د عراق د امنیتي چارو د اطلاعاتو رئیس، سعد معن، اعلان کړی چې تر دې مهاله ۲۲۵۰ تنه د داعش غړي له سوریې څخه عراق ته انتقال شوي دي.

دغه پروسه د نړیوالې ټولنې په همکارۍ او د ځمکې او هوا له لارې ترسره شوې ده.

معن ویلي، چې بغداد دا مسؤلیت د نړیوالې ټولنې په استازیتوب پر غاړه اخیستی او زندانیان په لوړو امنیتي مرکزونو کې ساتل کېږي.

هغه همدارنګه وویل چې د داعش غړو سره د لومړنیو تحقیقاتو لپاره ځانګړې کمیټه جوړه شوې، څو د معلوماتو په ترلاسه کولو سره د سیمې امنیت او ثبات تقویه شي.

د راپورونو له مخې، امریکایي ځواکونه په مستقیم ډول د انتقال په بهیر کې مرسته کوي.

ډیری انتقال شوي مجرمینو په ۲۰۱۴ کال کې په عراق او سوریه کې د داعش په خونړیو بریدونو کې لاس درلود، چې د ګڼو خلکو وژنې، بې‌کوره کېدو او د ښځو جنسي قاچاق لامل شول.

اسرائيلي رسنۍ «کانال ۱۴» راپور ورکړی چې اسرائیل د امریکا او ایران ترمنځ د هر ډول احتمالي تړون لپاره یو لړ سخت شرطونه مطرح کړي دي.

د راپور له مخې، اسرائیل غواړي د ایران اټومي پروګرام په بشپړه توګه لغوه شي او ټول غني شوي یورانیم له ایرانه وایستل شي.

سرچینه زیاتوي چې تل‌ابیب همداراز د ایران د توغندیو د واټن محدودول تر ۳۰۰ کیلومترو پورې، د سیمې د نیابتي ځواکونو له منځه وړل، او پر هر ډول احتمالي تړون د «نږدې، جدي او عملي څار» غوښتنه کړې ده.

اسرائيلي رسنۍ ټینګار کوي چې دا غوښتنې د اسرائیل له نظره د سیمې د امنیت لپاره اساسي شرطونه بلل کېږي.

د امریکا د ولسمشر ځانګړي استازي سټیو ویتکاف ویلي، چې نوموړي له ادمیرال براډ کوپر او جرد کوشنر سره یو ځای د یو‌اېس‌اېس ابراهام لنکن الوتکو لېږدوونکې بېړۍ څخه لیدنه کړې او د امریکا د سمندري ځواکونو د عملیاتو له نږدې ننداره یې کړې ده.

ویتکاف په ایکس پاڼه ویلي، د دې لیدنې پر مهال یې له هغو پیلوټانو سره هم خبرې کړي چې یوه ایراني بې‌پیلوټه الوتکه یې ویشتلې وه، کومه چې د بېړۍ پر لور بې له روښانه هدف څخه نږدې شوې وه

نوموړي ټینګار کړی، چې د امریکا سمندري ځواکونه د هېواد د ګټو د دفاع، د سیالانو د مهار او د ولسمشر ټرمپ د «ځواک له لارې سولې» د ستراتیژۍ د عملي کولو لپاره هره ورځ په بشپړ چمتووالي کې دي.

له ابراهام لینکلن جنګي بېړۍ څخه دا لیدنه داسې مهال شوې، چې یوازې یوه ورځ وړاندې د عمان په کوربه‌توب د امریکا او ایران ترمنځ د مذاکراتو لومړی پړاو پای ته رسېدلی و.

افغان ایواک بنسټ وایي، چې د افغان ځانګړې کډوالۍ ویزو (SIV) بهیر په قانوني ډول لا هم موجود دی، خو د امریکا د نوو اجرايي پالیسیو له امله عملاً ټکنی شوی او زرګونه افغان همکاران یې له ناڅرګند برخلیک سره مخ کړي دي.

د بنسټ د معلوماتو له مخې، د امریکا د بهرنیو چارو وزارت د ۲۰۲۶ کال له پیل راهیسې د افغانانو لپاره د ویزو ډېری چارې درولې دي، چې پکې هغه قضیې هم شاملې دي چې له مخکې یې رسمي امنیتي او اداري تایید ترلاسه کړی و.

