د پاکستان د بهرنيو چارو وزارت اعلان کړی، چې د متحده عربي اماراتو ولسمشر او د دوبۍ واکمن شيخ محمد بن زايد النهيان به د جمعې په ورځ اسلام‌اباد ته رسمي سفر وکړي.

د دې سفر موخه د دواړو هېوادونو ترمنځ د سياسي او اقتصادي اړيکو لا پياوړتيا بلل شوې ده.

د معلوماتو له مخې، د ډسمبر پر ۲۶مه به د دې لوړپوړي مېلمه د هرکلي په مناسبت په اسلام‌اباد کې عمومي رخصتي وي او د پاکستان حکومت د نوموړي د استقبال لپاره پراخ امنيتي او تشريفاتي تياری پيل کړی دی.

تمه ده، چې د سفر پر مهال به د دواړو هېوادونو مشران پر مهمو دوه اړخيزو موضوعاتو خبرې وکړي.

متحده عربي امارات د پاکستان له سترو مالي ملاتړو هېوادونو څخه شمېرل کېږي او په تېرو کلونو کې يې پاکستان ته د پورونو، پانګونې او بېلابېلو اقتصادي پروژو له لارې ملاتړ کړی دی.

هند د خپل فضايي تاریخ په ترڅ کې تر ټولو دروند سیټلایټ فضا ته ولېږدوه، چې وزن یې ۶ ټنه او ۱۰۰ کیلو ګرامه ښودل شوی دی.

د هند فضايي ادارې ویلي، د دومره لوی او دروند سیټلایټ بریالی توغول د دې هېواد د فضايي ټکنالوژۍ په برخه کې یو مهم پړاو او ستره لاسته راوړنه ده.

د چارواکو په وینا، دا سیټلایټ به د مخابراتو، معلوماتو لېږد، څارنې او تخنیکي خدماتو په برخه کې مهم رول ولوبوي او د هېواد دننه او سیمه‌ییزو اړتیاوو د پوره کولو لپاره به وکارول شي.

هند ټینګار کړی، چې د دروند وزن لرونکي سیټلایټ فضا ته رسول د پرمختللو توغندیزو سیستمونو او لوړ تخنیکي وړتیاوو ښکارندویي کوي.

هندي چارواکو همداراز اعلان کړی، چې دا هېواد د فضايي څېړنو په برخه کې اوږدمهاله پلانونه لري او غواړي تر ۲۰۴۰ میلادي کال پورې سپوږمۍ ته انسانان واستوي.

د دوی په باور، دا هدف به هند د نړۍ د هغو محدودو هېوادونو په کتار کې ودروي، چې د انسان وړونکې فضايي ماموریتونه ترسره کوي.

په عمان کې د طالبانو حکومت د سفارت سرپرست حافظ عمر د دغه هېواد د بهرنیو چارو وزارت له سیاسي مرستیال شیخ خلیفه بن علي بن عیسی الحارثي سره په مسقط کې لیدنه کړې ده.

د طالبانو حکومت سفارت د معلوماتو له مخې، دا کتنه د دواړو هېوادونو ترمنځ د اړیکو د پیاوړتیا په موخه ترسره شوې ده.

په دې لیدنه کې د افغانستان پر وروستیو سیاسي او ټولنیزو حالاتو خبرې شوې او دواړو لورو د سیاسي تفاهم، اقتصادي همکاریو او سوداګریزو اړیکو د پراختیا پر اړتیا ټینګار کړی.

سرچینې زیاته کړې، چې د کتنې یوه مهمه برخه په عمان کې د مېشتو افغان وګړو ستونزو ته ځانګړې شوې وه.

په دې برخه کې د کونسلي خدمتونو د اسانه کولو، اسنادو د چارو د چټکتیا او اړوندو اسانتیاوو د ښه‌والي غوښتنه شوې.

