د پاکستان د بهرنیو چارو وزارت وایي، چې ددغه هېواد مرستیال لومړي وزیر او د بهرنیو چارو وزیر محمد اسحق ډار د ایران د بهرنیو چارو وزیر سید عباس عراقچي سره خبرې کړې.

یاد وزارت ویلي، چې د خبرو په ترڅ کې دواړو مشرانو د دوه اړخیزې همکارۍ په بېلابېلو برخو بحث کړی او د سیمه‌ییزو پرمختګونو په اړه یې خپل نظرونه شریک کړي دي.

د وزارت په خبره، دواړو لوریو د سوداګرۍ او د خلکو ترمنځ د اړیکو د پراختیا لپاره د همکارۍ ژمنه کړې او ټینګار یې کړی چې د سیمه‌ییزې سولې او پرمختګ لپاره به نږدې همکاري دوامداره وي.

د پاکستان د بهرنیو چارو وزارت وايي چې دا خبرې د دواړو هېوادونو د اړیکو د لا پیاوړتیا او د سیمه‌ییزې سولې د ټینګښت لپاره مهم ګام ګڼل کېږي.

له ایران سره د افغانستان پولې ته څېرمه د سختې یخنۍ له امله تر اوسه د ۴۰ څخه د زیاتو افغان کډوالو مړي را ایستل شوي دي.

ځایي سرچینو ویلي، یاد کډوال ایران ته د ناقانونه تګ پر مهال د شدیدې یخنۍ له امله کنګل شوي او خپل ژوند یې له لاسه ورکړی دی.

سرچینې زیاتوي چې تر دې مخکې د شاوخوا ۳۰ کسانو د مړینې راپورونه خپاره شوي وو؛ خو تازه معلومات، د سرحدي سیمو څېړنې او په افغانستان او ایران کې د مرده خانو لیدنې ښيي چې د قربانیانو شمېر له ۴۰ اوښتی دی.

د راپور له مخې، یو شمېر مړي د افغانستان د هرات ولایت کوهسان او ادرسکن ولسوالیو ته لېږدول شوي دي.

د طالبانو حکومت وایي، چې د هلمند ولایت د بهرامچې ولسوالۍ اړوند د رباط او کیاخان په سیمو کې یې په تېره یوه اوونۍ کې له پاکستان څخه د قاچاق مخه نیولې ده.

د راپور له مخې، ټولټال ۲۳۸ موټره بې‌کیفیته درمل، کیمیاوي مواد، ډبرو سکاره، تېل، مالټې، مڼې، د ماهیانو غوښه، چاکلیټ او نور خوراکي او غیر خوراکي توکي چې له پاکستانه قاچاق شوي وو، نیول شوي دي.

د ۲۱۵ عزم قول اردو ویاند صدیق الله حفاظت ویلي، د نیول شویو توکو له ډلې څخه ۱۶ موټر درمل په احتیاطي توګه وسوځول شول، تر څو د خلکو د صحت او امنیت لپاره خطر کم شي.

یو شمېر افغانانو شکایت کړی چې د اسلام‌اباد په هوایي ډګر کې، سره له دې چې قانوني ویزې او بشپړ اسناد یې لرل، د کابل پر لور د سفر اجازه نه ده ورکړل شوې او الوتنه یې لغوه شوې ده.

د راپورونو له مخې، هر مسافر شاوخوا ۵۸ زره پاکستانۍ کلدارې مالي زیان لیدلی.

پاکستاني خبریال طاهر خان ویلي، چې لږ تر لږه ۳۲ افغان مسافرو د کام‌ایر الوتکې ته د ختلو اجازه نه ده ترلاسه کړې.

نوموړي د پاکستان له چارواکو غوښتي چې دا موضوع وڅېړي.

دا ستونزه په داسې حال کې رامنځته شوې چې د افغانستان او پاکستان ځمکنۍ لارې تړلې دي او افغانان یوازې د هوایي لارې له سختو محدودیتونو سره تګ راتګ کولی شي.

د بالیووډ مشهوره نڅاګره او اداکاره نورا فتحي په ممبۍ کې د ترافیکي پېښې له امله روغتون ته لېږدول شوې ده.

د هندي رسنیو د راپورونو له مخې، دغه پېښه هغه مهال رامنځته شوه چې نوموړې د امریکايي ډي‌جي ډیوډ ګیټا د کنسرت لپاره روانه وه.

راپورونه وایي، یو نشه‌یي موټرچلوونکي د نورا فتحي له موټر سره ټکر وکړ چې له امله یې موټر ته زیان واوښت

د پېښې وروسته د نورا ټیم هغه ژر تر ژره نږدې روغتون ته ولېږدوله او ډاکټرانو تایید کړې چې نورا فتحي ته د ټکر له امله لږ دماغي شاک رسېدلی، خو روغتیايي حالت یې د اندېښنې وړ نه دی.

رویټرز خبر ورکړی چې د ټسلا او سپيس ایکس شرکتونو بنسټګر ایلن ماسک د نړۍ لومړی کس شو چې شتمني یې ۷۴۹ میلیارده ډالرو ته رسېدلې ده.

د راپور له مخې، د ایلن ماسک شتمني هغه مهال په بې‌ساري ډول لوړه شوه چې د امریکا د ډیلاور ایالت یوې محکمې خپله تېرکال پرېکړه بېرته واخیسته؛ هغه پرېکړه چې د ۱۳۹ میلیارده ډالرو په ارزښت د ټسلا یوه ستره معامله یې رد کړې وه.

