترمنځ همغږي اړینه ده.
شهباز شریف ټینګار کړی چې مذاکرات به یوازې د مشروع غوښتنو پر بنسټ ترسره کېږي او حکومت د سیاسي جوړجاړي لپاره هر ډول هڅو ته چمتو دی.
د طالبانو حکومت وایي، د جوزجان ولایت قوشتېپې او درزاب ولسوالیو ته د برېښنا رسونې پروژې تړون لاسلیک شو.
د طالبانو حکومت مرستیال ویاند حمدالله فطرت ویلي، چې دا تړون نن د ریاستالوزراء د اقتصادي مرستیال ملا عبدالغني برادر اخوند په حضور کې د اوبو او انرژۍ وزارت او یوه خصوصي شرکت ترمنځ لاسلیک شو.
د فطرت په خبره، د یادې پروژې لګښت شاوخوا یو میلیارد او ۸۸۶ میلیونه افغانۍ اټکل شوی او چارې به یې په درېیو کلونو کې بشپړې شي.
نوموړي ویلي، چې په دې پروژه کې د ۸۵.۲۴ کیلومترو په اوږدوالي د ۲۲۰ کیلوولټ برېښنا مزي غځول، په قوشتېپې او درزاب ولسوالیو کې د دوو سبسټېشنونو او دوو توزیعي شبکو جوړول شامل دي.
هغه دغه راز ویلي، چې د پروژې له بشپړېدو سره به زرګونه کورنۍ له برېښنا برخمنې شي.