د عمان د بهرنیو چارو وزارت سیاسي مرستیال ډاډ ورکړی، چې د افغانانو د ستونزو د حل او د دواړو هېوادونو د اړیکو د لا پراختیا لپاره به لازمې همکارۍ ترسره شي.

د ایران د طبي علومو د پوهنتون رییس نادر توکلي ویلي، چې د تهران شاوخوا سیمو کې د افغان وګړو له وتلو وروسته د زېږونونو په کچه کې د پام وړ کمښت رامنځته شوی، چې دا وضعیت د روغتیايي نظام او نفوسو د بدلون له پلوه د اندېښنې وړ بلل کېږي.

د هغه په وینا، ښارونه لکه شهریار او رباط‌کریم چې پخوا پکې د بهرنیو وګړو حضور زیات و، اوس د زېږونونو له ښکاره راټیټېدو سره مخ دي.

توکلي زیاته کړې، تر دوو کلونو وړاندې په ځینو دولتي او خصوصي روغتونونو کې د بهرنیو وګړو، په ځانګړي ډول افغان کډوالو، د زېږونونو کچه آن تر ۶۰ سلنې پورې رسېده.

نوموړي ټینګار کړی، چې د زېږونونو دا کمښت نه یوازې د روغتیايي مرکزونو پر فعالیت اغېز لري، بلکې د نفوسو د جوړښت، کاري ځواک او راتلونکو ټولنیزو اړتیاوو په اړه هم جدي پوښتنې راپورته کوي.

په ۲۰۲۵ کال کې د خیبر پښتونخوا په بېلابېلو سیمو، په ځانګړي ډول بنو کې، پر پاکستاني پولیسو د وسله‌والو بریدونو له امله د پام وړ ځاني او مالي زیانونه اوښتي دي.

د پولیسو د لوړپوړو چارواکو د معلوماتو له مخې، یوازې په بنو کې د روان کال پر مهال په لسګونو بریدونه شوي چې په پایله کې یې لږ تر لږه ۲۷ پولیس سرتېري وژل شوي دي.

د دوی په وینا، په دغو بریدونو کې د پولیسو وسایط، پوستې او تجهیزات هم زیانمن شوي دي.

وسله‌والو د ډرون ټکنالوژۍ کارونه هم پیل کړي؛ خو د انټي‌ډرون وسایلو د فعالېدو وروسته سلګونه احتمالي بریدونه شنډ شوي هم دي.

د چارواکو له قوله، د پولیسو پر ضد بریدونه د امنیتي وضعیت د خرابولو هڅه ده، خو امنیتي ادارې د دغو ګواښونو پر وړاندې د مقابلې توان لري.

د ونزوئلا ملي شورا د واکمن ګوند تر کنټرول لاندې، یو نوی قانون تصویب کړ چې له مخې یې هغو کسانو ته تر ۲۰ کلونو بند سزا ورکول کېږي، چې د حکومت په وینا په «سمندري غلا، محاصره او ورته نړیوالو ناقانونه کړنو» کې لاس ولري.

دا اقدام وروسته له هغې وشو، چې امریکا د ونزوئلا د نفتو اړوند ټانکرونو د توقیف لړۍ چټکه کړې ده.

د امریکا چارواکي وايي، دا عملیات د تحریمونو د ماتولو او د مخدره توکو د قاچاق پر ضد ترسره کېږي، خو کاراکاس دا کړنې «اقتصادي محاصره» بولي او ادعا کوي چې واشنګټن غواړي د ولسمشر نیکولاس مادورو حکومت کمزوری کړي.

د فشارونو له امله، د ونزوئلا دولتي شرکت PDVSA اړ شوی چې تېل په ټانکرونو کې ذخیره کړي، چې دې چارې د تېلو زیرمې یو ځل بیا له لس میلیونو بېرلو پورته رسولې دي.

دا په داسې حال کې ده چې چین لا هم د ونزوئلا د تېلو تر ټولو ستر پېرېدونکی پاتې شوی او د دواړو هېوادونو ترمنځ سیاسي او اقتصادي کړکېچ لا پسې زیات شوی دی.

