د امریکا د بهرنیو چارو وزارت د ایران د محصلانو د اعتراضونو په اړه په یوه اعلامیه کې ویلي چې د ایران راتلونکی د دې هېواد د ځوانانو دی.

د امریکا د بهرنیو چارو وزارت فارسي پاڼې پر ټولنیزه شبکه اېکس لیکلي، د ایران په بېلابېلو پوهنتونونو کې محصلان خپل بنسټیز حقونه غواړي، سره له دې چې امنیتي ځواکونه په دوامداره ډول له ګواښ او تاوتریخوالي څخه کار اخلي.

په اعلامیه کې ویل شوي، دغه محصلان د ایران د ټولنې له تر ټولو لوستو او بااستعداده کسانو څخه دي، خو د ایران د حکومت د ناکامو تګلارو او د خلکو اساسي حقونو ته د نه پاملرنې له امله، د یوه ښه او مناسب ژوند د جوړولو له فرصت څخه بې‌برخې پاتې دي.

د پاکستان فدرالي وزیر طارق فضل چودري د پاکستان تحریک انصاف ته د مذاکراتو بلنه ورکړې ده.

نوموړي ویلي، چې د جنورۍ په ۱۲مه د قومي اسمبلۍ غونډه ده او که تحریک انصاف جدي وړاندیزونه لري؛ نو د اسمبلۍ دفتر ته دې ورشي.

چودري زیاته کړې، چې هغه د فواد چودري، عمران اسماعیل او د تحریک انصاف له نورو پخوانیو مشرانو سره خبرو ته هم چمتو دی؛ خو ټینګار یې کړی چې دغه کسان باید د ګوند رسمي واک او اجازه ولري.

بل لور ته، د تحریک انصاف مشر مینا خان آفریدي ویلي، چې د ګوند بنسټګر عمران خان د مذاکراتو واک محمود خان اڅکزي او علامه راجا ناصر عباس ته ورکړی دی او که حکومت رښتیا هم جدي وي؛ نو باید له همدغو کسانو سره خبرې وکړي.

ایراف ته سرچینو ویلي، چې په تهران کې د افغان پوځي قومندان اکرام‌الدین سریع د ترور په تړاو یو شمېر کسان نیول شوي دي.

نوموړی تېره اوونۍ له یوه بل افغان سره یو ځای د تهران د ولیعصر ښارګوټي په سیمه کې په وسله‌وال برید کې وژل شوی و.

د راپور له مخې، نامعلومو کسانو پر هغه موټر ډزې کړې وې چې اکرام‌الدین سریع او د افغانستان د پولیسو پخوانی قومندان محمدامین الماس پکې سپاره وو.

الماس ځای په ځای وژل شوی و او جنرال سریع بیا په روغتون کې د ټپونو له امله ساه ورکړې ده.

د ایران د بهرنیو چارو وزارت دغه برید په کلکو ټکو غندلی او ویلي یې دي، چې د دې پېښې څېړنې روانې دي.

تر اوسه کومې ډلې د برید مسوولیت نه دی منلی؛ خو د طالبانو حکومت مخالفینو دغه ډله د برید مسووله بللې ده.

د ایران د بهرنیو چارو وزیر عباس عراقچي وایي، د امریکا او لوېدیځ په سیاسي کړیو کې ورو ورو دا درک پیاوړی کېږي چې اسرائیل نور متحد نه، بلکې د واشنګټن لپاره یو دروند بار ګرځېدلی دی.

عراقچي په ګارډین ورځپاڼه کې په خپره شوې مقاله کې ویلي، د جون وروستیو پېښو وښودله چې د ایران کورني توغندیز ځواک د اسرائیلو هوايي حریم زیان‌من کړی، خو لوېدیځو رسنیو دا حقیقت له نړیوالو پټ ساتلی دی.

نوموړي ټینګار کړی چې د ایران وسله‌وال ځواکونه د هر ډول احتمالي برید پر وړاندې بشپړ چمتو دي او که اړتیا پېښه شي، ځواب به «ډېر سخت» وي؛ هغه څرګندونه چې د ده په وینا، پخپله د امریکا ولسمشر ډونالډ ټرمپ هم ورباندې اعتراف کړی دی.

د ایران د بهرنیو چارو وزیر زیاته کړې چې تهران جګړه نه غواړي، خو له جګړې نه هم وېره نه لري او که د ایران زغم نه وای، نو د امریکا پوځي اډې به خوندي پاتې شوې نه وای.

هغه واشنګټن ته دوه لارې وړاندې کړې: یا به د اسرائیلو پر جوړو شوو روایتونو تکیه کوي، او یا به د واقع‌بینۍ، ډیپلوماسۍ او متقابل درناوي لاره غوره کوي.

د انګلستان د مرسي‌سایډ پولیسو یو ۲۰ کلن افغان تبعه وروسته له هغه نیولی چې د یو روغتون په انتظارخونه کې یې د اوسپنې په یوه ټوټه پنځه کسان ټپیان کړي دي.

پولیس وایي، پېښه تېره ورځ له غرمې وروسته شاوخوا ۱۲ بجې د مرسي‌سایډ په نیوټن لي وېلوز ښار کې د نیوټن په ټولنیز روغتون کې شوې ده.

د پولیسو په وینا، پېښه هغه مهال رامنځته شوه چې نوموړي د روغتون له ادارې د ملاقات غوښتنه وکړه؛ خو د غوښتنې له رد کېدو وروسته یې پر حاضرو کسانو برید وکړ.

د چارواکو په وینا، ټپیان روغتون ته لېږدول شوي او روغتیايي وضعیت یې د ډاډ وړ دی.

