ساینس پوهان وایي، د ځمکې د مدار پر لور یوه سیاره را روانه ده، چې دوه میاشتې به د ځمکې له مدار سره وڅرخي او تر هغې وروسته به بیرته ځي.
کازموس ورځپاڼې لیکلي، دا سیاره ځمکې ته نږدې شوې؛ خو له ځمکې سره به ټکر ونه کړي..
دا سیاره د اګست په اوومه د تسلکوپ په واسطه په جنوبي افریقا کې کشف شوې.
یاده پي ټي۵ “۲۰۲۴” سیاره به په ۵۳ ورځو کې د ځمکې له مداره خپل حرکت بشپړ کړي.
د طالبانو حکومت لابیګر او د کابل امنیه قومندانۍ پخواني ویاند جنرال مبین پېښور کې د پاکستان ملی سرود ته د پېښور سرقونسل نه درېدو له کبله د پاکستانیانو غبرګون ته لیکلي، چې دوی په ديپلوماسي پوهېږي؛ خو دا د پنجاب ریاست له خوا د افغان ولس ځورونې ته خاموش احتجاج دی.
ښاغلي مبین دغه راز لیکلي چې په سیاسي لحاظ د کوه نور الماس کیسه له همدې پېښوره پیل شوه، بالاحصارونه د پېښور په زړه کې د جنګونو او ننګونو کارنامې بیانوي او که د ریاست جبر ته وکتل شي، نو د داسې ګاونډي مخ راپېژني چې د ګاونډیتوب یو اصل هم نه مني.
جنرال مبین دیني اړخ د دغه کار یو بل سبب ګڼلی دی.
وروسته تر هغې چې پېښور کې د طالبانو حکومت سر قونسل د پاکستان ملي سرود ته ونه درېد؛ نو دې کړنې د پاکستاني رسنیو او فعالانو غبرګونونه را پارولي.
دوی وایي، دا کار د پاکستان حیثیت او ملي سرود ته بې احترامي ده.
فعالانو د سرقونسل محبالله شاکر دا کړنه پاکستان ته توهین بللی دی.
د یادونې ده چې د طالبانو حکومت ملي سرود حرام ګڼي او افغانستان کې یې هم ورباندې بندیز لګولی.
د مقاومت په نوم جبهې د افغانستان امنیت په اړه د ملګرو ملتونو پر راپور نیوکه کړې.
دوی په یوه خپره کړې اعلامیه کې ویلي چې په دغه راپور کې د دوی ځینې کړنې له نظره غورځول شوي.
اعلامیه کې راغلي، یادې جبهې په تېرو دوه نیمو میاشتو کې تر سلو ډېر بریدونه کړي؛ خو راپور کې یوازې له ۵۳ پېښو یادونه شوې.
یادې ډلې دغه راز ویلي چې په تېرو دوه نیمو میاشتو کې یې ۱۰۷ بریدونه کړي چې ۱۴۹ طالب سرتېري یې وژلي او ۱۴۰ نور یې ټپیان کړي دي.
دوی دا راپور په افغانستان کې د موجودو واقیعتونو په اړه محافظه کارانه ګڼلی.
د لبنان بیروت کې د ایران سفیر مجتبی اماني او د حزب الله سلګونه غړي د یو سایبري برید په پایله کې ټپیان شوي دي.
د حزب الله غړي د یادې ډلې پیاوړي جنګیالي بلل کېږي، چې د اسرائیلو پر وړاندې ښه جنګي مخینه لري.
رویټرز د حزب الله ډلې د یو غړي له قوله ویلي، چې د دوی دا غلطي نه جبرانېدونکې ده.
د لبنان روغتیا وزارت همدا راز له ټولو روغتونونو هم غوښتي چې بیړنی وضیعت اعلان کړي او اماده اوسي.
د حماس د سیاسی دفتر پخوانی مشر خالد مشعل وايي، دوی له اسرائیل سره د اوربند لپاره هیڅ بېړه نه لري.
نوموړي ویلي، په هیڅ قیمت به د اوربند ترسره کېدو لپاره له خپلو غوښتنو په شاه نه شي.
مشعل زیاته کړې، سره له دې چې دغې جګړې فلسطین زیات ویجاړ کړی؛ خو دا هغه بیه ده، چې دوی یې د ازادۍ لپاره پرې کوي.
هغه ویلي، هغه فلسطینیان چې پر حماس نیوکه کوي؛ په اقلیتونو کې راځي.
د یادونې ده چې په روانه جګړه کې تر اوسه څه د پاسه ۴۱ زره فلسطینیان وژل شوي دي.
ټاکل شوې چې د افغانستان د فوټسال ملي لوبډله د نړیوال جام په سیالیو کې سبا له ارجنټاین سره مخ شي.
دا سیالۍ د کابل په وخت ۷:۳ پیلیږي.
تر دې وړاندې افغان لوبډلې په خپلې لومړۍ لوبه کې انګولا ته شپږ د څلورو پر وړاندې ماتې ورکړې وه.
بل لورته بیا ارجنټاین اوکراین ته اووه د یو پر وړاندې ماتې ورکړې.
تر دې وروسته به افغان لوبډله په خپل سي ګروپ کې له اوکراین سره سیالي وکړي.
د طالبانو حکومت مشر ملا هبتالله اخندزاده وايي، د دوی حکومت ورځ تر بلې د ښه کېدو پر لور روان دی.
هغه په کندهار کې د ۴۸۰ پولیسو فراغت غونډې ته ویلي، چې خلک دې نه ناهیلي کېږي.
نوموړي دغه راز له طالب سرتېرو غوښتي چې د ده پیروي ته لومړیتوب ورکړي.
د یادونې ده چې په دغو مراسمو کې د طالبانو حکومت د دفاع وزیر محمد یعقوب مجاهد او یو شمېر نورو چارواکو هم برخه لرله.
تېر جمهوري نظام کې د ولسمشر غني لومړی مرستیال امرالله صالح ویلي، دوستم زمونو یو قومي مشر، پیاوړی نظاني او مطرح سیاستمدار دی.
هغه ویلي، د افغانستان په تاریخ کې د دوستم رول معلوم دی.
نوموړي پر اوسني وضعیت نیوکه د هرچا حق بللې او ویلي یې دي چې د افغانستان پرمختګونو کې له دوستم څخه انکار د وخت ضایع کول دي.
دا په داسې حال کې ده چې تېره ورځ جنرال دوستم د شهید اونۍ په غونډه کې د صالح له لوري جګړې ته د هزاره ګانو هڅول غندلي وو.
د ایران سرحدي چارواکو ویلي، چې له افغانستان څخه یې قاچاق کېدوونکي ۱۲ کیلو او ۷۲۰ کیلوګرامه سره زره نیولي دي.
دا سره زره د خراسان رضوي ولایت په تایباد سیمه کې نیول شوي دي.
د یاد ولایت د سرحدي ځواکونو قومندان مجید شجاع ویلي، چې له چټک مزلي موټر څخه یې د سرو زرو ۳۴ خښتې ترلاسه کړې دي.
د یادونې ده چې څو ورځې وړاندې هم د ایران پولیسو په یاده سیمه کې له افغانستانه قاچاق شوي ۱۵۱ کیلو او ۴۵۰ ګرامه «شیشه» نشهيي توکي کشف او ترلاسه کړي وو.