د بېځایه شویو نړۍوال سازمان (IDMC) د افغانستان په ختیځو ولایتونو کې د پاکستان د وروستیو هوايي بریدونو له امله د ملکي وګړو د مرګژوبلې په اړه اندېښنه ښودلې او له اسلاماباد یې غوښتي چې هغه پوځي بریدونه ودروي چې د ولسي خلکو ژوند له خطر سره مخ کوي.
دغه سازمان په یوه اعلامیه کې ویلي، د افغانستان لپاره د ملګرو ملتونو د مرستندوی ماموریت (یوناما)، د افغانستان لپاره د ملګرو ملتونو د ځانګړي راپور ورکوونکي او د ناروې د کډوالو شورا له دریځ سره یوځای د دغو بریدونو غندنه کوي او د ملکي وګړو د خونديتوب غوښتنه لري.
اعلامیه زیاتوي چې پاکستان باید د نړیوال بشري قانون او د بشري حقونو له نړیوالو اصولو سره سم خپلو مکلفیتونو ته ژمن پاتې شي، د پوځي او ملکي هدفونو ترمنځ روښانه تفکیک وکړي او د تناسب، احتیاط او حسابورکونې اصول په خپلو عملیاتو کې مراعات کړي.
د بېځایه شویو نړۍوال سازمان همداراز د ملګرو ملتونو تر مشرۍ لاندې د یوې هر اړخیزې، خپلواکې او بېپرې څېړنې غوښتنه کړې ده.
د سازمان په وینا، که د نړیوالو قوانینو د سرغړونې یا ملکي تلفاتو ثبوت وموندل شي، نو زیانمنو کورنیو او اغېزمنو ټولنو ته باید مناسب او پر وخت تاوان ورکړل شي.
د اعلامیې په پای کې ټینګار شوی چې د افغانستان او پاکستان ترمنځ د شخړو دوامدار حل د خبرو اترو، ډیپلوماسۍ او سولهییزو لارو ممکن دی، نه د هغو پوځي اقداماتو له لارې چې د خلکو بېځایه کېدل، بشري کړاوونه او سیمهییزه بېثباتي زیاتوي.
