د اسرائیلو لومړي وزیر بنیامین نتانیاهو ویلي، ایران د داسې پړاو پر لور روان دی چې ولس یې د خپل راتلونکي په اړه پرېکړه پخپله کوي.

نوموړي دا څرګندونې د اکونومیست مجلې سره په مرکه کې کړې دي او ټینګار یې کړی چې سیاسي بدلونونه هغه مهال پایښت مومي چې له کورني حرکت څخه راولاړ شي، او بهرنی فشار په یوازې ځان د ژور بدلون سبب نه ګرځي.

د هغه په وینا، د ایران وضعیت باید د همدې اصل له مخې وڅېړل شي.

د ایران پر ضد د پوځي اقدام د امکان په اړه، د اسرائیلو لومړي وزیر خبرداری ورکړ چې که تهران پر اسرائیلو برید وکړي، نو سخت او نه جبرانېدونکي عواقب به ولري.

نتانیاهو زیاته کړه چې د راتلونکو ګامونو په اړه پرېکړه به تر ډېره د ایران د کورنیو حالاتو او روانو بدلونونو پورې تړلې وي، هغه څه چې د سیمې امنیتي معادلې هم اغېزمنولی شي.

‏د ایران په بېلابېلو ښارونو کې د پراخو اعتراضونو له دوام سره سم، د دغه هېواد پوځ اعلان کړی چې د عامه شتمنیو او مهمو زیربناوو ساتنه به کوي.

د ایران پوځ په یوه رسمي اعلامیه کې ویلي چې امنیتي ځواکونه به د هېواد د عامه تأسیساتو د خوندي کولو لپاره په مېدان کې وي.

دا اعلان وروسته له هغې خپور شو چې د امریکا متحده ایالاتو په ښکاره ډول د ایراني معترضانو د ملاتړ اعلان وکړ.

د ایران د اخوندي نظام کلک مخالف او د پخواني پاچا زوی، رضا پهلوي اعلان کړی چې د “اسلامي جمهوریت” پر ضد مبارزه نوې او پرېکنده پړاو ته داخل شوې او دی ایران ته د بېرته ستنېدو لپاره عملي چمتووالی نیسي.

رضا پهلوي ویلي چې وروستي پراخ ولسي اعتراضونه د نظام پر بنسټونو مستقیم فشار زیات کړی او اوس وخت رارسېدلی چې ولسي پاڅون له بې نظمه لاریونونو منظم او هدفمند حرکت ته واوړي.

هغه له معترضانو غوښتي چې د ښارونو مرکزي او مهمې سیمې تر ولسي کنټرول لاندې راولي.

نوموړي د ایران د خلکو دوامدار حضور د اخوندي نظام لپاره «سیاسي زلزله» بللې او ویلي یې دي چې دا اعتراضونه د رهبرۍ د ګواښونو پر وړاندې د ولس ښکاره او قاطع ځواب دی.

د ده په وینا، د ولسي پاڅون انځورونه تر لوړو حکومتي کړیو رسېدلي او د نظام دننه یې ویره او ګډوډي زیاته کړې ده.

رضا پهلوي ټینګار کړی چې د اخوندي نظام د پای ته رسېدو شېبې رانږدې شوي او دی غواړي د بدلون په تاریخي شېبو کې د ایران د ولس تر څنګ په تهران کې حاضر وي.

د ایران د بهرنیو چارو وزیر عباس عراقچي د المنار خبري شبکې سره په مرکه کې ویلي، که څه هم ایران د بندیزونو او ځینو اقتصادي کمزوريو له امله له ستونزو سره مخ دی؛ خو په ټوله کې د هېواد وضعیت ښه دی.

نوموړي ټینګار کړی چې روان شرایط د کنټرول وړ دي.

عراقچي زیاته کړې، امریکا او اسرائیل هڅه وکړه د چې ۱۲ ورځنۍ جګړې پر مهال هغه سناریو په ایران کې تکرار کړي چې پخوا یې په وینزویلا کې عملي کړې وه؛ خو د هغه په وینا، دغه هڅې ناکامې شوې او خپلو موخو ته ونه رسېدې.

‏د طالبانو حکومت د اطلاعاتو او کلتور وزارت ویلي، د لوګر ولایت په یو شمېر ولسوالیو کې ۲۷ تاریخي سیمې له ارزونې وروسته د هېواد د ثبت شوو فرهنګي آثارو په نوملړ کې شاملې شوې دي.

د وزارت په وینا، دا سیمې د لرغون‌پېژندنې د مسلکي ټیم د سروې پر مهال تشخیص شوې او د فرهنګي میراث د ساتنې په موخه ثبت شوې دي.

د پاکستان د بهرنیو چارو وزارت خپلو اتباعو ته خبرداری ورکړی چې د ایران د پراخو لاریونونو له امله تر بلې خبرتیا پورې دې ایران ته غیر ضروري سفرونه وځنډوي.

