د اسټرالیا، کاناډا، ایټالیا او بریتانیا د بهرنیو چارو وزیرانو له اسراییلو غوښتي چې غزې ته د بشري مرستو د سمدستي او بېخنډه لېږد اجازه ورکړي.
د اسټرالیا د بهرنیو چارو وزیرې پني وانګ ویلي، د ژمي په رارسېدو او د سختو بارانونو له امله په غزه کې بشري وضعیت لا خراب شوی او خلک سرپناه او بېړنیو مرستو ته جدي اړتیا لري.
د دغو څلورو هېوادونو په ګډه اعلامیه کې ویل شوي، شاوخوا ۱۵۰ زره خېمې او نور اړین مرستندویه توکي د غزې په پوله کې پاتې دي او سیمې ته د ننوتلو اجازه نه ورکول کېږي.
هغوی له اسراییلو غوښتي چې د مرستو د لېږد ځنډ پای ته ورسوي، د غزې لارې پرانیزي او اړین توکي دې خلکو ته ورسېږي.

