د پاکستان لومړي وزیر شهباز شریف یو ځل بیا د پاکستان تحریک انصاف ګوند ته د خبرو اترو بلنه ورکړې ده.
هغه د کابینې غونډې ته ویلي چې د هېواد د پرمختګ او سوکالۍ لپاره د سیاسي ګوندونو ترمنځ همغږي اړینه ده.
شهباز شریف ټینګار کړی چې مذاکرات به یوازې د مشروع غوښتنو پر بنسټ ترسره کېږي او حکومت د سیاسي جوړجاړي لپاره هر ډول هڅو ته چمتو دی.
د طالبانو حکومت وایي، د جوزجان ولایت قوشتېپې او درزاب ولسوالیو ته د برېښنا رسونې پروژې تړون لاسلیک شو.
د طالبانو حکومت مرستیال ویاند حمدالله فطرت ویلي، چې دا تړون نن د ریاستالوزراء د اقتصادي مرستیال ملا عبدالغني برادر اخوند په حضور کې د اوبو او انرژۍ وزارت او یوه خصوصي شرکت ترمنځ لاسلیک شو.
د فطرت په خبره، د یادې پروژې لګښت شاوخوا یو میلیارد او ۸۸۶ میلیونه افغانۍ اټکل شوی او چارې به یې په درېیو کلونو کې بشپړې شي.
نوموړي ویلي، چې په دې پروژه کې د ۸۵.۲۴ کیلومترو په اوږدوالي د ۲۲۰ کیلوولټ برېښنا مزي غځول، په قوشتېپې او درزاب ولسوالیو کې د دوو سبسټېشنونو او دوو توزیعي شبکو جوړول شامل دي.
هغه دغه راز ویلي، چې د پروژې له بشپړېدو سره به زرګونه کورنۍ له برېښنا برخمنې شي.
د پاکستان د جمعیت علمای اسلام ګوند له خوا یوې غونډې کې د طالبانو حکومت پر هغو محدودیتونو انتقاد شوی چې د نجونو د زدهکړو مخه نیسي.
د مولانا فضلالرحمن په مشرۍ د علماوو په ګډه اعلامیه کې ویل شوي چې د نجونو له زدهکړو منع کول په اسلام کې هیڅ توجیه نه لري.
علماوو د طالبانو له حکومت غوښتي چې ښوونځي او نهادونه سمدستي د نجونو پر مخ پرانیزي، ځکه زدهکړه د نارینهوو او ښځو دواړو لپاره یوه دیني فریضه ده او د نجونو د زدهکړو محدودیتونه افغانستان او راتلونکو نسلونو ته زیان رسوي.
د خیبر پښتونخوا د کرک ولسوالۍ په ګُرګُري سیمه کې د وسلهوالو په برید کې څلور پولیس سرتېري وژل شوي دي.
سرچینو ویلي، یاد پولیس د تېلو او ګازو د کمپنۍ د امنیت پر دنده بوخت وو چې ناڅاپي برید پرې شوی او د برید پر مهال د پولیسو موټر هم اور اخیستی او په بشپړه توګه سوځېدلی.
دا پېښه په داسې حال کې رامنځته کېږي چې دوه ورځې وړاندې همدې سیمې ته نږدې د طالبانو یو ځایي قومندان، چې کلیم نومېده، په یوه هدفي برید کې وژل شوی و.
تر دې دمه کومې ډلې د برید پړه پر غاړه نه ده اخیستې.
د پاکستان د جمعیت علمای اسلام ګوند مشر مولانا فضلالرحمن د علماوو په یوې غونډه کې له افغانستان او پاکستان غوښتي چې خپلې ستونزې د خبرو او دیپلوماتیکو لارو حل کړي.
د غونډې په ګډه اعلامیه کې د دواړو هېوادونو ترمنځ د اړیکو د خراب وضعیت په اړه اندېښنه څرګنده شوې او پر دې ټینګار شوی چې ښه ګاونډیتوب، د یو بل د حاکمیت درناوی او د سولې هڅې باید د دوهاړخیزو اړیکو او سوداګرۍ د پراختیا لپاره وشي.
د ههنګاو بشري حقونو سازمان ویلي چې په ایران کې د ښځو وژنې زیاتې شوې دي.
د راپور له مخې، په روان کال کې لږ تر لږه ۲۰۳ د ښځو د وژنې پېښې ثبت شوې دي.
