د طالبانو حکومت د مهاجرینو ستونزو ته د رسېدنې عالي کمېسیون دارالانشاء ویلي، د تېرې جمعې په ورځ د هېواد له بېلابېلو سرحدي لارو څخه افغان مهاجرین په اجباري توګه هېواد ته راستانه شوي دي.

د راپور له مخې، په ننګرهار کې د تورخم له لارې (۶۲۱) کورنۍ چې (۳۳۱۲) غړي لري هېواد ته راستانه شوي.

همدارنګه په کندهار کې د سپین بولدک له لارې (۴۴) کورنۍ، په نیمروز کې د ورېښمو له لارې (۱۰) کورنۍ او (۴۷۶) مسافر، په هرات کې د اسلام کلا له لارې (۹) کورنۍ او په هلمند کې د بهرامچې له لارې (۸) کورنۍ هېواد ته راستنې شوې دي.

د کمېسیون د معلوماتو له مخې، ټولټال (۶۹۲) کورنۍ چې (۳۷۰۴) کسان جوړېږي ثبت او بایومیټریک شوي او له دې ډلې (۳۸۹) کورنۍ چې (۲۱۱۴) کسان دي بېلابېلو ولایتونو ته لېږدول شوي دي.

د بریټانیا دایسټ انګلیا “University of East Anglia” پوهنتون د نوې څېړنې له مخې، امکان لري چې تر ۲۰۵۰م کال پورې يا تر هغه هم مخکې، په يو شمېر هېوادونو کې د تودوخې منځنی حد تر ۲ درجې سانتي‌ګرادو لوړ شي، چې دا به د ځينو ښارونو لپاره د ژوند شرايط له جدي ستونزو سره مخ کړي او حتی امکان شته چې ژوند کول هم پکې ناممکن شي.

څېړنه ښيي، هغه هېوادونه چې تود او نيمه‌تود اقليم لري، لکه افغانستان، چين، هند، مصر، ترکيه، عراق، برازیل، مالي، الجزایر، مراکش، مکسیکو، تایلنډ او د امريکا متحده ايالات، به د اقليمي بدلون تر ټولو دروند اغېز وګالي.

په ځانګړي ډول د موسمي بارانونو سيمې به ژر او ډېرې تودې شي.

د څېړونکو په وينا، که نړيواله تودوخه يوازې تر ۲ درجې سانتي‌ګرادو محدوده هم پاتې شي، بيا به هم په ډېرو ښارونو کې د ښاري تودوخې کچه تر ۳ درجې سانتي‌ګرادو لوړه شي، چې دا به د انساني روغتيا، کاري ژوند او چاپېريال لپاره خطرناک حالت رامنځته کړي.

متخصصان ټينګار کوي، چې که جدي ګامونه وانخيستل شي، نو په راتلونکو لسيزو کې به د ګرمۍ له امله د ناروغيو او مړينې پېښې په بې‌ساري ډول زياتې شي.

د رویټرز د راپور له مخې، ټاکل شوې ده د سه‌شنبې په ورځ په جنیوا کې د ایران او اوکراین په اړه دوه جلا خو مهمې ډیپلوماټیکې خبرې ترسره شي.

رویټرز د خپلو باخبره سرچینو په حواله راپور ورکړی چې، د امریکا یو پلاوی به د سه‌شنبې په سهار له ایراني چارواکو سره وویني.

په دغه امریکایي پلاوي کې د ولسمشر ځانګړي استازي سټیو ویتکاف او جرډ کوشنر شامل دي.

د راپور له مخې، د اومان استازي به د دواړو لورو ترمنځ د منځګړیتوب رول ولوبوي او همدارنګه ویتکاف او کوشنر به د ورځې په دویمه برخه کې له روسیې او اوکراین سره په درې اړخیزو خبرو کې ګډون وکړي، څو د جګړې د پای لپاره لارې ولټوي.

بلخوا د امریکا ولسمشر ډونالډ ټرمپ د ایران پر حکومت فشار زیات کړی او د وروستیو اعتراضونو پر وړاندې د سخت چلند له امله یې په سیمه کې د امریکا سمندري ځواک هم پیاوړی کړی دی.

