دوشنبه, نوومبر 16, 2026
Homeافغانستانذاکر جلالي: له افغانستان پرته د سیمې د اقتصادي یوځای کېدو تصور...

ذاکر جلالي: له افغانستان پرته د سیمې د اقتصادي یوځای کېدو تصور له واقعیت لرې دی

د طالبانو حکومت د بهرنیو چارو وزارت دویم سیاسي رئیس ذاکر جلالي په اسلام اباد کې د اقتصادي همکاریو سازمان غونډه کې د طالبانو حکومت ته د بلنې نه ورکولو په غبرګون کې ویلي، له افغانستان پرته د سیمې د اقتصادي یوځای کېدو او نښلونې تصور له واقعیت لېرې دی.

نوموړي پر خپله اېکس‌پاڼه لیکلي، په نننۍ نړۍ کې سوداګري، ټرانزیټ او اقتصادي همکاري د هېوادونو ترمنځ د سیاسي اختلافاتو د کمولو او متقابل باور د پیاوړتیا لپاره مهمې وسیلې دي، خو په سیمه کې لا هم زاړه لیدلوري حاکم دي او اقتصادي اړیکې د سیاسي اختلافاتو له امله اغېزمنېږي.

جلالي زیاته کړې، افغانستان به د اقتصادي همکاریو سازمان (ECO) په هغې سرمشریزه کې ګډون وکړي چې د ډسمبر په میاشت کې په تهران کې جوړېږي.

افغانستان تېر کال هم د دغه سازمان په سرمشریزه کې چې په باکو کې جوړه شوې وه، ګډون کړی و.

د جلالي څرګندونې په داسې حال کې دي چې پاکستان د اقتصادي همکاریو سازمان د بهرنیو چارو وزیرانو د شورا ۳۰مه غونډه په اسلام‌اباد کې رابللې، خو د طالبانو حکومت استازو ته یې بلنه نه ده ورکړې.

د پاکستان د بهرنیو چارو وزارت ویاند سجاد حیدر خان ویلي، د طالبانو حکومت ته د بلنې نه ورکول د سازمان د کړنلارو او دود له مخې شوي دي. د نوموړي په وینا، د سازمان ځینې غړي هېوادونه د طالبانو استازي خپلو غونډو ته رابولي او ځینې نور یې نه رابولي.

که څه هم اسلام‌اباد د نه بللو لپاره د سازمان کړنلارې یادوي، خو په دې وروستیو کې د پاکستان او طالبانو حکومت اړیکې خړې شوي او ښایي له یو بل سره د امنیتي اندېښنو پر سر راپورته شوي کړکېچ د اقتصادي همکاریو سازمان غونډه کې د طالب استازو د ګډون مخه نیولې وي.

اړونده مطالب

LEAVE A REPLY

Please enter your comment!
Please enter your name here