د امریکا ولسمشر ډونالډ ټرمپ ویلي چې له ایران سره د سولې او تفاهم یو مهم تړون ټاکل شوې د سبا د یکشنبې په ورځ لاسلیک شي او له لاسلیک وروسته به د هرمز تنګی سمدستي د ټولو نړیوالو بېړیو او سوداګریزو تګ راتګونو پر مخ پرانیستل شي.
ټرمپ په خپلو څرګندونو کې ویلي چې دغه توافق د څو میاشتو مذاکراتو او سیمهییزو منځګړیتوبونو پایله ده او موخه یې په سیمه کې د تاوتریخوالي کمول، د انرژۍ نړیوال بازارونه باثباته کول او د امریکا او ایران ترمنځ د رسمي خبرو اترو لپاره زمینه برابرول دي.
د راپورونو له مخې، په لومړي پړاو کې به د هرمز تنګي د پرانیستې او د اوربند د دوام په اړه تفاهم عملي شي، او وروسته به د ایران د اټومي پروګرام، بندیزونو او نورو لانجمنو موضوعاتو په اړه جلا مذاکرات ترسره شي.
هرمز تنګی د نړۍ له مهمو سمندري لارو څخه شمېرل کېږي او د نړۍ د نفتو د لېږد لویه برخه له همدې لارې ترسره کېږي.
ایراني چارواکو د تړون د دقیق وخت په اړه محتاط دریځ خپل کړی او ویلي یې دي چې لا هم ځینې تخنیکي او سیاسي جزئیات پاتې دي، نو د لاسلیک نېټه ښايي بدلون ومومي.
که دا تړون په ټاکلي وخت لاسلیک شي، نو تمه کېږي چې د منځني ختیځ د روان بحران په کمېدو، د سمندري سوداګرۍ په عادي کېدو او د نړیوالو تېلو په بازارونو کې د ثبات په راوستلو کې مهم رول ولوبوي.
