هندي سندرغاړی اریجېټ سېنګ اعلان کړی چې له ۲۰۲۶ کال څخه به د فلمونو لپاره د پردې ترشا سندرې ویل پرېږدي.

هغه ویلي چې د فلمونو لپاره یې د سندرو لړۍ پای ته رسولې؛ خو د موسیقۍ هنر ته به دوام ورکوي او د نوو سندرو جوړول او خپرول به جاري وي.

سېنګ د خپلو مینه‌والو له ملاتړ څخه مننه کړې او ویلي یې دي چې د اورېدونکو مینه یې تل هڅوي.

دې پرېکړې د هغه د مینه‌والو لپاره حیرانتیا او لږ خپګان هم رامنځته کړی، ځکه ډېر کم هنرمندان د خپل شهرت په اوج کې داسې ګام اخلي.

نوموړي مخکې یوازې د فلمونو لپاره د پردې ترشا سندرې ویلې، او د ټلوېزیون پر پردو ډېر لږ څرګندیده.

د یادونې ده چې د خپل ځانګړي غږ او جادويي سندرو له امله، هغه په نړۍ کې زرګونه مینه‌وال لري او د هندي موسیقۍ په نړۍ کې یو له نوموتو ستورو څخه شمېرل کېږي.

د سعودي عربستان ولیعهد محمد بن سلمان ویلي چې سعودي به د ایران پر ضد د پوځي عملیاتو لپاره خپل هوايي حریم یا خاوره ونه کاروي.

هغه دا څرګندونې د ایران له ولسمشر مسعود پزشکیان سره په ټیلیفوني خبرو کې کړې.

محمد بن سلمان ټینګار کړی چې سعودي د ایران حاکمیت او ځمکنۍ بشپړتیا ته په بشپړ ډول درناوی کوي او هېڅ پوځي عملیات ته به د سعودي له هوايي حریم یا خاورې څخه د ایران پر ضد اجازه ونه لري.

هغه همدارنګه د شخړو د حل لپاره د ډیپلوماتیکو هڅو ملاتړ کړی او ویلي یې دي چې سوله‌ییزې هڅې د منځني ختیځ د امنیت او ثبات لپاره اړینې دي.

د امریکا ولسمشر ډونالډ ټرمپ د ایوا ایالت په یوه غونډه کې ویلي چې یو بله جنګي بیړۍ هم د ایران پر لور روانه ده.

هغه ویلي: «دا بېړۍ ډېره ښکلې روانه ده، وبه ګورو څه پېښیږي.»

ټرمپ زیاته کړې چې هیله لري د ایران حکومت له امریکا سره یوې هوکړې ته ورسېږي.

هغه ویلي: «که دوی په لومړي سر کې هوکړه کړې وای؛ نو اوس به یې یو بشپړ هېواد درلود.»

د طالبانو حکومت د ټولګټو چارو وزارت خبر ورکړی چې د مرغومي میاشتې په اوږدو کې د اوسپنې پټلۍ له لارې ټولټال ۶۹۹ زره او ۸۲۰ مټریک ټنه مالونه انتقال شوي دي.

یاد وزارت ویلي، چې دغه انتقالات د حیرتان، اقینې، تورغونډۍ او خواف-هرات بندرونو له لارې شوي دي.

د خبرپاڼې له مخې، په دې انتقالاتو کې واردات او صادرات دواړه شامل وو، چې نفتي، غیرنفتي او نور توکي یې رانغاړلي دي.

د صادراتو اندازه ۱۰۲۵ ټنه ده، چې لویه برخه یې وچه مېوه، کاني ډبرې او د انارو جوس جوړوي.

فاکس نیوز راپور ورکړی چې د امریکا د کورني امنیت وزارت درې ایراني وګړي، چې له مشکوکو یا پېژندل شویو ترهګریزو فعالیتونو سره تړلي بلل شوي، له امریکا ایستلي دي.

ویل کېږي دا کسان د ایران د سپاه پاسداران پخواني غړي وو.

د راپور له مخې، یاد درې کسان د ۱۴ ایرانيانو له ډلې وو چې د یکشنبې په ورځ ایران ته ولېږدول شول.

دا له هغه وخته چې په ایران کې حکومت ضد لاریونونه پیل شوي، تهران ته د ایستل شویو کډوالو لومړۍ ستنېدنه بلل کېږي.

د امریکا چارواکو ویلي، دا کسان په ۲۰۲۴ کال کې په ناقانونه توګه امریکا ته داخل شوي وو.

