د طالبانو حکومت د کورنیو چارو وزیر سراجالدین حقاني د قزاقستان د ولسمشر ځانګړي استازي یرکین توکوموف سره لیدلي او د دواړو هېوادونو ترمنځ د اقتصادي، سوداګریزو او امنیتي همکارۍ د پراختیا په اړه یې خبرې کړې دي.
توکوموف د دوهاړخیزې سوداګرۍ، اورګاډي پټلۍ او د پولو امنیت د پیاوړتیا ملاتړ څرګند کړیږ.
سراج الدین حقاني د قزاقستان له همکارۍ مننه کړې.
دواړو لورو په سیمهییزې همکارۍ، اقتصادي پروژو او امنیتي چارو کې د همغږۍ پر اهمیت هم تأکید کړی دی.
بریتانیا ویلي چې اروپايي متحدان اوکراین سره د ملاتړ د زیاتولو او پر روسیې د اقتصادي فشار د پراخولو پرېکړه کړې ده.
د لندن په وینا، د مسکو د جګړې د پای لپاره هڅې حساسې مرحلې ته رسېدلې دي.
بل لورته لنسکي د اروپايي مشرانو له لیدنو وروسته څرګنده کړې چې امریکا د جوړجاړي لټه کوي؛ خو لا هم د سیمې پېچلې مسلې د تړون خنډ دي.
ټرمپ بیا ویلي چې له زلنسکي ناامید شوی او هغه یې تورن کړی چې د امریکا په ملاتړ وروستي وړاندیزونه یې نه دي لوستي.
د انګلستان یوې محکمې دوه ۱۷ کلن افغان پناه غوښتونکي چې یو یې تازه ۱۸ کلن شوی، پر یوې ۱۵ کلنې نجلۍ د جنسي تېري په تور په اوږد حبس محکوم کړي.
د محکمې اسناد ښيي چې پېښه د ۲۰۲۵ کال د مې میاشتې پر ۱۰مه مازدیګر په ډاګم پارک (Dagham Park) کې شوې وه.
“قرباني نجلۍ له خپلو ملګرو بېله شوې وه، او یادو دوو هلکانو یې لاره ورکړه، چې یو تن یې ورسره خبرې پیل کړې او بیا یې په زور یو پټ ځای ته بوتله او هلته یې پرې جنسي تېری کړی”.
مجرمينو چې نومونه یې جهانزیب او اسرار ښودل شوي، په لومړي سر کې یې جرم رد کړی و، خو وروسته یې په محکمه کې په ګناه اقرار کړی.
د طالبانو حکومت د بهرنیو چارو وزارت د اقتصادي اړیکو رییس شفیع اعظم وایي، د پاکستان لهخوا د لارو تړل کېدو تر ټولو ستر زیان د همدې هېواد پر وړو او منځنیو کاروبارونو او د هغوی صادراتو ته رسېږي.
د ده په وینا، افغانستان د تولیداتو پر لور د ورګرځېدو له امله د پام وړ تاوان نه ویني.
هغه ویلي چې د افغانستان زیان بیا په مراتبو کم دی، ځکه د وارداتو پرځای ټولو تولید ته مخه کړه او د ستونزو مخه یې ډب کړه.
نوموړي دغه راز ویلي، چې د طبیعي سرچینو، لوی نفوس او امنیت له وجې اسیا پر اروپا بدلېدونکې ده.
بل لورته پاکستاني سوداګر شکایت کوي چې د لارو بندېدو له امله نه یوازې د افغانستان بازار له لاسه وتلی، بلکې منځنۍ اسیا ته د صادراتو لارې هم ټکنۍ شوي.
په سوډان کې یوه ښوونځي او روغتون باندې د وسله والو خونړي برید کې ۱۱۴ کسان، چې ۶۳ یې ماشومان دي، وژل شوي دي.
د نړۍ د روغتیا د سازمان مشر ټېډروس اډانوم دا برید بېرحمانه عمل بللی.
حکومتي چارواکو ددغه برید عاملین د چټک ملاتړ ځواکونه (RSF) یاد کړي دي.
د یادونې ده چې سوډان له ۲۰۲۳ راهیسې د حکومتي ځواکونو او یاغیانو ترمنځ له سختو جګړو سره مخ دی، او د ملګرو ملتونو د شمېرو له مخې تر دې دمه شاوخوا ۱۳ زره کسان پکې وژل شوي دي.
د طالبانو حکومت لوړپوړي غړي، انس حقاني د سوریې ولسمشر احمد الشرع ته د هغه د واک د ادعا شوې کلیزې په مناسبت مبارکي ورکړې ده.
