د بریتانیا د ویلز شهزاده ویلیم او مېرمن یې کېټ به د نومبر له ۱۶مې تر ۱۸مې هند ته سفر وکړي او په ممبۍ ښار کې به د بېلابېلو رسمي پروګرامونو ترڅنګ د «ارتشاټ» چاپېریالي جایزې په مراسمو کې ګډون وکړي.
د رویټرز د راپور له مخې، د سهشنبې په ورځ د نومبر په ۱۷مه د دغې جایزې په مراسمو کې به پنځو ګټونکو ته د خپلو چاپېریالي پروژو د پراختیا لپاره هر یوه ته یو میلیون پونډه ورکړل شي. په مراسمو کې به د هند د کرکټ پخوانی ستوری سچن ټنډولکر، د بالیووډ هنرمندان او د بریتانیا د موسیقۍ ډله «ټېک ډېټ» هم ګډون وکړي.
دا د شهزادګۍ کېټ تر سرطان درملنې وروسته له خپل مېړه سره تر ټولو مهم بهرنی سفر دی. نوموړې په ۲۰۲۴ کال کې وقایوي کیموتراپي کړې وه او اوس یې ناروغي په ارامېدو ده، خو وايي چې د رغېدو بهیر یې لا هم وخت ته اړتیا لري.
شهزاده ویلیم په ۲۰۲۰ کال کې د «ارتشاټ» جایزه جوړه کړې وه، څو د اقلیمي بدلون او نورو چاپېریالي ننګونو لپاره نوښتګرې حللارې وهڅوي.
