د سعودي عربستان د بهرنیو چارو وزارت په یوه رسمي بیان کې د متحده عربي اماراتو له وروستیو اقداماتو څخه ژوره نارضایتي څرګنده کړې ده.

په بیان کې ویل شوي، چې اماراتو د یمن په حضرموت او المهرة ولایتونو کې د جنوبي انتقالي شورا د ځواکونو د پوځي تحرکاتو ملاتړ کړی، چې دا کار د سعودي د ملي امنیت او د یمن او سیمې د ثبات لپاره جدي ګواښ بلل شوی دی.

سعودي عربستان ټینګار کړی، چې د یمن د قانوني حکومت او د ولسمشرۍ شورا له رسمي اجازې پرته د وسلو او زغروالو وسایطو لېږد د ائتلاف له اصولو سره په ټکر کې دی او د یمن د امنیت د ټینګښت پر ځای وضعیت لا خرابوي.

بیان زیاتوي، چې هر ډول ګواښ د سعودي ملي امنیت ته سره کرښه ده او ریاض به د دې ډول ګواښونو پر وړاندې اړین ګامونه واخلي.

سعودي عربستان یو ځل بیا د یمن د حاکمیت، امنیت او ثبات ملاتړ اعلان کړی.

ریاض له متحده عربي اماراتو غوښتي، چې خپل ځواکونه په ۲۴ ساعتونو کې له یمن وباسي او له هر ډول پوځي او مالي ملاتړ څخه لاس واخلي.

د امریکا د بهرنیو مرستو مرستیال جېرمي لوېن ویلي، چې متحده ایالات غواړي د ملګرو ملتونو له لارې د نړۍ په کچه د بشري مرستو لپاره ۲ میلیارد ډالره ځانګړي کړي.

نوموړي ټینګار کړی، چې دا مرستې باید په افغانستان او یمن کې ونه لګېږي.

هغه ادعا کړې، چې واشنګټن داسې شواهد لري چې ښيي په افغانستان کې د ملګرو ملتونو د مرستو یوه برخه د طالبانو حکومت ته رسېدلې ده.

جېرمي لوېن بي‌بي‌سي ته ویلي، چې دغه پیسې باید د اقلیم بدلون اړوندو پروګرامونو لپاره هم ونه کارول شي، ځکه د هغه په وینا دا د امریکا له ملي ګټو سره سمون نه لري.

هغه زیاته کړې، چې امریکا د مرستو د سم لګښت لپاره پر جدي څار او حساب‌ورکولو ټینګار کوي.

په ایران کې د اقتصادي وضعیت د خرابېدو له امله په یو شمېر ښارونو کې مظاهرې او اعتصابونه روان دي.

راپورونه وایي، د ملي اسعارو د ارزښت کمېدو، د تورم د لوړې کچې او د لومړنیو توکو د بیو د زیاتوالي خلکو ته جدي اقتصادي ستونزې پیدا کړې دي.

د رسنیو د راپورونو له مخې، د تهران د لوی بازار په ګډون په څو ښارونو کې دوکاندارانو او سوداګرو خپل کاروبارونه تړلي او د اقتصادي وضعیت پر وړاندې یې اعتراضونه کړي دي.

معترضین د حکومت پر اقتصادي پالیسۍ نیوکې کوي او د ژوند د لګښتونو د کنټرول غوښتنه لري.

ځینې راپورونه ښيي، چې په محدودو سیمو کې د امنیتي ځواکونو او مظاهره‌چیانو ترمنځ لفظي شخړې او نښتې رامنځته شوې دي، خو تر دې دمه د مرګ‌ژوبلې په اړه کره معلومات نه دي ورکړل شوي.

د ملګرو ملتونو سرمنشي انتونیو ګوترېش د ۲۰۲۶ کال په پیغام کې د جګړو د پای ته رسولو او د سولې پر ټینګښت ټینګار کړی دی.

هغه ویلي، نړۍ د یوه تاریخي پړاو پر سر ولاړه ده چې له وېش، تاوتریخوالي، اقلیم بدلون او د نړیوالو قوانینو له سرغړونو سره مخ ده.

ګوترېش ۲۰۲۵ کال «ګډوډ» بللی او ویلي یې دي، چې د نړۍ پوځي لګښتونه ۲.۷ ټریلیونه ډالرو ته رسېدلي، چې د تېر کال پرتله لس سلنه زیاتوالی ښيي.

نوموړي له نړیوالو مشرانو غوښتي، چې په نوي کال کې خپل لومړیتوبونه بدل کړي او د جګړو پر ځای د بې‌وزلۍ ضد مبارزې ته پانګونه وکړي.

د طالبانو حکومت د ۲۰۷ الفاروق قول اردو ویلي،چې ځواکونو یې د هرات په شین‌ډنډ ولسوالۍ کې د یو ۵۸۰ ډوله مسافروړونکی بس سورلۍ چې د عزیزاباد په سیمه کې د سېلاب له امله چپه شوی و ژغورلې ده.

یادې قول اردو په پیښه کې د اوښتي زیان او د مسافرو د شمیر په اړه څه نه دي ویلي.

