د جولای ۱۸مه د نړۍ په کچه د نېلسن منډېلا نړیوالې ورځې په توګه لمانځل کېږي؛ هغه ورځ چې د سویلي افریقا د پخواني ولسمشر او د توکمیز تبعیض (اپارتاید) پر ضد د مبارز د میراث درناوی پکې کېږي.
ملګري ملتونه وایي، دا ورځ د دې لپاره ځانګړې شوې چې د نېلسن منډېلا د ازادۍ، عدالت، سولې او برابرۍ لپاره د اوږدې مبارزې یاد تازه شي.
دغه سازمان له خلکو غواړي چې د منډېلا له فکر او کړنو الهام واخلي او د یوې عادلانه ټولنې د جوړولو لپاره عملي ګامونه پورته کړي.
نیلسن منډېلا په ۱۹۱۸ کال کې د سویلي افریقا په ختیځ کې وزېږېد.
هغه د شلمې پېړۍ له هغو مهمو سیاسي څېرو څخه و چې د تورپوستو خلکو د حقونو، د نژادي تبعیض د ختمېدو او د برابرۍ لپاره یې مبارزه وکړه.
منډېلا د اپارتاید نظام پر وړاندې د مبارزې له امله ونیول شو او نږدې ۲۷ کاله یې په زندان کې تېر کړل.
د هغه تر ټولو مشهور زنداني کلونه د روبن ټاپو په زندان کې وو، خو د اوږدې بند مودې هم د هغه اراده کمزورې نه کړه.
په ۱۹۹۰ کال کې له زندانه تر خوشې کېدو وروسته، منډېلا د سویلي افریقا د سیاسي بدلون په بهیر کې مهم رول ولوباوه.
په ۱۹۹۴ کال کې هغه د دغه هېواد د لومړي تورپوستي ولسمشر په توګه وټاکل شو او د انتقام پر ځای یې د ملي پخلاینې، سولې او ګډ ژوند پر تګلارې ټینګار وکړ.
د هغه د هڅو له امله په ۱۹۹۳ کال کې منډېلا او اف ډبلیو ډي کلرک ته د سولې نوبل جایزه ورکړل شوه، ځکه دواړو د اپارتاید نظام د پای ته رسېدو او د ډیموکراسۍ د رامنځته کېدو په بهیر کې رول درلود.
ولې د جولای ۱۸مه د منډېلا ورځې په نوم ده؟
ملګرو ملتونو په ۲۰۰۹ کال کې د جولای ۱۸مه، چې د منډېلا د زېږېدنې ورځ ده، د هغه د خدمتونو د درناوي لپاره نړیواله ورځ اعلان کړه.
د دې ورځې موخه دا ده چې خلک وهڅول شي لږ تر لږه ۶۷ دقیقې د ټولنې د خدمت لپاره ځانګړي کړي؛ ځکه منډېلا ۶۷ کاله د عامه خدمت او مبارزې لپاره وقف کړي وو.
د منډېلا میراث
نن منډېلا د نړۍ په کچه د زغم، بخښنې، عدالت او سولې د سمبول په توګه یادېږي.
د هغه پیغام دا و چې ریښتینی بدلون د نفرت له لارې نه، بلکې د عدالت، خبرو او ګډ کار له لارې رامنځته کېږي.
د هغه ژوند لا هم د هغو خلکو لپاره الهام دی چې د بشري حقونو، برابرۍ او ټولنیز عدالت لپاره مبارزه کوي.
د منډېلا نړیواله ورځ هر کال خلکو ته دا یادونه کوي چې د یوې عادلانه نړۍ جوړول د هر انسان ګډ مسؤلیت دی.
