د پښتون ژغورنې غورځنګ مشر منظور پښتین د ایران په سراوان سرحدي سیمه کې پر افغان کډوالو برید غندلی.
منظور پښتین پر خپله اېکس پاڼه لیکلي، چې ایران باید په افغانانو روان ظلمونه پای ته ورسوي.
ښاغلي پښتین ویلي، چې ټول باید د دې برید په اړه یوه خوله شي او غږ پورته کړي.
نوموړي زیاته کړې چې ایران په لبنان او فلسطین کې پر مسلمانانو د ظلمونو خلاف دی، دا ښه خبره ده؛ خو بل خواته یې بیا سلګونه مسلمان افغانان شهیدان کړي، چې دا ظلم دی.
د یادونې ده چې تېره ورځ ایراني ځواکونو د ایران په سراوان سرحدي سیمه کې په شاوخوا ۲۰۰ افغان مسافرو باندې برید کړی چې ډېری یې شهیدان شوي.