ویل کېږي چې بریدګر د قصدي ټپي کولو، ګډوډۍ او عامه شتمنۍ ته د زیان اړولو په تور تر پوښتنو لاندې دی.

سعودي عربستان اعلان کړی چې د ملي امنیت پر وړاندې د رامنځته کېدونکو ګواښونو د مهار لپاره به له ټولو شته امکاناتو کار واخلي.

دا پرېکړه د یمن د روان وضعیت په رڼا کې د سعودي عربستان د پاچا سلمان بن عبدالعزیز په مشرۍ د کابینې په غونډه کې وشوه.

د عرب رسنیو د راپورونو له مخې، د غونډې تر پای وروسته د سعودي د اطلاعاتو وزیر سلمان بن یوسف په خپره شوي اعلامیه کې ویلي، ریاض د خپل ملي امنیت د خوندي کولو لپاره هر ډول لازم ګام پورته کولو ته چمتو دی.

همدارنګه، کابینې د حضرموت او المهره ولایتونو کې د عربي ائتلاف اقدامات ستایلي او ټینګار یې کړی چې سعودي عرب په یمن کې د کړکېچ د کمولو لپاره د عربي ائتلاف د هڅې ملاتړ کوي.

په اعلامیه کې دا هم ویل شوي چې کابینې د یمن د قانوني حکومت له غوښتنې سره سم د اماراتي ځواکونو د وتلو ملاتړ کړی او هیله یې ښودلې چې متحده عربي امارات به پر دې پرېکړه عمل وکړي.

د کډوالۍ نړیوال سازمان (IOM) ویلي، افغانستان هر کال له پرلپسې طبیعي پېښو سره مخ دی او اقلیمي بدلون د دغو پېښو د شدت او پراخوالي لامل شوی دی.

د یاد بنسټ د راپور له مخې، په ۲۰۲۵ کال کې په ټول افغانستان کې ۲۷ زره او ۶۷۹ طبیعي پېښو ځپلو کورنیو ته بېړنۍ مرستې رسېدلې دي.

په دغو مرستو کې ژمنۍ جامې، غیرخوراکي توکي، نغدي مرستې، خیمې، د اوسېدو ملاتړ، پاکې اوبه او روغتیايي خدمات شامل دي.

دغې ادارې ټینګار کړی، چې دا شمېرې په افغانستان کې د بشري مرستو د زیاتېدونکې اړتیا څرګندونه کوي.

د ټرانسپورټ او هوایي چلند وزارت د هوا پېژندنې ریاست د هېواد په ۲۶ ولایتونو کې د واورې، باران او تېزو بادونو خبر ورکړی.

د یاد ریاست په خپره شوې خبرپاڼه کې ویل شوي، چې په هرات، فراه، کندهار، هلمند، زابل، غور، بادغیس، بامیان، غزني، پکتیکا، پکتیا، میدان‌وردګ، لوګر، بدخشان، تخار، سمنګان، بلخ، ننګرهار، لغمان، کونړ، کابل، پروان، بغلان، پنجشېر، کاپیسا او نورستان ولایتونو کې د باران او واورې اندازه له ۱۰ تر ۲۵ ملي‌مترو پورې رسیږي.

همدارنګه، په سویلي ولایتونو کې د نسبتاً تېزو بادونو د پېښېدو خبرداری هم ورکړل شوی دی.

د وزارت له خوا سپارښتنه شوې چې خلک د ناوړه هوا پر مهال د سفرونو او بهر تګ پر مهال احتیاط وکړي.

د خیبر پښتونخوا ملي عوامي ګوند مشر محمود خان اڅکزي ویلي، چې دا مهال افغانستان د پاکستان په پرتله ډېر امن دی او د سیمې د ثبات په برخه کې باید واقعیتونه ومنل شي.

هغه ټینګار کړی، چې پاکستان هېڅ حق نه لري پر افغانانو خپلې غوښتنې وتپي او یا د هغوی پر کورنیو چارو کې مداخله وکړي.

محمود خان اڅکزي دغه څرګندونې په یوه سیاسي غونډه کې وکړې او زیاته یې کړه، چې افغانستان یو خپلواک هېواد دی او ولس یې حق لري خپل برخلیک په خپله وټاکي.

د هغه په وینا، د زور، فشار او ګواښونو سیاست نه یوازې ستونزې نه حلوي، بلکې وضعیت لا پېچلی کوي.

اڅکزي ویلي، چې د پاکستان دننه د ناامنۍ، بمي بریدونو او هدفي وژنو کچه لوړه شوې، په داسې حال کې چې په افغانستان کې نسبي امنیت ټینګ شوی دی.

هغه زیاته کړې، چې د دواړو هېوادونو ترمنځ د ستونزو د حل یوازینۍ لار خبرې، متقابل درناوی او د نړیوالو اصولو پابندي ده.

نوموړي همدارنګه له پاکستاني چارواکو وغوښتل چې د افغان کډوالو په اړه انساني چلند وکړي او د هغوی پر وړاندې له زور او فشار څخه کار وانخلي.

د بالیووډ مشهور اداکار سنی دیول د خپل پلار، دهرمیندر، د وروستي فلم «ایک کس» د پوسټر لیدو پر مهال جذباتي شوی.

سنی دیول او بوبی دیول د خپل پلار د یادونې په مراسمو کې ګډون کړی و، چې پکې سلمان خان او نور اداکاران هم موجود وو.

سنی دیول د پلار پوسټر ته په کتو احساساتي شو او له رسنیو سره خبرو کې یې وویل: «زه د پاپا ترڅنګ دریږم.»

د یادونې ده چې د سنی دیول پلار دهرمیندر تېره میاشت د ۸۹ کلنۍ په عمر کې ومړ.