د اسراییلو خبریال باراک راوید راپور ورکړی چې سټیو ویتکاف د اوونۍ په پیل کې د عمان د بهرنیو چارو وزیر سره د ایران د اتومي مذاکراتو په اړه ځانګړي پیغامونه شریک کړي.

د راپور له مخې، د عمان وزیر د خبرو وروسته سند ترتیب کړی او هغه علی لاریجاني ته سپارلی، چې د سه شنبې په ورځ یې مسقط ته سفر کړی و.

راپور زیاتوي چې د عمان لاره لا هم د تهران او واشنګټن ترمنځ د پیغامونو په تبادله کې مهم رول لري.

رویترز راپور ورکړی چې د امریکا او ایران ترمنځ نوې غونډه د سه شنبې په ورځ په ژنو کې ترسره کېږي، چې د امریکا پلاوی به پکې د ویتکاف او جرد کوشنر په ګډون د ایران له استازو سره وګوري، او عماني استازي به د منځګړیتوب رول ولري.

د رویټرز د راپور له مخې، دوو امریکايي چارواکو ویلي چې د امریکا پوځ د ایران پر ضد د څو اوونیو دوامدارو عملیاتو د احتمال لپاره چمتووالی نیسي، که چېرې ولسمشر ډونالډ ټرمپ د برید امر صادر کړي.

سرچینې چې د موضوع د حساسیت له امله یې د نوم نه ښودلو غوښتنه کړې، ویلي چې دا احتمالي پوځي اقدام ښايي د دواړو هېوادونو تر منځ د پخوانیو شخړو پرتله ډېر جدي او پراخ وي.

رویترز لیکلي، د دې معلوماتو افشا کېدل په داسې حال کې دي چې د امریکا او ایران تر منځ روانې خبرې اترې له لوړې کچې حساسیت سره مخ دي، او دا پرمختګونه کولی شي د سیاسي او پوځي ترینګلتیا کچه نوره هم لوړه کړي.

تر اوسه د امریکا دفاع وزارت او سپینې ماڼۍ په رسمي ډول په دې اړه څه نه دي ویلي، خو راپور ښيي چې پوځي پلان جوړونه د احتمالي سناریوګانو پر بنسټ روانه ده.

بي‌بي‌سي راپور ورکړی چې د بریټانیا یوې محکمې دوه کسان د ترهګرۍ د پلان په تور په اوږدمهاله بند محکوم کړي دي.

دغو کسانو غوښتل په ۲۰۲۴ کال کې په مانچسټر کې پر یهودي ټولنې برید ترسره کړي.

د راپور له مخې، ۳۸ کلن ولید سعداوي او ۵۲ کلن عمار حسین هڅه کړې وه وسلې بریټانیا ته قاچاق کړي.

محکمې ویلي چې سعداوي ته ۳۷ کاله او حسین ته د ۲۶ کاله بند سزا اورول شوې ده.

د امریکا ولسمشر ډونالد ټرمپ ویلي چې د ایران د واکمن نظام کړنې دومره زیانمنې دي چې د بدلون اړتیا ترې ښکاري.

هغه ویلي، ایراني چارواکي له کلونو راهیسې یوازې خبرې کوي، خو په عمل کې بدلون نه لیدل کېږي.

د ټرمپ دغه څرګندونې د امریکا د بهرنیو چارو وزارت د فارسي څانګې له خوا په اېکس کې خپرې شوې دي.

نوموړي ټینګار کړی چې د ایران اوسنی حکومت د بشري حقونو سرغړونې کوي او نړیواله ټولنه باید د وضعیت د سمون لپاره جدي او عملي ګامونه واخلي.

د اوکراین ولسمشر ولادیمیر زلنسکي د ایران تبعید شوي “ولیعهد” رضا پهلوي سره په مونیخ کې کتلي او د ایران د اخوندي رژیم پر وړاندې د خلکو د مبارزې ملاتړ یې اعلان کړی.

زلنسکي ویلي، چې د ایران خلک حق لري چې ملاتړ یې وشي او نړیواله ټولنه باید په دې برخه کې ځانګړې توجه وکړي.

هغه د ایران انقلابي رژیم یو دیکتاتور رژیم بللی او کلکه غندنه یې کړې.