حقاني د الشرع د استقامت ستاینه کړې او د سوریې لپاره یې د سولې او ثبات هیله څرګنده کړې ده.
دا څرګندونې داسې مهال کېږي چې د الشرع په اړه د سیمهییزو او نړیوالو سرچینو ترمنځ د واک، نفوذ او ادعاوو په اړه بېلابېل روایتونه شته.
ډېری افغانان بیا د طالبانو حکومت پر سیاستونو نیوکې کوي او وايي چې د افغانستان په پرتله د سوریې د پرمختګونو په اړه مطرح کېدونکې ادعاوې تضاد ښيي، ځکه د طالبانو حکومت تر څلورو کلونو واکمنۍ وروسته هم ټولشموله حکومت او بنسټیزو حقونو ته د لاسرسي زمینه نه ده برابره کړې.
د اسرائیل لومړي وزیر بنیامین نتنیاهو اعلان کړی چې د ډسمبر پر ۲۹مه به د امریکا له ولسمشر ډونالډ ټرمپ سره وګوري، څو د غزې د اوربند د دویم پړاو په اړه خبرې وکړي.
د اسرائیلي حکومت ویاند شوش بېدرسیاڼ ویلي چې په دې لیدنه کې به د اوربند د راتلونکو ګامونو، پړاوونو او د نړیوالو سوله ساتو ځواکونو د رول په اړه بحث وشي.
نتنیاهو څو ورځې مخکې ویلي وو چې د غزې جګړې د پای ته رسولو لپاره د امریکا د طرحې لومړنی پړاو بشپړ شوی او اوس به د دویم پړاو په تړاو له ټرمپ سره مستقیمې خبرې وکړي.
د اسرائیل او حماس تر منځ لنډمهالی اوربند لومړی ځل په اکتوبر کې پلی شوی و.
د طالبانو حکومت د بهرنیو چارو وزیر مولوي امیر خان متقي د افغانستان لپاره د قزاقستان د ولسمشر له ځانګړي استازي پرکین توکوموف سره په کتنه کې د دواړو هېوادونو ترمنځ د سیاسي او اقتصادي همکاریو پر پراختیا او د سیمې پر وروستي وضعیت خبرې کړې دي.
امیر خان متقي ویلي، “اسلامي امارت” د ډیپلوماسۍ، تفاهم او متقابل احترام پر بنسټ له ګاونډیو او سیمهییزو هېوادونو سره د ښو اړیکو غوښتونکی دی او له قزاقستان سره په سیاسي او اقتصادي اړیکو کې د پام وړ پرمختګ شوی دی.
بل لور ته د قزاقستان ځانګړي استازي د افغانستان دریځ ستایلی او ډاډ یې ورکړی، چې هېواد به یې په بېلابېلو برخو کې له افغانستان سره همکارۍ ته دوام ورکړي.
هغه ټینګار کړی، چې د سیمې ثبات د متقابل باور، امنیت او اقتصادي همکاریو له لارې شونی دی.
د حزب اسلامي مشر، ګلبدین حکمتیار، نن سهار د متحده عربي اماراتو دوبۍ ښار ته رسېدلی دی.
د ګلبدین حکمتیار اړوند ډېلي شهادت ورځپاڼه وایي چې نوموړی به په دوبۍ کې لنډ تم شي او له هغه وروسته به خپل سفر ته د مالیزیا په لور دوام ورکړي.
ډیلي شهادت زیاته کړې چې په دوبۍ کې مېشت افغانان له حکمتیار سره د لیدنې په تمه دي؛ خو د هغه رسمي لیدنې لا نه دي پیل شوي ځکه چې سفر یې لا روان دی.
د یادونې ده چې واک ته د طالبانو حکومت له رسیدو وروسته دا لومړی ځل دی چې ګلبدین حکمتیار ته هېواد څخه بهر ته د تلو اجازه ورکړل شوې ده.
د پاکستان د پوځ او دفاعي ځواکونو مشر جنرال سید عاصم منیر وايي چې طالبانو ته یې روښانه پیغام ورکړی چې باید د پاکستاني طالبانو او پاکستان تر منځ یو انتخاب وکړي.
هغه دا څرګندونې په راولپنډۍ کې د افسرانو په غونډه کې وکړې، چې پکې د دفاعي ځواکونو د نوې مشرۍ د رامنځته کېدو موضوع هم یاده شوه.
منیر ویلي که هند پر پاکستان د برید هڅه وکړي، له سخت او چټک ځواب سره به مخ شي.