د طالبانو حکومت د رییس الوزرا اقتصادي مرستیال ملا عبدالغني برادر د سرپل ولایت په بلخاب ولسوالۍ کې د ډبرو سکرو د کان د استخراج او د کانونو ترمنځ د نښلونکي سړک د پرانیستې په مراسمو کې ویلي، چې د هېواد د طبیعي زېرمو کارونه د ملي اقتصاد د پیاوړتیا، د عوایدو د زیاتوالي او د بنسټیزو پروژو د تمویل لپاره حیاتي اهمیت لري.
هغه ویلي، چې د ملي پراختیا شرکت د بلخاب د سکرو کانونو د اسانتیا لپاره له ۲۰۰ کیلومترو زیات سړکونه جغل کړي دي چې له مخې یې د کانونو ترمنځ تګ راتګ او د سکرو انتقال اسان شوی دی.
نوموړي زیاته کړې، چې د بلخاب د سیمې اوسېدونکي به وکولای شي د اړتیا وړ سکاره په مناسب نرخ ترلاسه کړي، او ورسره به په دې ولسوالۍ کې د روغتونونو جوړول، د سړکونو پراختیا او نورو ټولنیزو خدمتونو ته هم ځانګړې پاملرنه وشي.
