شاوخوا ۱۹ کاله وړاندې عکاس خوان مونفورت داسې یو انځور واخیست چې هغه مهال یې هېڅ فکر نه کاوه، یوه ورځ به د فوټبال د تاریخ له تر ټولو مشهورو عکسونو څخه شي.
په هغه عکسونو کې یو ځوان لیونل میسي لیدل کېږي چې یو کوچني ماشوم ته په یوه پلاستیکي تشت کې غسل ورکوي.
هغه ماشوم وروسته نړۍ ته د لامین یمال په نوم ور وپېژندل شو؛ هغه لوبغاړی چې نن د نړۍ د فوټبال له ځوانو او روښانه ستورو څخه شمېرل کېږي.
دا عکسونه په ۲۰۰۷ کال کې د یوې خیریه کلیزې لپاره اخیستل شوي وو، چې د سپورټ ورځپاڼې او یونیسف له خوا جوړه شوې وه.
د یامال مور د بارسلونا ښار ته نږدې د ماتارو سیمې له هغو کورنیو څخه وه چې د دې پروګرام لپاره په قرعهکشۍ کې انتخاب شوې وه.
عکاس خوان مونفورت وایي، هغه مهال یې هېڅ تصور نه کاوه چې دا انځورونه به کلونه وروسته دومره مشهور شي.
نوموړې ویلي: «ما هېڅکله فکر نه کاوه چې هر څه له مخکې ټاکل شوي وي، خو اوس راته شک پیدا شوی؛ دا کیسه له هر ډول منطقي توضیح څخه پورته ده.»
کلونه وروسته د فوټبال برخلیک داسې بدل شو چې هماغه ماشوم د بارسلونا د ځوانانو له اکاډمۍ څخه راپورته شو او د نړۍ د فوټبال له سترو نومونو سره یې سیالي پیل کړه.
په داسې حال کې چې میسي د بارسلونا له وتلو وروسته خپل نړیوال سفر ته دوام ورکړ، یامال د همدې کلب نوی ځلانده ستوری شو.
اوس د دغه تاریخي عکس کیسه د نړیوال جام تر پایلوبې رسېدلې ده؛ هغه ځای چې ۱۹ کلن لامین یمال به د ۳۹ کلن لیونل میسي پر وړاندې د نړیوال جام د اتلولۍ لپاره مخامخ شي.
د فوټبال مینهوال اوس دې تاریخي شېبې ته سترګې په لار دي؛ هغه ماشوم چې یو وخت د میسي په غېږ کې و، ایا کولای شي د خپل پخواني اتل پر وړاندې نړیوال جام وګټي، که تجربهکار میسي به د خپلې لوبډلې لپاره یو بل تاریخي ویاړ ترلاسه کړي؟
دا کیسه د فوټبال له هغو نادرو داستانونو څخه ده چې پکې د تېر وخت یوه ساده خاطره، کلونه وروسته، د نړۍ د تر ټولو لویې لوبې په مرکز بدلېږي.
