د خیبر پښتونخوا د بنو ولسوالۍ په میریان سیمه کې د پولیسو د تمځای اصلي دروازې ته نږدې زوروره چاودنه شوې ده.
د راپورونو له مخې، چاودېدونکي توکي په یوه موټرسایکل کې ځای پر ځای شوي وو.
د پولیسو یوه افسر رسنۍ ته ویلي چې د شګو بوجیو له امله د پولیسو ټول منسوبین خوندي پاتې شوي؛ خو د تمځای څخه بهر ملکي وګړو ته مرګ ژوبله اوښتې ده.
ځایي سرچینې وایي، په دې پېښه کې دوه کسان وژل شوي او شاوخوا ۱۵ نور ټپیان دي.
نور جزییات لا نه دي خپاره شوي.
د طالبانو حکومت ویاند، ذبیح الله مجاهد په اسلاماباد کې پر یوه شیعه جومات وروستی برید د پاکستان د «داعشپالنې» د تګلارې پایله بللې ده.
هغه له یوې ایراني رسنۍ سره په خبرو کې ویلي، که له داعش څخه استخباراتي ګټه واخیستل شي، دا کار به نه یوازې پاکستان ته زیان ورسوي، بلکې افغانستان به هم اغېزمن کړي.
مجاهد د تحریک طالبان پاکستان د ملاتړ ادعاوې رد کړې او ټینګار یې کړی چې د افغانستان په خاوره کې هېڅ غیرمسوول وسلهوالې ډلې ته د فعالیت اجازه نشته.
نوموړي د دواړو هېوادونو ترمنځ د لارو تړل کېدل د سوداګرو لپاره زیانمن بللي او له پاکستان یې غوښتي چې د سوداګریزو لارو د پرانیستې پاتې کېدو ضمانت ورکړي.
د روسیې ولسمشر ولادیمیر پوتین د پخواني شوروي ځواکونو له افغانستانه د وتلو د ۳۷مې کلیزې په مناسبت په خپل تازه پیغام کې ویلي، چې دا ورځ د روسیې د پوځي تاریخ له حساسو او اغېزناکو پړاوونو څخه شمېرل کېږي.
پوتین ټینګار کړی، چې د شوروي پوځ سرتېرو په افغانستان کې د جګړې پر مهال له سختو شرایطو سره مخ وو، خو د ده په خبره، هغوی زغم، انضباط او مسوولیت ښودلی او دا تجربه د روسیې لپاره د یو مهم تاریخي درس په توګه پاتې شوې ده.
بل لور ته، شنونکي وايي، د افغانستان جګړه د پخواني شوروي اتحاد لپاره د سیاسي، اقتصادي او پوځي لګښتونو له پلوه درنه تمامه شوه او د دغه هېواد د نړیوال نفوذ په کمېدو کې یې مهم رول درلود.
شاوخوا ۳۷ کاله وړاندې د شوروي پوځ وروستۍ قطعات د حیرتان بندر له لارې له افغانستانه ووتل او له دې سره لس کلنه جګړه پای ته ورسېده.
د جرمني سیاستوال او د حزب اتحادیه سوسیال مسیحی غړی آندریاس مینیخ اعلان کړی چې له رضا پهلوی سره یې لیدنه کړې او د ایران د راتلونکې په اړه یې خبرې کړې دي.
نوموړي په ټولنیزه شبکه ایکس کې په خپل پیغام کې لیکلي: «د ایران د راتلونکې په اړه له شهزاده رضا پهلوي سره خبرې وشوې.»
مینیخ زیاته کړې: «ازاد ایران د منځني ختیځ لپاره د لا ډېر ثبات او د اتریش او اروپا لپاره د لا زیات امنیت معنا لري. ازادي او بشري حقونه زموږ ګډې امنیتي اندېښنې دي.»
یو شمېر سرچینو رسنیو ته ویلي، د ژغورنې هغه ډله چې د ټانک ولسوالۍ د منظر پوستې ته د لګېدلي کوادکوپټر ډرون په برید کې د ټپیانو د انتقال لپاره روانه وه، تر برید لاندې راغلې.
د معلوماتو له مخې، لومړی چاودنه شوې او وروسته پرې ډزې شوې دي.
تر اوسه د دوو کسانو د وژل کېدو او د پنځو نورو د ټپي کېدو راپور ورکړل شوی؛ خو نور جزئیات لا نه دي خپاره شوي.
پاکستان د ICC د شل اوریز نړیوال جام په ګروپ A کې د هند پر وړاندې له ۶۱ منډو ماتې وروسته درېیم مقام ته ښکته شو او د سوپر اېټ پړاو ته د رسېدو چانس یې له خطر سره مخ شو.
دغه سیالي د کولمبو په آر پرېماداسا نړیوال لوبغالي کې ترسره شوه، چیرته چې مدافع اتل هند لومړی بېټنګ وکړ او په ۲۰ اورونو کې یې د اوو لوبغاړو په سوځېدو ۱۷۵ منډې جوړې کړې.
د هند لپاره ایشان کیشان ۷۷ منډې وکړې، سوریاکمار یاداو ۳۲، تیلاک ورما ۲۵ او شیوام دوبې ۲۷ منډې جوړې کړې.
د پاکستان له لوري سائم ایوب درې ویکټې واخیستې، خو شاهین شاه اپریدي، عثمان طارق او سلمان علي اغا یوه ـ یوه ویکټه ترلاسه کړه.
