د حزب الله ډلې مرستیال مشر نعیم قاسم ویلي، چې د روانې جګړې د حل یوازینۍ لار اوربند دی.
هغه ویلي، د دې خبرې هدف یې دا نه دی چې د اسرائیل پر وړاندې د دوی موقف کمزوری دی.
قاسم زیاتوي؛ که اسرائیل اوربند نه غواړي، نو دوی هم جګړې ته دوام ورکوي.
دا په داسې حال کې ده چې بنیامین نتنیاهو ویلي، پر حزب الله ډلې به رحم ونه کړي.
د سیاسي چارو شنونکی جاوېد کوهستانی د طالبانو له بند ازاد شو.
نوموړی شاوخوا شل ورځې د طالبانو په بند کې و.
د نوموړي کورنۍ د هغه د خوشې کېدو خبر ورکړی دی.
که څه هم د هغه د نیولو علت معلوم نه و، خو نیونې یې توند غبرګونونه راپارولي وو.
بل لور ته طالب چارواکو تر اوسه د هغه د خوشې کېدو په اړه څه نه دي ویلي.
اسلام اباد کې د شانګهای همکاریو د کنفرانس په اړه پښتون سیاستوال افراسیاب خټک لیکلي، چې د دغه کنفرانس په څنډه کې د پاکستان او هند د چارواکو د لیدنو او خبرو اترو امکان کم دی.
نوموړي ویلي، پاکستان د خبرو لپاره دا شرط لري چې د هند هغه پرېکړه بدله شي چې تر خپلې واکمنۍ لاندې کشمېر یې له مرکزي حکومت سره یوځای کړی او له بل لوري هند وايي، چې خبرې باید یوازې له پاکستان څخه هند ته د صادرېدونکي تروریزم د مخنیوي لپاره وي.
هغه د شانګهای کنفرانس لپاره د پاکستان په اسلام اباد کې د پوځ له لوري ځانګړي امنیتي تدابیرو ته په کتو ویلي، چې دا کړنه د پاکستان دننه د ژورې سیاسي ګډوډي ښکاروندي کوي.
د برېټانیا حکومت اعلان کړی، چې دوی یو شمېر هغو افغان پوځیانو ته په خپل کور کې پناه ورکړې چې پخوا یې غوښتنې رد شوې وې.
د یاد هېواد د دفاع وزیر لوک پولارډ ویلي، د دوی موندنې ښیي چې یو شمېر افغان ځواکونه له دوی سره اوږه په اوږه جنګېدلي؛ خو غوښتنې رد شوې دي.
د هغه په خبره، د یادو کسانو د قبلولو لړۍ پیل شوې ده.
اسرائیلو نن یو وار بیا د لبنان په یو شمېر سیمو بریدونه کړي دي.
د اسرائیلي رسنیو د راپورونو له مخې، اسراییلي ځواکونو پر بقاع درې بریدونه کړي او بعلبک ښار کې یې یو روغتون ویشتی دی.
سرچینو د بریدونو د تلفاتو په اړه څه نه دي ویلي.
دا په داسې حال کې ده، چې د اسرائیل صدراعظم په خپلوتازه څرګندونو کې ویلي، چې تر دې وروسته به پر حزب الله ډلې هیڅ رحم ونه کړي.
پاکستاني رسنۍ وایي، چې د پاکستان په بلوچستان ایالت کې کان کېندونکو د ۲۱ کان کېندونکو د وژل کېدو په غبرګون کاربندیز اعلان کړی.
پاکستانۍ رسنۍ جیونیوز په یو راپور کې ویلي، چې د یاد ایالت د ډبرو سکرو کان کېندونکو ویلي، تر هغو به کار ته ستانه نه شي تر څو چې د وژل شویو کان کېندونکو قاتلین نېول شوي نه وي.
دوی دا هم ویلي چې د دوی امنیت ته باید جدي پاملرنه وشي.
دا په داسې حال کې ده چې
تېره اونۍ د بلوچستان په دکۍ سیمه کې پر کان کېندونکو ناپېژاندو وسلهوالو برید کې د اوو افغانانو په ګدون ۲۱ تنه ووژل شول.
افغانستان کې د اروپايي ټولنې سفارت یو وار بیا د افغانستان په ثبات کې د نجونو د زدکړو رول مهم ګڼلی.
د یاد سفارت شارژدافیر له یو ښوونځي څخه د لیدنې پر مهال ویلي، چې دوی په افغانستان کې له زدکړو ملاتړ کوي.
نوموړي زیاته کړې چې اوس مهال په ټول هېواد کې د سلو ښوونځیو ملاتړ کوي.
تر دې وړاندې هم ګڼو هېوادونو د افغانستان ثبات لپاره د نجونو زدکړې مهمې بللې؛ خو تر درې کالو زیاته موده کېږي، چې د نجونو پر مخ ښوونځي تړل شوي دي.
د افغان سولې لپاره د امريکا پخواني ځانګړي استازي زلمي خلیلزاد خيبر پښتونخواه کې د پښتون ژغورنې غورځنګ د وروستۍ قومي جرګه ستایلې.
نوموړي پر خپل اېکس ليکلي، چې ښایي د دغې جرګې په اړه د پاکستان غبرګون منفي وي؛ اوس پرې قضاوت کول وختي دي.
نوموړي ليکلي، ياد غورځنګ له اوږدې مبارزې وروسته څو ښې ورځې تجربه کړې.
د یادونې ده چې دغه قامي جرګه ډېری افغان سیاسیونو هم ستایلې ده.
د خبریالانو د ملاتړ بنسټونو د طالبانو د حکومت له لوري په رسنیو د نویو بندیزونو په اړه اندېښنه څرګنده کړې ده.
د خبریالانو د ملاتړ بنسټونو د طالبانو د امربالمعروف وزارت له لوري په رسنیو کې د ساه لرونکو پر تصویر بندیز د بیان د ازادۍ څرګنده سرغړونه او معلوماتو ته د خلکو د لاس رسي د محدودولو لور ته یو بل ګام وباله.
یو شمېر ژورنالیستانو ویلي، چې د امربالمعروف وزارت غواړي چې خپل دا قانون په تدریج عملي کړي او دا د خبریالانو سره لوی ظلم دی.
دا په داسې حال کې ده چې تېره ورځ د طالبانو د امر بالمعروف وزارت له لوري د ساه لرونکو عکسونو باندې بندیز ولګول شو.
د اروپايي ټولنې د بهرنیو چارو وزیرانو پر ایران نوي بندیزونه وضع کړل.
د اروپايي ټولنې بندیزونو کې هغه شرکتونه او کسان په نښه کېږي چې د ایران د بالستیک توغندیو په پروګرام کې ښکېل دي.
تر دې وړاندې ویل کېدل چې اروپایي ټولنه په دې ناسته کې د ایران سره د ۱۴ تړلو کسانو او ادارو په شمول پر ایران ایر هوايي شرکت، د نویو بندیزونو په اړه پرېکړه کوي.
د یادونې ده چې اروپايي ټولنې درې ایراني هوايي شرکتونه، ایران ایر، ماهان ایر، او ساها هوايي شرکت، او له هغو سره دوه تړلي تدارکاتي شرکتونه په خپلو بندیزونو کې شامل کړي دي.