وزارت ویلي، د اوسني امنیتي وضعیت له کبله دا اقدام د وګړو د خوندیتوب لپاره ضروري دی او د اړتیا په صورت کې به نورې سپارښتنې هم ورکړل شي.

د امریکا د بهرنیو چارو وزیر مارکو روبیو ویلي، متحده ایالات د ایران د زړورو خلکو ملاتړ کوي.

نوموړي دا څرګندونې په ټولنیزه شبکه «ایکس» کې کړې دي.

تر دې وړاندې د امریکا ولسمشر ډونالډ ټرمپ د ایران د روانو اعتراضونو په اړه ویلي وو چې خلک په ځینو ښارونو کې د وضعیت کنټرول په لاس کې اخلي.

هغه ټینګار کړی چې ایران د خلکو پر وړاندې د خپل چلند بیه ورکوي.

ټرمپ خبرداری ورکړی چې که د ایران حکومت د خلکو وژنه پیل کړي، امریکا به اقدام وکړي او په وینا یې، داسې سخت ګوزار به وکړي چې د تهران لپاره به تر ټولو ډېر دردناک وي او د رژیم حساسو نقطو ته به سخت زیان ورسوي.

هندي رسنۍ وایي، چې د طالبانو حکومت نور احمد نور د هند په نوي ډهلي کې د افغانستان د سفارت د سرپرست په توګه ټاکلی دی.

د راپور له مخې، نوموړی چې پخوا د بهرنیو چارو وزارت د سیاسي ریاست مسوول و، نوي ډهلي ته رسېدلی او دنده یې پیل کړې ده.

دا ګام د کابل او نوي ډهلي ترمنځ د وروستیو ډیپلوماتیکو اړیکو په دوام کې اخیستل شوی دی.

د افغان سولې لپاره د امریکا پخواني ځانګړي استازي زلمي خلیلزاد ویلي، ولسمشر ډونالډ ټرمپ دوه ځله د ایران مشرانو ته څرګند پیغام استولی او هغوی ته یې د بدلون غوښتونکو پر وړاندې د وژونکي ځواک د کارولو پر وړاندې خبرداری ورکړی دی.

نوموړي ویلي، د دې پیغام د ایران د ولس له لوري هرکلی شوی او خلکو ته یې د خپلو حقونو د مبارزې لپاره هڅونه ورکړې ده.

خلیلزاد خبرداری ورکړی چې ځینې خلک د ۱۹۵۶ کال د هنګري او د ۱۹۹۱–۹۲ کلونو د عراق د پېښو تکرار ته اندېښمن دي؛ هغه مهال چې د امریکا مثبتو څرګندونو عملي اقدام ونه درلود او پراخ تاوتریخوالی وشو.

د هغه په وینا، د ایران مذهبي مشر علي خامنه‌يي ښايي فکر وکړي چې ټرمپ یوازې ګواښ کوي؛ خو دا به ستره تېروتنه وي.

زلمي خلیلزاد د امریکا د بهرنیو چارو د وزیر مارکو روبیو له قوله ویلي، ولسمشر ټرمپ لوبې نه کوي، هغه چې څه وايي، پر هغه ولاړ وي.

نوموړي د ایران مذهبي مشرانو ته خبرداری ورکړی چې د ټرمپ د سختو څرګندونو جدي مانا درک کړي.

هغه همداراز د عراق مشرانو ته هم خبرداری ورکړی چې ایران ته د ملیشو د لېږلو په اړه له هر ډول پرېکړې مخکې ښه فکر وکړي، ځکه د بدلون او ازادۍ غوښتونکو ایرانیانو پر وړاندې درېدل هغه لوری نه دی چې دوی یې باید انتخاب کړي.

د امریکا ولسمشر ډونالډ ټرمپ یو ځل بیا د ایران حکومت ته خبرداری ورکړی چې د ولسي لاریونونو پر وړاندې د زور کارول به جدي پایلې ولري.

د سي‌ان‌ان د راپور له مخې، ټرمپ ویلي که د ایران امنیتي ځواکونه پر لاریون کوونکو ډزې وکړي، امریکا به هم غبرګون وښيي.

نوموړي دا څرګندونې د وینزویلا د نفتو په اړه د امریکايي نفت‌شرکتونو له چارواکو سره د کتنې پر مهال کړې دي.

ټرمپ ټینګار کړی چې دا خبرداری د ایران پر وړاندې د امریکايي سرتېرو د استولو معنا نه لري، خو زیاته کړې یې ده چې د ایران پر ضد به ډېر سخت اقدام وشي.

هغه همداراز ویلي، ایران دا مهال له سختو سیاسي او اقتصادي ستونزو سره مخ دی او وضعیت یې ورځ تر بلې خرابېږي.