نوموړي ویلي، چې د ایران او روسیې ګډو پوځي هڅو، په ځانګړي ډول د “شهید” ډرونونو تولید او انتقال، نه یوازې د اوکراین، بلکې د ټولې سیمې لپاره جدي ګواښ جوړ کړی.

ولسمشر زلنسکي رضا پهلوي د اوکراین د خاورې پر بشپړ ملاتړ وستایه او ویې ویل چې د انسان ژوند له هر څه مهم دی.

هغه همدارنګه وویل چې اوکراین د ایران د اعتراض کوونکو قربانیانو د ملاتړ لپاره هر اړخیزې مرستې ته تیار دی.

ایران کې د ۱۸ کلن ځوان او د غیږنیونې اتل صالح محمدي د اعدام پرېکړه د بشري حقونو له سختو غبرګونونو سره مخ شوې ده.

د بشري حقونو د خوندیتوب سازمان ویلي، د ایران چارواکي باید سملاسي د هغه د عام محضر اعدام ټول پلانونه ودروي او په ځانګړي ډول د لاریونوالو پر وړاندې د مرګ سزا کارول پای ته ورسوي.

دغه سازمان ټینګار کړی چې د ایراني رژیم لخوا د مرګ سزا د سیاسي مخالفت د ځپلو لپاره کارول کېږي.

صالح محمدي د ۲۰۲۶ کال د جنورۍ د لاریونونو په تړاو نیول شوی او د قم جنایي محکمې د فبرورۍ په ۴مه د یو پولیس د وژنې په تور د«قصاص» پر بنسټ د مرګ حکم پرې صادر کړی دی.

د راپورونو له مخې، نوموړی له نیول کېدو وروسته د ایران د پولیسو د پلټنو په څانګه (آګاهي) کې تر فشار لاندې ساتل شوی او محکمې ته یې ویلي چې اعتراف یې د شکنجې له لارې ترې اخیستل شوی، خو تر اوسه د دغو ادعاوو د څېړلو هېڅ رسمي شواهد نه دي خپاره شوي.

د پاکستان سترې محکمې د زنداني پخواني لومړي وزیر عمران خان د روغتیايي وضعیت د خرابېدو په تړاو د هغه د بیړنۍ طبي معاینې او درملنې امر کړی دی.

دا پرېکړه وروسته له هغې شوې، چې د محکمې له‌خوا ټاکل شوي وکیل سلمان صفدر یو مفصل اووه مخیز راپور وړاندې کړ او پکې یې ویلي، چې عمران خان د زندان د ادارې د بې‌پروايۍ له امله د ښي سترګې نږدې ټول لید له لاسه ورکړی او دا مهال یوازې ۱۵ سلنه لید لري.

د راپور له مخې، عمران خان له تېرو درې میاشتو راهیسې د سترګو د خراب لید شکایت کاوه، خو د زندان چارواکو یې د درملنې نه کولو سره، سره هغه سره د بې پروایۍ چلند کړی.

د د دولتي روغتون متخصصو ډاکټرانو د هغه ناروغي د سترګو د “مرکزي رګ بندښت” په نوم تشخیص کړی، چې د وینې د ټوټې کېدو له امله رامنځته کېږي او د سترګې د ړوندوالي د جدي زیان سبب ګرځي.

د پاکستان د سترې محکمې د راپور تر ترلاسه کېدو وروسته د متخصصو ډاکټرانو یو طبي ټیم ټاکلی، څو د عمران خان بشپړه معاینه وکړي او حکم یې کړی، چې هغه دې له خپلو زامنو سره هم ټلیفوني اړیکه ونیسي.

بلخوا، د عمران خان تحریک انصاف ګوند، پاکستان د هغه پر وړاندې چلند تاوتریخجن بللی او ویلي یې دي که د خان روغتیا ته نور زیان واوړي، نو د اړوندو چارواکو پر ضد به قانوني اقدام وکړي.

عمران خان د ۲۰۲۳ له اګست راهیسې د راولپنډۍ په اډیاله زندان کې بندي دی او د راپور له مخې، نږدې دوه نیم کاله یې په یوازېتوب کې تېر کړي.