دغه سازمان زیاتوي چې د ښځو ضد قوانین، نرواکه ټولنه او ناموسي دودونه ددې لامل شوي چې ګڼې پېښې له رسمي شمېرې پټې پاتې شي.
همداراز، د هرانا د معلوماتو له مخې، په ۱۴۰۳ کال کې زرګونه د کورني تاوتریخوالي او د بدحجابي په نوم د ښځو پر وړاندې د تاوتریخوالي پېښې هم ثبت شوې دي.
رویټرز راپور ورکړی چې پاکستان د لیبیا له ملي پوځ سره د څه باندې ۴ میلیارده ډالرو په ارزښت د وسلو د پېر هوکړه کړې ده.
د راپور له مخې، دا هوکړه د بنغازي ښار کې د پاکستان د پوځ د لوی درستیز عاصم منیر او د لیبیا د ملي اردو د قومندان صدام خلیفه حفتر ترمنځ شوې ده.
که څه هم د لیبیا ملي پوځ دا هوکړه تایید کړې؛ خو د پاکستان حکومت تر اوسه په رسمي ډول څه نه دي ویلي.
دا په داسې حال کې ده چې ملګرو ملتونو پر لیبیا د امنیتي بې ثباتیو او کورنیو جګړو د مخنیوي لپاره د وسلو د پېر بندیز لګولی او د پاکستان دا هوکړه ښايي نړیوال غبرګونونه را وپاروي.
د امریکا ولسمشر ډونالډ ټرمپ شاوخوا ۳۰ لوړپوړي امریکایي ډیپلوماټان له بېلابېلو هېوادونو واشنګټن ته وربللي دي.
د رویټرز د راپور له مخې، ټرمپ غواړي دا وڅېړي چې ایا د امریکا سفارتونه د هغه د «لومړی امریکا» سیاست ته ژمن دي که نه.
منتقدین خبرداری ورکوي چې دا اقدام ښايي د نړیوالو په کچه د امریکا پر باور منفي اغېز ولري.
ویل کېږي، دغو ډیپلوماټانو ته د بهرنیو چارو وزارت کې د نوو دندو ژمنه هم شوې ده.
د طالبانو حکومت د عامې روغتیا وزیر نور جلال جلالي په نوي ډیلي کې د خپل سفر پر مهال د هند له چارواکو سره د افغانستان د درملو د اوږدمهاله اړتیاوو د پوره کولو هوکړه کړې ده.
د هند او د طالبانو د حکومت ترمنځ به د روغتیايي همکاریو لپاره ګډه کاري ډله هم جوړه شي.
جلالي د هند له لږ تر لږه لسو روغتونونو او بنسټونو لیدنه کړې او د روغتیايي پروژو، د سرطان د درملنې مرکزونو د جوړولو او د افغان ډاکترانو د ظرفیت لوړولو لپاره د هندي ډاکترانو د ټیم د لېږلو پر موضوع خبرې شوې دي.
د طالبانو حکومت چارواکي وايي، له پاکستان سره کړکېچونو افغانستان اړ کړی چې د درملو د کمښت د جبران لپاره هند ته مخه کړي او په روغتیايي همکاریو کې د نوې لارې پرانیستل یې هدف دی.
د سره صلیب نړیوالې کمېټې خبرداری ورکړی، چې په ۲۰۲۵ کال کې نږدې ۲۳ میلیونه افغانان د بشري مرستو محتاج وو.
د یادې ادارې په وینا، د کار نشتون، د عایداتو کمېدل او روغتیايي خدمتونو ته محدود لاسرسي د خلکو د ژوند شرایط سخت کړي دي.
راپور څرګندوي، چې د طبیعي آفتونو دوام، اقلیمي بدلونونه او افغانستان ته د کډوالو بېرته ستنېدل د بشري اړتیاوو کچه لوړه کړې ده.
همدارنګه زلزلو، وچکالۍ او سېلابونو کرنیز حاصلات او بنسټیزې زېربناوې زیانمنې کړې دي.
سره صلیب ویلي، اقتصادي بېثباتي، بېځایه کېدل، بندیزونه او د نړیوالو مرستو کمېدل د هېواد بشري وضعیت لا بحراني کړی.
دغه بنسټ د ژمي له پیلېدو سره د بېوزلو افغانانو د ملاتړ لپاره د عاجلو مرستو غوښتنه کړې.