د افغانستان پخواني ولسمشر حامد کرزي د عاشورا د رارسېدو په مناسبت د امام حسین (رض) د شهادت ورځ نمانځلې او د کربلا د شهیدانو روح ته یې دعا کړې ده.
کرزي په خپل پیغام کې ویلي، امام حسین د ټولنیزو انحرافاتو پر ضد د اصلاح یو مهم او معنادار حرکت وکړ او د حق او عدالت د دفاع لپاره یې تر وروستۍ شېبې پورې مبارزه وکړه، چې د کربلا تاریخي حماسه یې پرېښوده.
هغه زیاته کړې چې د افغانستان خلک لکه د نړۍ نور مسلمانان د عاشورا درناوی کوي او د اهل بیت مینه د وحدت او ورورولۍ وسیله ګڼي.
کرزي ټینګار کړی چې دا مناسبت د اصلاح، روښانتیا او ملي یووالي د پیاوړتیا لپاره مهم فرصت دی او خلک باید ترې د هېواد د پرمختګ، یووالي او علم د ودې لپاره ګټه واخلي.
