د امریکا منتخب سناتور عبدالسید ویلي، چې د امریکا د مالیه ورکوونکو پیسې باید د نورو هېوادونو د پوځي تجهیزاتو د پېرلو پر ځای د امریکا دننه د ښوونې او روغتیايي خدمتونو لپاره ولګول شي.
نوموړي له «PBS» ټلوېزیون سره په مرکه کې ویلي، چې دی نه غواړي د امریکا د مالیې پیسې د مصر، پاکستان او سعودي عربستان د ټانکونو د پېرلو لپاره ولګول شي او له بهرنیو هېوادونو سره د بېقید او شرطه پوځي مرستو ملاتړ نه کوي.
عبدالسید ټینګار کړی چې د امریکا پوځي مرستې باید د نړیوالو قوانینو د رعایت په شرط ورکړل شي او دا معیار باید پر ټولو هېوادونو په یو ډول تطبیق شي.
نوموړي پوښتنه کړې، چې ولې واشنګټن باید هغو هېوادونو ته پوځي ملاتړ ورکړي چې د نړیوالو قوانینو په سرغړونو تورنېږي.
