چین د خپل ترانسپورتي زیربناوو په برخه کې یو بل ستر ریکارډ جوړ کړی او د چونګچینګ ختیځ (Chongqing East) رېلسټېشن یې په یوازې ۳۸ میاشتو کې بشپړ کړی دی.
دا تمځای، چې د نړۍ تر ټولو لوی رېلسټېشن بلل کېږي، شاوخوا ۱.۲۲ میلیون مربع متره مساحت لري.
چونګ چينګ کې جوړ شوی دغه عصري رېلسټېشن د مساحت له مخې د نیویارک د Grand Central Terminal په پرتله نږدې شپږ چنده او د جرمني د Leipzig Hauptbahnhof په پرتله شاوخوا ۱۵ چنده لوی ګڼل کېږي.
دغه ستر تمځای ۲۹ پلیټفارمونه، ۱۵ رېللارې او اته پوړیزه ودانۍ لري.
د بام لپاره یې ۱۶ زره او ۵۰۰ ټنه پولادي جوړښت کارول شوی او پلیټفارمونه یې داسې ډیزاین شوي چې د ګڼېګوڼې پر مهال په هر ساعت کې تر ۱۶ زره مسافرو ته خدمت وړاندې کړي.
د پروژې یوه ځانګړې ځانګړنه دا ده چې رېلسټېشن د یوه غرنۍ سیمې پر سر جوړ شوی دی.
انجینرانو د جوړولو لپاره لومړی د غره یوه لویه برخه هواره کړه، څو د دې ستر ترانسپورتي مرکز لپاره مناسب ځای برابر شي.
د جوړولو پر مهال نږدې ۲ میلیون مکعب متره کانکریټ، ۳۶۶ زره ټنه پولاد او د ۴۰ زرو په شاوخوا کې کارګر او پرمختللي روباټیک ماشینونه په ګډه کارول شوي، چې له امله یې پروژه په یوازې ۳۸ میاشتو کې بشپړه شوه.
دا رېلسټېشن د چین د چټکو اورګاډو د شبکې د پراختیا یوه مهمه برخه ګڼل کېږي او تمه ده چې د هېواد په جنوب لوېدیځ کې د مسافرو او سوداګریزو توکو د لېږد رالېږد به لا چټک او اسانه کړي.
