عراق او ترکیې د تېلو او ګازو په برخو کې د اوږدمهاله همکارۍ د یوې چوکاټي هوکړې لپاره خبرې پیل کړې دي.
د عراق د تېلو وزیر باسم محمد خضیر او د ترکیې د انرژۍ او طبیعي سرچینو وزیر آلپارسلان بایراکتار په انقره کې لیدلي او د تېلو او ګازو د زیربناوو د پراختیا، پتروشیمي صنعت او د انرژۍ د سوداګرۍ پر پراختیا یې خبرې کړې دي.
دا خبرې داسې مهال کېږي چې د عراق د تېلو صادرات له سختو خنډونو سره مخ شوي او د راپور له مخې، د ایران جګړې او د هرمز تنګي د تړل کېدو له امله د دغه هېواد د تېلو صادرات له ۸۰ سلنې ډېر کم شوي دي.
دواړه هېوادونه د تېلو د لېږد لپاره د بدیلو لارو پر پراختیا هم کار کوي.
عراق او ترکیې د اګست په میاشت کې د کرکوک ـ جیهان د تېلو نللیکې له لارې د خامو تېلو د لېږد د زیاتولو لپاره یوه کلنه هوکړه هم لاسلیک کړې وه.
دواړو هېوادونو ویلي چې د تېلو او ګازو ترڅنګ غواړي د برېښنا او اوبو په برخو کې هم خپله همکاري پراخه کړي.