رویټرز خبري اژانس راپور ورکړی چې یوې نړیوالې سوداګریزې ډلې د پاکستان د ملي هوايي شرکت (PIA) ۷۵ سلنه ونډه واخیستله.

د راپور له مخې، یادې ډلې د PIA د ونډو په بازار کې تر ټولو لوړه بولي کړې ده، څو د شرکت د ملکیت لویه برخه ترلاسه کړي.

پاکستاني حکومت د اوږدمهالو مالي زیانونو له امله د شرکت د مدیریت توان له لاسه ورکړی او غواړي چې د دې ملي هوايي شرکت چلول خصوصي سکټور ته وسپاري.

د سوداګریزې ډلې له خوا د ونډې اخیستلو وروستۍ پرېکړه به د پاکستان د حکومت او د بازار د قوانینو تر موافقې وروسته اعلان شي.

روسي چارواکو ویلي، چې یو شکمن ځانمرګي بریدګر د مسکو په یلتسکایا سړک کې ځان ته چاودنه ورکړې چې له امله یې درې کسان د دوه ترافیک پولیس افسرانو په شمول وژل شوي.

د روسیې د دولتي خبري اژانس د معلوماتو له مخې، دوه ترافیک پولیسو د خپل خدمت موټر ته نږدې یو شکمن کس ولید او کله چې دوی د هغه د نیولو هڅه وکړه، نوموړي له ځان سره تړلو چاودېدونکو توکو ته چاودنه ورکړه

امنیتي ځواکونو سیمه کلابنده کړې او د پېښې په اړه پلټنې روانې دي.

د امریکا د پخواني ولسمشر جو بایډن زوی، هنټر بایډن، په یوه تازه پاډکاسټ مرکه کې د خپل پلار پر هغه پرېکړه نیوکه کړې چې له مخې یې امریکایي ځواکونه له افغانستانه وویستل شول.

هنټر بایډن ویلي چې حتی له افغانستان څخه د وتلو پر موضوع هم له خپل پلار سره یې خبرې کړي وې.

هغه ټینګار کړی چې که څه هم د وتلو پلان مهم و، خو په ځینو برخو کې یې د غوره مدیریت امکان شتوم درلود.

هنټر په همدې مرکه کې د خپل پلار له ګڼو نورو سیاسي پرېکړو او پالیسیو دفاع هم کړې او ویلي یې دي چې د ځینو اقداماتو هدف د امریکا د ملي ګټو ساتنه او د نړیوالو اړیکو تقویه کول وو.

هغه د خپلو خبرو پر مهال د پلار د کارونو پر پیچلتیا او د هغه د پرېکړو د ستونزو په اړه هم وضاحت ورکړی.

د پاکستان ډان ورځپاڼې راپور ورکړی چې د روان مالي کال په لومړیو پنځو میاشتو کې د پاکستان سوداګریز کسر د افغانستان په ګډون له ۹ ګاونډیو هېوادونو سره د پام وړ زیات شوی دی.

راپور ښيي چې په دې موده کې د پاکستان واردات د صادراتو په پرتله ډېر شوي او د سوداګریز کسر کچه شاوخوا ۳۹.۳۳ سلنه لوړه شوې ده.

د معلوماتو له مخې، د پاکستان د ګاونډیو هېوادونو سره د سوداګریز کسر ارزښت څه دپاسه ۶۰ میلیاردو ډالرو ته رسېدلی دی، چې د اقتصادي فشارونو د زیاتوالي نښه ګڼل کېږي.

کارپوهان وايي، د سوداګریز کسر زیاتوالی د وارداتو د لوړوالي او د صادراتو د ټیټوالي له امله رامنځته شوی، او د دې وضعیت د اصلاح لپاره د سوداګرۍ او اقتصادي پالیسیو په برخه کې اقدامات اړین دي.