د جرمني صدراعظم فریدریش مرتس ویلي چې ایران نور باید نه سیمه او نه هم ټوله نړۍ په یرغمل کې وساتي، او د دې هېواد نظامي اټومي پروګرام باید په بشپړ ډول او د تل لپاره بند شي.
د جرمني صدراعظم ټینګار کړی چې د ایران حکومت باید نور پر اسرائیل او په سیمه کې د خپلو متحدینو پر ضد بریدونه ونه کړي.
هغه ویلي: « ایران باید بېرته خبرو اترو ته ستون شي او له وخت ضایع کولو لاس واخلي.»
مرتس زیاته کړې چې نړیواله ټولنه باید د سیمې د ثبات لپاره واضح او جدي دریځ ولري او د کړکېچونو د زیاتېدو مخه ونیسي.
