روسیې یو ځل بیا د افغانستان امنیتي وضعیت د سیمې لپاره اندېښمنوونکی بللی او ویلي یې دي، چې د دغه هېواد دوامداره بېثباتي د شانګهای سازمان غړو هېوادونو ته مستقیم امنیتي ګواښ پېښوي.
د روسیې د امنیت شورا منشي سرګي شویګو د قرغیزستان په کوربهتوب د شانګهای همکاریو سازمان د امنیت شورا د منشیانو په غونډه کې ویلي، چې د افغانستان وضعیت، د اوکراین جګړه او د ایران کړکېچ هغه مهمې مسئلې دي چې د سیمې پر ثبات اغېز لري.
هغه ټینګار کړی، چې د سیمې هېوادونه باید د ترهګرۍ، افراطیت او سرحدي ناامنۍ د مخنیوي لپاره خپلې امنیتي همکارۍ پراخې کړي.
د نوموړي په وینا، مسکو به په نږدې راتلونکې کې د ګډو امنیتي همکاریو لپاره یو شمېر عملي وړاندیزونه هم مطرح کړي.
شویګو زیاته کړې، چې د دغو امنیتي نوښتونو پلي کېدل به د شانګهای همکاریو سازمان نړیوال رول پیاوړی کړي او د غړو هېوادونو ترمنځ به همغږي نوره هم زیاته کړي.
روسیې او د شانګهای همکاریو سازمان غړو هېوادونو تر دې وړاندې هم په افغانستان کې د ناامنۍ او د وسلهوالو ډلو د فعالیتونو په اړه اندیښنه ښودلې.
