د پاکستان د پیپلز ګوند مشر بلاول بوټو زرداري ویلي چې د پاکستان تر ادارې لاندې کشمیر کې د انټرنېټ او ټیلیفون بندېدو له امله د انتخاباتي مبارزې ترسره کول ستونزمن شوي دي.
بلاول بوټو زرداري له بيبيسي اردو سره په ځانګړې مرکه کې ویلي، له شاوخوا ۴۰ ورځو راهیسې په کشمیر کې د ټیلیفون او انټرنېټ ستونزه روانه ده، او په داسې حالت کې پر ډیجیټلي رسنیو انتخاباتي کمپاین څنګه کېدای شي.
هغه پوښتنه کړې چې که دا وضعیت دوام وکړي، نو د دغو ټاکنو اعتبار به څه ډول پاتې شي.
د پیپلز ګوند مشر ویلي، هغه مني چې په هغو سیمو کې چې امنیتي ستونزې موجودې وي، محدودیتونه لګېدلای شي، خو په ټول کشمیر کې د انټرنېټ بندول د ټولیزې سزا مفهوم ورکوي.
نوموړي زیاته کړې چې د ده ګوند به له انتخاباتي کمېسیون څخه وغواړي چې په هغو سیمو کې چې امنیتي وضعیت ښه دی، د انټرنېټ خدمتونه بېرته فعال شي.
بلاول بوټو زرداري د کشمیر د امنیتي وضعیت، راتلونکو اسمبلی ټاکنو او د سولې د ټینګښت لپاره د حقیقت موندنې کمېسیون د جوړېدو د وړاندیز په اړه هم خبرې کړې دي.
