د خیبرپښتونخوا اعلیٰ وزیر سهیل افریدي د هند په اړه د پاکستان د پوځ د دریځ په تړاو پوښتنې راپورته کړې دي.
افریدي د پاکستان د پوځ د عامه اړیکو ادارې (ISPR) په خطاب کې ویلي، پوځ هند د پاکستان دښمن بولي، خو هغه کسان چې په وینا یې د پوځ په ملاتړ واک ته رسېدلي، هند د پاکستان لپاره ګواښ نه بولي بلکې درې صوبې ګواښ بولي.
هغه پوښتنه کړې چې په دې موضوع کې د پاکستان ولس باید د پوځ خبره ومني او که د حکومت د چارواکو دریځ.
افریدي پر هغو کسانو هم نیوکه کړې چې هند ګواښ نه ګڼي او ادعا یې کړې چې د هغوی ځینې سوداګریزې اړیکې او شخصي مناسبات له هند سره دي.
نوموړي ټینګار کړی چې باید خلکو ته روښانه شي چې په دې اړه د چا دریځ سم دی.
