په اندونیزیا کې د طالبانو حکومت سفارت اعلان کړی چې د پاسپورټونو د چاپ او وېش لړۍ یې بېرته پیل کړې ده.

یاد سفارت ویلي، چې له دې وروسته به په اندونیزیا کې مېشت افغانان توان ولري چې نوي پاسپورټونه او تمدید شوي اسناد په مستقیم ډول له سفارته ترلاسه کړي.

هندي رسنیو خبر ورکړی چې د نوي ډیلي په اېندرا ګاندي هوايي ډګر کې د دوو الوتکو د نږدې ټکر پېښې په وروستیو شېبو کې مخنیوی شوی دی.

د راپورونو له مخې، د اریانا افغان هوايي شرکت الوتکه په تېروتنه هغه ځغاست لیکې ته ورغله چې بلې الوتکې هم کاروله او هم مهال دننه کېدونکې وه.

هندي چارواکي وايي، پېښه د انساني خطا له امله شوې او د موضوع رسمي پلټنې روانې دي.

د طالبانو حکومت د صنعت او سوداګرۍ وزیر نورالدین عزیزي په نوي ډیلي کې د یوې خبري ناستې پر مهال ویلي چې له هند سره د سوداګرۍ د پراختیا لپاره نوي ګامونه اخیستل کېږي.

عزیزي ویلي، افغانستان او هند هوکړه کړې چې غیر تعرفوي فیسونه صفر ته راکم کړي او د سوداګریز همغږۍ د پیاوړتیا لپاره به په راتلونکې یوه میاشت کې په کابل او نوي ډیلي کې سوداګریز اتاشیان وټاکل شي.

هغه د بانکونو ترمنځ د اړیکو ژورېدل، د چابهار بندر پراخه کارونه، د مال وړونکې الوتنو زیاتوالی، ګډ تجارتي کمیټې او ګډه سوداګریزه خونه جوړول د نورو مهمو اقداماتو په توګه یاد کړل.

د نوموړي په وینا، دواړه هېوادونه به هر کال د یو بل په کوربه‌توب کې د سوداګرۍ نندارتونونه هم جوړوي څو د تولیداتو او پانګونې فرصتونه پرمخ لاړ شي.

د طالبانو حکومت د بهرنیو چارو وزارت وايي چې د متحده عربي اماراتو نوي سفیر سيف محمد الکتبي نن په کابل کې د بهرنیو چارو وزیر مولوي امیر خان متقي ته خپل د باور لیک کاپي سپارلې ده.

د وزارت د معلوماتو له مخې، متقي د نوي سفیر هرکلی کړی او د هغه د بریالي ماموریت هیله یې څرګنده کړې ده.

هغه ویلي چې د افغانستان او اماراتو ترمنځ په بېلابېلو برخو کې د اړیکو د پراخولو لپاره مناسب فرصتونه شته او باید په اغېزمنه توګه ترې ګټه واخيستل شي.

متقي له اماراتو سره د سوداګریزو اړیکو لا پراخېدل مهم بللي او ټینګار یې کړی چې افغانانو ته د ویزو په برخه کې اسانتیاوې باید زیاتې شي.

نوي سفیر سيف محمد الکتبي د دواړو هېوادونو اړیکې تاریخي بللې او ژمنه یې کړې چې د تجارت او ټرانزیټ په برخه کې به پر نوو ګډو پروژو کار وکړي.

هغه همداراز ویلي چې افغان سوداګرو ته د اماراتو د ویزو په آسانه کولو کې به لازمې هڅې ترسره کړي.

د طالبانو حکومت د صنعت او سوداګرۍ وزارت وايي د افغانستان او هند د چارواکو ترمنځ د نساجي برخې په اړه د همکارۍ خبرې شوې دي.

د وزارت د خبرپاڼې له مخې، د بهرنیو چارو وزارت د اقتصادي اړیکو رییس شفیع اعظم او د صنعتي پارکونو رییس الحاج عارف د هند د نساجي وزارت له استازیو سره کتنه کړې ده.

هندي پلاوي په دې لیدنه کې افغان لوري ته بلنه ورکړې چې په «بهارت ټېکس» نندارتون کې ګډون وکړي او خپل کورني تولیدات په هغه کې وړاندې کړي.

د طالبانو حکومت په بلخ کې د اوزبیکستان له چارواکو سره د نوو سوداګریزو موافقو اعلان کړی دی.

د بلخ د طالبانو د والي ویاند حاجي زید وایي چې له دې وروسته د افغانستان د ډبرو سکاره د پاکستان پر ځای اوزبیکستان ته صادرېږي.

هغه زیاتوي چې اوزبیکستان به هم افغانستان ته خپل سمنټ او باکیفیت درمل لېږي.