په ځواب کې د ۱۷۶ منډو هدف تعقیبولو پر مهال د پاکستان بېټنګ کرښه ونه ځلېده او ټوله لوبډله په ۱۸ اورونو کې په ۱۱۴ منډو وسوځېده، چې عثمان خان ۴۴ منډې وکړې، شاهین شاه اپریدي ۲۳ ناسوځېدلې منډې جوړې کړې.
د هند له لوري جسپریت بومرا، اکشر پټېل، هارډیک پانډیا او ورون چکرورتي دوه ـ دوه ویکټې واخیستې.
دغه بری د هند درېیم پرلهپسې بری و، چې له امله یې د ګروپ لومړی مقام خپل کړ او د سوپر اېټ پړاو ته یې د یوې لوبې مخکې لار ومونده.
هند به خپله وروستۍ لوبه د چهارشنبې په ورځ د نیدرلینډز پر وړاندې ترسره کوي.
له بلې خوا، د دې ماتې وروسته پاکستان د ګروپ درېیم مقام ته ولوېد او ځای یې USA ته پرېښود.
همدا رنګه، پاکستان به خپله وروستۍ او مهمه لوبه د چهارشنبې په ورځ د نامیبیا پر وړاندې کوي، چې ګټل یې د سوپر اېټ لپاره حتمي دي.
د پکتیا پخواني والي، محمد حلیم فدایي د لطیف ننګرهاري وروستیو څرګندونو ته په غبرګون کې ویلي چې نوموړی هنرمند دې خپلې بدلې بولې.
ښاغلي فدایي په خپله ایکسپاڼه لیکلي چې نوموړی هنرمند د هنر له لارې هم عاید ترلاسه کوي او هم خپلې کیسې او پیغامونه خلکو ته رسوي.
فدایي ویلي، د ننګرهاري سندرې هغه کسان اوري چې د جمهوریت پلویان وو؛ خو د ده په وینا نوموړی به د ملایانو ترمنځ نه د «وله مولوي صیب» او نه هم د «شکنځلو» له لارې محبوبیت ترلاسه کړي.
هغه زیاته کړې چې د ملایانو له نظره نوموړی «ډم» بلل کېږي، خو جمهوریتیان ورته د هنرمند په سترګه ګوري.
فدایي ویلي چې یوه ملا امام په خپل لیکنه کې ادعا کړې وه: «جمهوریتیانو ته نن یو ډم هم شکنځل کړی دی.»
ایراني رسنیو راپور ورکړی چې د ایران د بهرنیو چارو وزیر سید عباس عراقچي د يکشنبې په ماښام د يو ډيپلوماټيک پلاوي په مشرۍ د اټومي خبرو اترو د دويم پړاو او د ځينو ډيپلوماټيکو سلا مشورو لپاره د سویس مرکز ژنو ته ولاړ.
عراقچي تر دې وړاندې ويلي وو:«زموږ توغندي د خبرو اترو وړ نه دي.»
د ايران رسنيو ويلي چې له امريکا سره غير مستقيمې اټومي خبرې به د سې شنبې په ورځ د عمان په منځګړيتوب ترسره شي.
همداراز د ایران د بهرنيو چارو وزارت مرستيال، مجید تخت روانچي ويلي:«د غنيسازۍ موضوع نور مطرح نه ده او د ایران د حکومت له نظره دا موضوع نور د مذاکراتو پر مېز نه ده.»
ټاکل شوې چې د قزاقستان په پلازمېنه استانه کې د افغانستان د مسئلو په تړاو د هېوادونو د ځانګړو استازو د تماس ډلې غونډه د دوشنبې په ورځ ترسره شي.
د قزاقستان د رسمي اعلامیې له مخې، په دې غونډه کې به د افغانستان اوسنی وضعیت او له کابل سره سیمهییزه همکاري د بحث مهم موضوعات وي.
له غونډې مخکې قزاقستان او ازبکستان ټینګار کړی چې افغانستان باید د مرکزي اسیا د سوداګرۍ او اقتصادي چوکاټونو برخه وګرځول شي.
دواړو هېوادونو دا اقدام د دوامدار سیمهییز ثبات او د ګاونډیو هېوادونو د اقتصادي ودې لپاره مهم بللی دی.
د طالبانو حکومت د کلیو د بیارغونې او پراختیا وزیر ملا عبداللطیف منصور د پخواني شوروي اتحاد د پوځونو د وتلو د ۳۷مې کلیزې په مناسبت ویلي، چې دا ورځ د افغانانو د اوږدې مبارزې او سترې قربانۍ ژوندی سمبول دی.
نوموړي ویلي، چې د شوروي اتحاد پر وړاندې بری د افغان ملت د میلیونونو شهیدانو، ټپیانو او مجاهدینو د سرښندنو پایله وه، چې په ترڅ کې یې د نړۍ یو ستر نظامي ځواک له ماتې سره مخ شو او خپله ماتې یې ومنله.
منصور زیاته کړې، افغانان باید له خپل تاریخي تجربې زده کړه وکړي او د خپلواکۍ د ساتنې لپاره یو موټی پاتې شي، څو هېڅ بهرنی ځواک بیا د افغانستان د اشغال هڅه ونه کړي.
هغه دا هم ویلي، چې د سیمې هېوادونه باید د افغان ملت دا قرباني هېره نه کړي، ځکه همدې ملت د کمونیزم د پراختیا مخه ونیوله او نړۍ یې له یوه ستر ګواښ وژغورله.
د یادونې وړ ده، چې په همدې ورځ ۳۷ کاله وړاندې د شوروي وروستي ځواکونه له افغانستان څخه ووتل او دا پېښه د شلمې پېړۍ له مهمو تاریخي بدلونونو څخه ګڼل کېږي.