د امریکا ولسمشر ډونالډ ټرمپ او د ایران ولسمشر مسعود پزشکیان په برېښنايي ډول د تفاهم یو یادښت لاسلیک کړی، چې موخه یې د امریکا او اسراییلو له لوري د ایران پر ضد د جګړې پای ته رسول دي.
امریکايي چارواکي وایي چې په دې هوکړه کې د ایران له لوري د اټومي وسلو د نه جوړولو او نه ترلاسه کولو ژمنه، په ټولو جبهاتو کې د جګړې پای، او د هرمز تنګي د بیا پرانیستلو موافقه شامله ده.
بل لور ته، راپورونه ښيي چې اسراییلي ځواکونه لا هم په لبنان کې خپل پوځي عملیات روان ساتي، سره له دې چې لبنان د امریکا او ایران ترمنځ د یاد تفاهم لیک په چوکاټ کې یاد شوی دی.
په همدې حال کې، د حزبالله مشر نعیم قاسم دغه هوکړه لویه بریا بللې او ویلي یې دي چې د لبنان او اسراییلو ترمنځ راتلونکې خبرې اترې باید یوازې د متقابل امنیت پر موضوع متمرکزې وي.
