بلومبرګ راپور ورکړی چې د چین د مالي څار ادارې د دغه هېواد لویو بانکونو ته سپارښتنه کړې چې هغو پنځو تصفیېخونو ته دې د نوو پورونو ورکول په موقتي ډول وځنډوي چې د ایران له تېلو سره د اړیکو له امله د امریکا تر بندیزونو لاندې راغلي دي.
د راپور له مخې، د چین څارونکو ادارو بانکونو ته په شفاهي ډول ویلي چې د موجوده سوداګریزو اړیکو د ارزونې تر بشپړېدو پورې دې یادو شرکتونو ته نوي پورونه نه ورکوي.
په دغو تصفیېخونو کې هنګلي پتروشيمي هم شامله ده.
ویل کېږي چې دا اقدام وروسته له هغې شوی چې امریکا د ایران د نفتو د پلور او صادراتو اړوند پر یو شمېر شرکتونو او بنسټونو بندیزونه زیات کړي دي.