افغان ایواک ټینګار کوي، چې ستونزه تخنیکي نه ده، بلکې د سیاسي پرېکړو او د ویزو د محدودیتونو پایله ده.

په اعلامیه کې راغلي، چې زرګونه افغانان چې کلونه یې له امریکايي ځواکونو او ادارو سره کار کړی، اوس په افغانستان او ګاونډیو هېوادونو کې له امنیتي ګواښونو سره مخ دي، له خپلو کورنیو جلا شوي او د ژوند د ژغورنې لپاره د روښانه حل لارې په تمه دي.

د اکسیوس خبریال بارک راوید د دوو باخبره سرچینو له قوله راپور ورکړی چې د امریکا د ولسمشر استازي، جرد کوشنر او سټیو ویتکاف، د شنبې په ورځ د سنتکام له سمندري قومندان ادمیرال براډ کوپر سره یوځای، د امریکا د جنګي بېړۍ یو‌اېس‌اېس آبراهام لینکلن څخه لیدنه کړې ده.

یاده بېړۍ دا مهال د عربي سمندر په سیمه کې، د ایران له پولو نه په نسبتاً نږدې واټن کې ځای پر ځای شوې ده.

د راپور له مخې، تمه ده چې د آبراهام لینکلن جنګي بحري بېړۍ او د هغې جنګي ډله، که چېرې په راتلونکي کې د امریکا له لوري پر ایران کوم احتمالي پوځي برید ترسره شي، مخکښ رول ولوبوي.

دا لیدنه چې د ایران سره د خبرو له ترسره کېدو یوازې یوه ورځ وروسته شوې، تهران ته یو څرګند سیاسي او پوځي پیغام بلل کېږي؛ دا چې که مذاکرات ناکام شي، واشنګټن د فشار او اقدام نور انتخابونه هم په لاس کې لري.

د طالبانو حکومت د کورنیو چارو وزارت د ترافیکو پولیسو ته د ښاري نظم او د ترافیکي خدمتونو د ښه والي په موخه یو شمېر نوي او عصري موټرونه وسپارل.

یاد وزارت ویلي، دغه موټرونه چې د ترافیکو پولیسو ځانګړی رنګ، نښې او عصري تجهیزات لري، به په ښارونو او مهمو لویو لارو کې د ترافیکي نظم په ټینګښت، د پېښو په مخنیوي او خلکو ته د چټکو خدمتونو په وړاندې کولو کې مهم رول ولوبوي.

د طالبانو حکومت د کورنیو چارو وزارت ویاند عبدالمتین قانع ویلي، چې د ترافیکو پولیسو تجهیز او پیاوړتیا د ښاري امنیت او عامه خدمتونو د ښه والي لپاره د وزارت له مهمو لومړیتوبونو څخه ده.

د پاکستان د اپوزیسیون مخکښ سیاستوال محمود خان اچکزی وايي، هېواد یې اوس د هغو تګلارو پایلې ویني چې په تېرو لسیزو کې یې خپله غوره کړې وې.

نوموړي ټینګار کړی چې «انسان هماغه څه رېبي چې کرلي یې وي».

اچکزي د پاکستان پر اوږدمهالو سیاسي او امنیتي پالیسو نیوکه کړې او ویلي یې دي چې د غلطو پرېکړو له امله هېواد څو لسیزې وړاندې د یوه داسې خطرناک جګړه‌ییز مسیر پر لور ولاړ، چې پایلې یې بې‌توپیره وې او ښه او بد یې سره جلا نه کړل.

د هغه په وینا، په هماغه موده کې پاکستان د نړۍ بېلابېلو افراطي عناصرو ته ځای ورکړ، هغوی یې سره راټول کړل او د تشدد او ترهګرۍ لپاره یې وروزل؛ هغه څه چې نن یې اغېزې د ټولنې پر هر قشر ښکاره دي.

نوموړي زیاته کړې چې تاوتریخوالی او افراطیت کله هم تر کنټرول لاندې نه پاتې کېږي او بالاخره هماغه نظام ته زیان رسوي چې ملاتړ یې کړی وي.

