د طالبانو د حکومت ویاند ذبیح الله مجاهد وایي، د ۱۴۴۷ هجري سپوږمیز کال په ترڅ کې د دوی اطلاعاتو او کلتور وزارت د هېواد په بېلابېلو سیمو کې د تاریخي او فرهنګي میراثونو د ساتنې او د رسنیو د تنظیم په برخه کې یو لړ اقدامات ترسره کړي دي.
مجاهد ویلي، په دې موده کې ۳۲ تاریخي ابدې ترمیم او بیارغول شوي، ۴۴ لرغونې سیمې تثبیت او ثبت شوي، ۲۰۲ منقول لرغوني اثار ترمیم شوي او ۱۶۹۵ لرغوني اثار موزیمونو ته لېږدول شوي دي. د هغه په وینا، د ۱۳۴ تاریخي اثارو د قاچاق مخه هم نیول شوې ده.
نوموړي زیاته کړه چې د رسنیو او فرهنګي بنسټونو د فعالیتونو د پراختیا په موخه هم په همدې موده کې ۱۶ راډیوګانو، یوې وېبپاڼې، پنځو چاپي رسنیو، دوو خبري اژانسونو، ۹۰ یوټیوب چینلونو او ۲۷ فرهنګي بنسټونو ته د فعالیت جوازونه ورکړل شوي دي.
د طالبانو حکومت د دغو اقداماتو موخه د هېواد د تاریخي او فرهنګي میراثونو ساتنه او د رسنیو او فرهنګي فعالیتونو د تنظیم او پراختیا هڅې بولي.
د رسنیو د پراختیا او پرمختګ په اړه ذبیح الله مجاهد داسې مهال څرګندونې کړي چې په افغانستان کې د بیان آزادۍ او رسنیز فعالیتونه تر بل هر وخت له پراخو محدودیتونو سره مخ دي.
