د افغانستان پخواني ولسمشر حامد کرزي د افغانستان د پخواني پاچا محمد ظاهر شاه د وفات د نولسم تلین په مناسبت د هغه یاد درناوی کړی او د هغه روح ته یې د دعا غوښتنه کړې ده.
ښاغلي کرزي په خپله ايکسپاڼه محمد ظاهر شاه «د ملت بابا» بللی او ویلي یې دي چې هغه یو زغمناک، وطنپال او با تدبیره شخصیت و، چې د واکمنۍ پر مهال یې افغانستان د ثبات، امنیت او ملي یووالي پر لور روان و.
نوموړي زیاته کړې چې د محمد ظاهر شاه له مهمو تاریخي اقداماتو څخه یو هم د اساسي قانون پر بنسټ د مشروطیت نظام رامنځته کول وو، چې د ده په وینا د خلکو حقونه او ازادۍ یې خوندي کولې او دیموکراتیک بنسټونه یې پیاوړي کول.
کرزي ویلي، د پخواني پاچا د سولې لپاره دوامداره هڅې، هېواد ته بېرته ستنېدل او په خپل وطن کې په درناوي خاورو ته سپارل کېدل د هغه د وطنپالنې او له خلکو سره د مینې څرګندونه ده.