اچکزي د وضعیت د سمون لپاره د پالیسیو د بنسټیز بدلون، د قانون د حاکمیت او د سوله‌ییز سیاست پر اړتیا ټینګار کړی.

د ایران د بهرنیو چارو وزیر عباس عراقچي ويلي، د یورانیمو غني‌کول د ایران ُمسلم او نه انکارېدونکی حق دی او دا به دوام ولري، خو تهران چمتو دی چې د غني‌سازۍ کچه راکمه کړي.

نوموړي د الجزیرې تلویزیوني شبکې سره په مرکه کې ټینګار وکړ چې د ایران د توغندیز پروګرام په اړه نه اوس او نه هم په راتلونکي کې د کوم ډول مذاکراتو امکان شته.

عراقچي همدارنګه وویل، چې لوړ غني شوي یورانیم به له هېواده بهر ونه لېږدول شي او دا موضوع د ایران لپاره سره کرښه ده.

هغه زیاته کړه چې تر دې دمه د مذاکراتو د دویم پړاو لپاره کومه رسمي نېټه نه ده ټاکل شوې او خبرې لا هم د ابهام په حالت کې دي.

د طالبانو حکومت د عامې روغتیا وزارت ویلي، د درملو او روغتیایي محصولاتو د تنظیم رئیس، نعیم الله ایوبي، ترکیې ته په رسمي سفر تللی دی.

د وزارت په وینا، د سفر موخه د روغتیایي همکاریو پیاوړتیا ده او ایوبي به له ترکي چارواکو سره په مهمو موضوعاتو خبرې وکړي.

سره له دې چې ترکیې د طالبانو حکومت لا تر اوسه په رسميت نه دی پېژندلی؛ خو دواړه خواوې په بېلابېلو برخو کې پراخې همکارۍ لري.

د طالبانو حکومت اړوند المرصاد رسنۍ په یوه تازه څېړنیز راپور کې ویلي، چې پاکستان په جنوبي اسیا کې د داعش د بیا تنظیم او پراختیا لپاره په اصلي مرکز بدل شوی دی.

د راپور له مخې، پاکستان نه یوازې دا چې داعش ته د فعالیت زمینه برابره کړې، بلکې په بلوچستان او خیبر پښتونخوا کې یې د دې ډلې روزنیز مرکزونه هم فعال ساتلي، چې له همدې ځایونو څخه په افغانستان، ایران، روسیه او نورو هېوادونو کې ترهګریز بریدونه تنظیمېږي.

المرصاد وايي، د کندهار خونړی برید، د روسیې د کنسرت تالار حمله او د ایران په کرمان ښار کې چاودنه هغه بېلګې دي، چې ترسره کوونکي یې وروسته د پاکستان له خاورې سره تړل شوي دي.

په راپور کې راغلي، چې د خیبر پښتونخوا په باړه ولسوالۍ کې د نامعلومه وسله والو له لورې، د وروستیو عملیاتو پر مهال ۱۱ داعش غړي وژل شوي، چې ټول بهرني اتباع وو او دا پېښه ښيي چې داعش لا هم په پاکستان کې منظم حضور لري.

همدارنګه المرصاد زیاتوي، چې د بلوچستان په مستونګ کې د داعش لوړپوړی غړی عاصم بلوچ، د خیبر په سورغر سیمه کې عبدالمالک، او په پنجاب کې برهان په نوم یو بل مهم قومندان هم وژل شوي دي.

المرصاد زیاتوي، چې ترکیه‌يي داعش غړي «مهمت ګورین» هم د نیول کېدو پر مهال اعتراف کړی، چې په بلوچستان کې د داعش روزنیز مرکزونه شته، چیرې چې د بېلابېلو هېوادونو کسان د نړیوالو بریدونو لپاره روزل کېږي.

راپور ټینګار کوي، چې پاکستان د داعش د داخلي او بهرنیو غړو ترمنځ د نښلولو رول لوبوي او هڅه کوي دا ډله د ګاونډیو هېوادونو د بې‌ثباته کولو لپاره د فشار وسیله وګرځوي.