د ایران د بهرنیو چارو وزارت ویاند اسماعیل بقايي وايي، تهران او کابل باید د سوداګریزو اړیکو د پراختیا لپاره خپلو هڅو ته دوام ورکړي او په ځانګړي ډول د سرحدي او ګمرکي خنډونو کمولو ته پام وکړي.
بقايي ویلي، د طالبانو د حکومت د ریاست الوزرا اقتصادي مرستیال ملا عبدالغني برادر او د ایران ولسمشر په یوه لیدنه کې د دواړو هېوادونو ترمنځ د اقتصادي او سوداګریزو همکاریو د اسانتیا په اړه خبرې کړې دي.
د هغه په وینا، له دې لیدنې وروسته د همکاریو لپاره یو شمېر عملي اقدامات هم پیل شوي او د دواړو هېوادونو د چارواکو ترمنځ تګ راتګ زیات شوی دی.
د ایران د بهرنیو چارو وزارت ویاند تمه ښودلې چې د دغو هڅو دوام به د ایران او افغانستان ترمنځ سوداګري زیاته او شته خنډونه کم کړي.
ایران په وروستیو کې له افغانستان سره د اقتصادي اړیکو د پراختیا، د ګمرکي بهیر د اسانتیا او د سرحدي بازارونو د پیاوړتیا په اړه هم خبرې کړې دي.
د دواړو هېوادونو ترمنځ د سوداګرۍ او ټرانزیټ د پراختیا لپاره د ایران مسیر افغانستان ته د بدیلو سوداګریزو لارو له مهمو انتخابونو بلل کېږي.
