د پاکستان د بهرنیو چارو وزارت ویلي چې د اسلاماباد د تفاهملیک د لاسلیک کېدو په تعقیب به د ۲۰۲۶ کال د جون په ۲۱مه نېټه د سويس د بورګناشتوک په سیمه کې د ایران او امریکا ترمنځ د تخنیکي کچې خبرې اترې ترسره شي.
د وزارت د معلوماتو له مخې، په دغو خبرو کې به د امریکا او ایران استازي ګډون وکړي، او پاکستان او قطر به د منځګړو په توګه خپل رول ولوبوي.
پاکستان ویلي چې د منځګړي په توګه به خپلو هڅو ته دوام ورکړي، څو د اسلاماباد د تفاهملیک له مخې ترلاسه شوي تفاهمات لا نور هم عملي او پرمخ یووړل شي.
دغه خبرې په داسې وخت کې ترسره کېږي چې د سیمې وضعیت د نړیوالو پام ځانته اړولی او د ایران او امریکا ترمنځ د اړیکو راتلونکی د دغو مذاکراتو له پایلو سره تړلی بلل کېږي.
