د طالبانو حکومت د کلیو د بیارغونې او پراختیا وزیر ملا عبداللطیف منصور د پخواني شوروي اتحاد د پوځونو د وتلو د ۳۷مې کلیزې په مناسبت ویلي، چې دا ورځ د افغانانو د اوږدې مبارزې او سترې قربانۍ ژوندی سمبول دی.
نوموړي ویلي، چې د شوروي اتحاد پر وړاندې بری د افغان ملت د میلیونونو شهیدانو، ټپیانو او مجاهدینو د سرښندنو پایله وه، چې په ترڅ کې یې د نړۍ یو ستر نظامي ځواک له ماتې سره مخ شو او خپله ماتې یې ومنله.
منصور زیاته کړې، افغانان باید له خپل تاریخي تجربې زده کړه وکړي او د خپلواکۍ د ساتنې لپاره یو موټی پاتې شي، څو هېڅ بهرنی ځواک بیا د افغانستان د اشغال هڅه ونه کړي.
هغه دا هم ویلي، چې د سیمې هېوادونه باید د افغان ملت دا قرباني هېره نه کړي، ځکه همدې ملت د کمونیزم د پراختیا مخه ونیوله او نړۍ یې له یوه ستر ګواښ وژغورله.
د یادونې وړ ده، چې په همدې ورځ ۳۷ کاله وړاندې د شوروي وروستي ځواکونه له افغانستان څخه ووتل او دا پېښه د شلمې پېړۍ له مهمو تاریخي بدلونونو څخه ګڼل کېږي.