د بنګله‌دېش لومړنۍ ښځینه لومړۍ وزیره او د ملتپال ګوند (بي‌اېن‌پي) مشره، خالده ضیا د سې‌شنبې په ورځ د اوږدې ناروغۍ له امله د ۸۰ کلونو په عمر ومړه.

نوموړې د ۱۹۹۱ تر ۱۹۹۶ او د ۲۰۰۱ تر ۲۰۰۶ کلونو پورې په دوو دورو کې د بنګله‌دېش مشري کړې وه.

خالده ضیا د شیخ حسینه سره د اوږدې او سختې سیاسي سیالۍ له امله د بنګله‌دېش په سیاست کې د «بیګمونو جګړې» د یوې مهمې څېرې په توګه پېژندل کېده.

هغې درې کاله وروسته له هغه سیاست ته مخه کړه چې مېړه یې، پخوانی ولسمشر ضیاءالرحمان، په ۱۹۸۱ کال کې ووژل شو.

که څه هم مېرمن ضیا له ۲۰۰۶ کال وروسته له واکه لرې وه او څو کاله یې په زندان او کورني بند کې تېر کړل، خو د هغې ګوند لا هم د هېواد په سیاست کې پراخ ولسي ملاتړ لري.

د خالده ضیا مړینه په داسې وخت کې شوې چې بنګله‌دېش د محمد یونس تر مشرۍ لاندې د موقت حکومت له خوا اداره کېږي او ټاکل شوې ده د فبرورۍ په میاشت کې عمومي ټاکنې ترسره شي.

د امریکا ولسمشر ډونالډ ټرمپ د اسراییل له لومړي وزیر بنیامین نتنیاهو سره خبرو کې ویلي، چې د غزې د اوربند د راتلونکو پړاوونو په اړه پرمختګونه شوي دي.

هغه نتنیاهو ته ویلي چې حماس ډله د اوربند د دویم پړاو د نه پلي کېدو اصلي خنډ دی.

ډونالډ ټرمپ یو ځل بیا د حماس د بې‌وسلې کېدو غوښتنه تکرار کړې او خبرداری یې ورکړی، چې که دا ډله له هوکړې سره سم بې‌وسلې نه شي؛ نو له سختو پایلو سره به مخ شي؛ خو د دې غبرګون څرنګوالی یې روښانه کړی نه دی.

روسیه وایي هغه ۹۱ اوکرایني اوږد واټن ډرون الوتکې یې نسکورې کړي چې غوښتل یې د دغه هېواد د ولسمشر ولادیمیر پوتین پر یو استوګنځي د برید هڅه وکړي.

د روسیې د بهرنیو چارو وزیر سرګي لاوروف ویلي، دغه بې پیلوټه الوتکې یې غورځولي او چا ته پکې زیان نه دی اوښتی.

‏روسیه خبرداری ورکړی چې دا ډول بریدونه بې ځوابه نه پریږدي.

‏دا په داسې حال کې ده چې امریکایي چارواکو ویلي وو چې د ولسمشر ټرمپ او ولسمشر پوتین د تیلیفوني مکالمې پرمهال روسیې ولسمشر خپل امریکایي سیال د دې بریدونو په اړه خبر کړی وو.

د ایران د وسله‌والو ځواکونو لوی درستیز د یوې خپرې شوې بیانیې له لارې خبرداری ورکړی، چې که د ایران د دښمنانو له لوري هر ډول تېروتنه بیا تکرار شي؛ نو تهران به تر پخوا ډېر قوي، سخت او زیان‌اړونکی ځواب ورکړي.

په دې بیانیه کې راغلي، چې سره له دې چې د دښمنانو له‌خوا ګواښونه، فشارونه او رواني جګړه روانه ده؛ خو د ایران وسله‌وال ځواکونه په بشپړه توګه چمتووالي کې دي.

بیانیه کې ویل شوي چې ځواکونه به یې هېڅکله اجازه ورنه‌کړي چې د هېواد حاکمیت، ملي امنیت او د خلکو خوندیتوب ته زیان واوړي.

دا په داسې حال کې ده چې د امریکا ولسمشر ډونالد ټرمپ د اسراییل د لومړي وزیر بنیامین نتنیاهو په حضور کې د ایران پروړاندې سخت دریځونه ښودلي او ویلي، که تهران خپل بالسټیک توغندیز یا اټومي پروګرام ته دوام ورکړي، امریکا به له پوځي اقدام څخه ملاتړ وکړي.

د کرکټ نړۍوالې شورا د ۲۰۲۵ کال د یو ورځنیو سیالیو په درجه‌بندۍ کې راشدخان د توپ‌اچوونکو او عظمت‌الله عمرزي د الراونډرانو په نوملړ کې لومړي مقامونه خپل کړي دي.

محمدنبي بیا د الراونډرانو په درجه‌بندۍ کې درېیم ځای لري.

د معلوماتو له مخې، راشدخان د ۷۱۰ نومرو په لرلو د غوره توپ‌اچوونکو په سر کې دی، چې ورپسې جافر ارچر او کولدیپ یادو راغلي دي.

همدارنګه، د الراونډرانو په نوملړ کې سکندر رضا دویم مقام لري.