د یادونې ده چې د پاکستان له خوا د پولو تړل کېدو او سوداګریزو محدودیتونو د طالبانو حکومت دې ته هڅولی چې له ایران او اوزبیکستان سره سوداګریز تعاملات پراخ کړي.

د پنجاب پولیس وايي چې په راولپنډۍ کې د بې‌اسناده افغان کډوالو د موندلو عملیات روان دي او په تازه اقدام کې یې ۱۹ افغانان نیولي دي.

د پولیسو په وینا، دا عملیات د ښار په ګڼو سیمو کې ترسره شوي او په لسګونو کورونه، هټۍ او هوټلونه پلټل شوي دي.

چارواکي زیاتوي چې د کور په کرایه ورکولو په تور د څلورو کسانو پر ضد قضیې هم ثبت شوې دي.

د امریکا ولسمشر ډونالد ټرمپ اعلان کړی چې متحده ایالات به د اخوان‌المسلمین اسلامي ډله د «بهرنیو ترهګریزو سازمانونو» په لېست کې شامله کړي.

د «جاست د نیوز» د راپور له مخې، ټرمپ ویلي چې دا طبقه‌بندي به په تر ټولو قوي او قاطع ډول عملي شي او د دې پرېکړې وروستي اسناد د چمتو کېدو په حال کې دي.

راپور زیاتوي، ټرمپ لا د خپلې لومړۍ ولسمشرۍ په دوره کې هڅه کوله چې اخوان‌المسلمین په رسمي ډول ترهګریزه ډله اعلان کړي.

راپور دغه راز ویلي، چې په واشنګټن کې د کلونو راهیسې د دې ډلې د ماهیت او ورسره د چلند په اړه بحثونه روان وو.

د یادونې ده چې اخوان‌المسلمین د سیمې یوه تر ټولو پخوانۍ اسلام‌پاله سیاسي او اجتماعي ډله ده چې په ۱۹۲۸ کال کې په مصر کې رامنځته شوه او اوس په دې تورنه ده چې ګواکې منځني ختیځ کې نارامي رامنځته کوي.

د هند حکومت وايي له کاناډا سره یې هوکړه کړې چې د نوې سوداګریزې موافقې خبرې بېرته پیل کړي.

دغه مذاکرات دوه کاله مخکې د ډېپلوماټیکو ترینګلتیاوو له امله ځنډول شوي وو.

د کاناډا لومړي وزیر مارک کارني د جي–۲۰ سرمشریزې په څنډه کې د هند له لومړي وزیر نرېندرا مودي سره لیدلي او د دواړو هېوادونو مشرانو د CEPA په نوم د لوړې کچې اقتصادي مشارکت د خبرو پر بیا پیل موافقه کړې.

کارني ویلي، دواړو خواوو د سوداګرۍ خبرې پیل کړې چې ښايي دوه اړخیزه راکړه ورکړه تر ۷۰ میلیارده کاناډایي ډالرو لوړه کړي.

سربېره پر دې، دواړو هېوادونو د سولر انرژۍ، ملکي اټومي انرژۍ او د یورانیمو د اوږدمهاله قراردادونو په تړاو هم د همکارۍ خبرې کړي دي.

د یادونې ده چې د دواړو هېوادونو اړیکې له هغه وروسته د ښه کېدو په لور روانې دي چې کاناډا په ۲۰۲۳ کال کې د هند او کاناډا د سیاسي شخړې له امله سوداګریزې خبرې درولې وې.

د ننګرهار پخواني والي ضیاءالحق امرخېل ایکس پاڼې کې لیکلي، د پاکستاني چارواکو هغه څرګندونې بابیزې ګڼلې چې په کابل کې د نظام د بدلون خبرې کوي.

‏ښاغلي امرخیل ویلي، د پاکستان حکومتي چارواکو تر خبریالانو پورې، ټول د طالبانو د نظام د بدلون بحثونه کوي، خو پاکستان فکر کوي چې دا د افغانستان په چارو کې لاسوهنه نه ده.

‏ضیاءالحق امرخیل په سختو ټکو د پاکستان دا ډول دوه مخې چلند غندلی او ویلي کله چې بحث تحریک طالبان پاکستان ته رسېږي، هغه ډلې ته چې د ده په وینا د پاکستان د پوځ د ظلم، بې عدالتۍ او د پښتنو د بیا بیا محرومیتونو په نتیجه کې زېږېدلې، نو بیا ناڅاپه ادعا کېږي چې افغانستان په پاکستان کې لاسوهنه کوي.

‏امرخېل لیکلي:« دا منطق پاکستان کلونه کارولای او تل یې هڅه کړې چې په افغانستان کې نظامونه بې ثباته او بدل کړي، خو اوس دغه مداخلې پای ته رسېدلې یوازې خپل ځان ستړی کوي.»