د امریکا مشهورې فلمي ستورې آنجلینا جولي په انسټاګرام کې د یوې اووه کلنې نجلۍ، چې د خپلې مور پر مړینه ژاړي، انځور خپور کړی او د ایران د وروستیو اعتراضونو قربانیانو سره یې خواخوږي ښودلې ده.

دا نجلۍ د پریسا لشکري لور ده؛ هغه ۳۰ کلنه معترضه چې د مرغومي په ۲۰مه د فارس ولایت په نورآباد ښار کې د اعتراضونو پر مهال وژل شوې وه.

جولي په خپل پیغام کې لیکلي: «هیڅ ماشوم باید د داسې غم بار پر اوږو وانخلي.»

هغې زیاته کړې چې هیله لري د دې ماشوم د مور یاد ژوندی وساتل شي او حقیقت د ملکي وګړو د ساتنې، د عاملانو د حساب ورکولو او د ازادۍ غوښتونکو لپاره د لا ډېرو ازادیو له لارې روښانه شي.

د امریکا ولسمشر ډونالډ ټرمپ خبرداری ورکړی چې که نوري المالکي یو ځل بیا د عراق د صدراعظم په توګه واک ته ورسېږي، نو دا هېواد به له جدي سیاسي او اقتصادي پایلو سره مخ شي.

ټرمپ ویلي، د المالکي د واکمنۍ پر مهال عراق فقر، ګډوډۍ او بې‌ثباتۍ ته ولوېد، او د هغه بیا واک ته رسېدل به یوه «لویه تېروتنه» وي.

د امریکا ولسمشر ټینګار کړی چې د المالکي د «ناسمو او افراطي پالیسیو» له امله، که نوموړی بیا واکمن شي، متحده ایالات به نور له عراق سره هېڅ ډول همکاري ونه کړي.

ټرمپ زیاته کړې چې د امریکا له ملاتړ پرته، عراق د بریا، سوکالۍ او ازادۍ هېڅ چانس نه لري، او ټینګار یې کړی چې دا وضعیت باید بیا تکرار نه شي.

د طالبانو حکومت د بهرنیو چارو وزیر مولوي امیرخان متقي د ترکمنستان د صدراعظم مرستیال او د بهرنیو چارو وزیر رشید مردوف سره په ویډیویي تماس کې د دواړو هېوادونو پر اړیکو، سیمه‌ییزو همکاریو او د راتلونکي کال پر ګډو پلانونو خبرې کړي.

د طالبانو حکومت د بهرنیو چارو وزارت د خبرپاڼې له مخې، متقي د اړیکو پرمختګ مثبت وباله او ویې ویل چې د ټاپي پروژې عملي کار د هرات په مسیر کې پیل شوی او د اوسپنې پټلۍ او TAP پروژې د تطبیق په درشل کې دي.

خبرپاڼه زیاتوي، رشید مردوف هم د تاریخي اړیکو یادونه کړې او د ګډو اقتصادي پروژو، د چارواکو د متقابلو سفرونو او راتلونکو پروګرامونو پر همغږۍ یې ټینګار کړی.

د امریکا جمهوري‌پال سناتور لیندزي ګراهام د ډونالد ټرمپ د وینا یوه ویډیو بېرته خپره کړې او ترې یې غوښتي چې د ایران د خلکو ملاتړ ته دوام ورکړي.

په یادې ویډیو کې ټرمپ د امریکا د سمندري ځواکونو د ایران پر لور د خوځېدو یادونه کړې وه.

ګراهام په ټولنیزه شبکه ایکس کې لیکلي: «د ایران خلک کولای شي زموږ دوستان وي؛ خو آیت‌الله‌ګان هېڅکله زموږ دوست نه شي کېدای.»

په همدې حال کې، ډونالد ټرمپ په خپلو خبرو کې هیله څرګنده کړې وه چې د ایران حکومت له امریکا سره یوې هوکړې ته ورسېږي.

د اوکراین په شمال ختیځ کې د خارکیف په سیمه کې د روسیې د بې‌پیلوټه الوتکې په برید کې لږ تر لږه درې کسان وژل شوي او دوه نور ټپیان شوي دي.

د رویټرز خبري اژانس د راپور له مخې، دا برید پر هغه مسافر وړونکي اورګاډي شوی چې ۱۵۵ مسافر پکې سپاره وو.

ویل کېږي اورګاډی یو کلي ته نږدې په نښه شوی دی.

چارواکو ویلي، د برید له امله اورګاډي ته هم زیان اوښتی او ټپیان د درملنې لپاره روغتون ته لېږدول شوي دي.

تر اوسه د برید په اړه نور جزییات نه دي خپاره شوي.