محکمې ویلي چې د یادې پرېکړې لغوه کول د دې لپاره شوي چې پخوانۍ فیصله ناعادلانه بلل شوې وه.

د دې حقوقي بدلون له امله د ټسلا د ونډې ارزښت لوړ شوی او د ایلن ماسک پر شتمنۍ یې مستقیم اغېز کړی دی.

په مزارشریف ښار کې د ۷۴۳ میلیونه افغانیو په لګښت د سوداګریز مارکېټ د پرانیستې په مراسمو کې، د طالبانو حکومت ړ ریاست‌الوزرا اقتصادي مرستیال ملا عبدالغني برادر له نړۍ وغوښتل چې د تحریمونو پر ځای له «اسلامي امارت سره خپلې اقتصادي اړیکې پراخې کړي.

نوموړي وویل، یو باثباته افغانستان د سیمې او نړۍ اقتصادي هوساینې ته ګټه رسوي.

په ورته وخت کې د بلخ والي ملا محمد یوسف وفا وویل، دا پروژه به سلګونو کسانو ته د کار زمینه برابره کړي.

یاد اته‌پوړیز مارکېټ ۸۷۰ دوکانونه لري، په دوو کلونو کې به بشپړ شي او هر کال به ۴۳ میلیونه افغانۍ د اجارې له لارې عاید ولري.

د کابل په مرکزي برخه کې ارګ ماڼۍ ته څېرمه تاریخي اریانا سینما نړول شوې ده.

د راپورونو له مخې، د یادې سینما پر ځای به یوه عصري سوداګریزه ودانۍ یا شاپنګ پلازه جوړه شي.

اریانا سینما چې په ۱۹۶۰ لسیزه کې جوړه شوې وه، د کابل له مهمو کلتوري نښو څخه ګڼل کېده او د دې نړېدل د فرهنګي فعالانو او د ښار د یو شمېر اوسېدونکو له پراخو غبرګونونو سره مخ شوي دي.

ډېری کسان دا کار د افغانستان د کلتوري میراث لپاره خواشینوونکی بولي.

د یادونې ده چې په ۲۰۲۱ کال کې د ط..البانو حکومت له واک ته رسېدو وروسته، د نورو سینماوو په څېر په اریانا سینما کې هم د فلمونو نندارې بندې شوې وې؛ خو د دې ودانۍ تاریخي او کلتوري ارزښت د خلکو لپاره ځانګړی اهمیت درلود.

افغانه فلم جوړوونکې او د هرات ښځو نړیوال فلمي فېسټوال بنسټ اېښودونکې رویا سادات وايي، د اریانا سینما د نړېدو خبر اورېدل دردوونکی او ټکان ورکوونکی دی او دا پېښه د هېواد د فرهنګي هویت لپاره ستره ضایعه بلل کېږي.

د طالبانو حکومت استخباراتي رسنۍ المرصاد راپور ورکړی چې د داعش «خوارجو» د خراسان څانګې د مطبوعاتو مسؤل سلطان عزیز عزام د پاکستاني رسنیو د ادعا خلاف، د داعش د داخلي اختلافاتو قرباني شوی دی.

المرصاد د خپلو سرچینو له قوله ویلي، د خراسان څانګې والي شهاب المهاجر له لوري د پخوانیو مشرقیوالو داعشیانو له ګوښه کېدو وروسته ژور اختلافات رامنځته شول او یو شمېر ناراضه غړي آی‌اېس‌آی ته وتښتېدل.

المرصاد زیاته کړې چې سلطان عزیز عزام د همدې اختلافاتو د حل په پلمه د منځګړي په توګه پاکستان ته واستول شو؛ خو هلته د پاکستاني استخباراتو له لوري د نیولو اعلان پرې وشو.

المرصاد ویلي، سلطان عزیز عزام د داعش د تبلیغاتي شبکې «العزائم» له مهمو څېرو څخه و او د داعش مرکزي رهبرۍ ته نږدې کس بلل کېده.

د المرصاد په خبره، نوموړي شاوخوا لس کاله وړاندې له داعش سره یوځای شوی و او تر هغه مخکې یې د پرځېدلي جمهوري نظام په انتخاباتي کمېسیون او رسنیو کې کار کړی و.

یو شمېر افغان خبریالانو د فرانسې په پاریس ښار کې د اعتراضي غونډې له لارې پر فرانسې غږ کړی چې په ایران او پاکستان کې مېشتو افغان خبریالانو ته د بشردوستانه ویزو د ورکړې بهیر ګړندی کړي.

د دغې غونډې ګډونوالو ویلي، د ویزو په بهیر کې اوږده ځنډونه د دې لامل شوي چې ګڼ افغان خبریالان له سختو امنیتي او اقتصادي ستونزو سره مخ شي.

د غونډې د تنظیموونکو په وینا، افغان خبریالان په ایران او پاکستان کې له نامعلوم راتلونکي، د نیول کېدو له احتمالي ګواښونو او د کار د نشتون له جدي ستونزو سره لاس او ګرېوان دي.

دوی له فرانسې غوښتي چې د یادو خبریالانو د خوندیتوب لپاره بېړني او عملي ګامونه پورته کړي او هغوی ته د خوندي مېشتېدو زمینه برابره کړي.