د امریکا ولسمشریزو ټاکنو ته نوماند ډونالډ ټرمپ وایي، چې زما ژوند د ایران له خوا ګواښل شوی دی.

ډونالډ ټرمپ ویلي، چې ایران څو ځل زما د وژلو هڅه وکړه؛ خو بریالي نه شول.

ټرمپ زیاته کړې چې ایران به بیا هم زما د ترور او ویرولو هڅه وکړي.

د ویلو ده چې تر دې وړاندې د امریکا په پنسلوانیا کې پر ډونالډ ټرمپ برید شوی و، چې له امله یې نوموړی ټپي شوی هم و او ددغې برید تور په ایران ولګېد.

بل لورته څو ورځې تر مخه پر ټرمپ د ترور ناکامه هڅه شوې وه.

په دې وار کې د امریکا په فلوریډا ایالت کې د هغه ګولف کلب ته څېرمه ډزې شوې، چې نوموړي لوبه پکې کوله.

د افغانستان فوټسال ملي لوبډله نن د روان نړۍوال جام په سیالیو کې له پارګوای سره لوبه کوي.

دا سیالۍ د افغانستان پر وخت ماښام اوه بجې پیلیږي.

تر دې وړاندې افغان لوبډلې له ارجنټاین او اوکراین څخه ماتې خوړلې وې؛ خو انګولا ته یې ماتې ورکړې وه.

یادې سیالۍ د ازبکستان په کوربه توب روانې دي.

د یادونې ده، چې افغانستان په دغه نړۍوال جام کې د لومړي ځل لپاره لوبه کوي.

وروسته تر هغې، چې حماسه میډیا د شیخ عبدالسمیع غزنوي د زنداني کېدو خبر ورکړ؛ تازه یو شمېر طالب پلوو هم د هغه نیول کېدل منلي.

دوی ویلي، په دې اړه معلومات نه لري، چې نوموړی چېرته بندي دی؛ خو معلومات به په خپل وخت شریک کړي.

هغوی دغه راز د شیخ غزنوي لپاره د دعاګانو غوښتنه هم کړې ده.

حماسه میډیا ته رسېدلي معلومات ښيي، چې شیخ عبدالسمیع غزنوي د طالبانو پر حکومت د نیوکو له کبله نیول شوی دی.

د طالبانو تر کنترول لاندې د کابل ښاروالۍ د جمهوریت پرمهال د احمدشاه مسعود په نوم نومول شوې څلور لارې بیرته په عامې روغتیا څلورلارې بدله کړه.

د جمهوریت پرمهال د دې څلورلارې په منار کې د مقاومت څلور لارې او د پخواني قومندان احمدشاه مسعود نوم لیکل شوی وو.

د طالبانو تر کنترول لاندې د کابل ښاروالۍ اوس د منار په پورتنۍ برخه کې په پښتو او دري د عامې روغتیا څلور لارې لیکلي او په دوهمه برخه کې د قرانکریم دا آیات لیکلی چې:«وَقُلْ جَاءَ الْحَقُّ وَزَهَقَ الْبَاطِلُ ۚ إِنَّ الْبَاطِلَ كَانَ زَهُوقًا»

د طالبانو حکومت تر دې وړاندې د عبدالعلي مزاري څلور لارې هم بیرته په خپل پخواني نوم دشت برچي څلور لارې اړولی دی.

د امریکا ولسمشر جوبایډن له ملګرو ملتونو غوښتي، چې د اوکراین ملاتړ وکړي.

نوموړي ویلي، روسیه د اوکراین په نیولو کې پاتې راغلې او اوس یې د دغه هېواد ویجاړي ته مخه کړې.

بایډن دغه راز له حماس او اسرائیل هم غوښتي، ترڅو په هغې طرحې هوکړې ته ورسیږي، چې د دوی له لوري ورکړل شوې ده.

د امریکا ولسمشر په منځني ختیځ کې د لبنان جګړې ته په اشارې ویلي، چې جګړه د هیڅ لوري په ګټه نه ده.

د یادونې ده، چې بایډن تر دې وړاندې ویلي، چې خپل ملګری اسرائیل هیچاته نه پریدي.

لبنان کې په تېرو دوو ورځو کې د اسرائیل د بریدونو له کبله د وژل شویو کسانو شمېر ۵۶۴ تنو ته رسېدلی دی.

د یاد هېواد د روغتیا وزارت ویلي، چې په وژل شویو کسانو کې تر ډېره مېرمنې او ماشومان دي.

که څه هم اسرائیل وايي، چې د حزب الله پر نږدې ۱۶۰۰ مرکزونو یې بریدونه کړي؛ خو د جګړو له سیمې بیروت ته کډه شوي خلک وايي، چې اسرائیل پر عامو خلکو بریدونه کوي.

په ورته مهال ملګرو ملتونو هم په دې اړه اندېښنه ښودلې او زیاته کړې یې ده، چې ښايي لبنان پر یوې بلې غزې بدل شي.

د طالبانو حکومت مشر ملا هبت‌الله اخندزاده کندز کې د علماوو یوې غونډې ته ویلي، چې د خلکو اسلامي عملونه هېر شوي او اسلام سره نا اشنا شوي.

نوموړي پر امرباالمعروف وزارت یو وار بیا ټینګار کړی، چې د اسلامي نظام اساسات پر خلکو عملي کړي.

د هغه په خبره، دا وزارت باید خلکو ته نیک اخلاق ور وښيي، خلک له بدو عاداتو لرې کړي او له هغو ګناوو یې مخه ونیسي، چې د شریعت خلاف وي.

هغه ویلي، طالبان باید عشرونه راټول کړي.

د یادونې ده، چې د هغه دغه لنډ خبري کلیپ د طالبانو تر کنټرول لاندې ملي ټلویزون پر خپله ایکس پاڼه خپور کړی دی.

حزب الله ډلې د اسرائیل په بریدونو کې د خپل مهم قومندان ابراهیم محمد قبیسي وژل کېدل منلي دي.

د فارن پالیسي د راپور له مخې، نوموړی د لبنان مرکز بیروت په جنوب کې په یو کلي کې وژل شوی دی.

په همدې حال کې د اسرائیل لومړي وزیر بنیامین نتنیاهو ویلي، چې پر حزب الله ډلې د دوی بریدونه له تمې سره سم وو.

هغه ویلي، د لبنان خلکو ته وايي، چې جګړه یې له دوی سره نه؛ بلکې له حزب الله ډلې سره ده.

د یادونې ده، چې له تېرو څو ورځو راهیسې د حزب‌الله او اسرائیل ترمنځ نښتې تر بل هر وخت زیاتې شوې دي.

حزب الله ډلې اعلان کړی، چې په تازه بریدونو کې یې پر اسرائیلو څلوېښت توغندي ورتوغولي.

یادې ډلې ویلي، چې دا توغندي یې د اسرائیل په شمال کې د پوځ پر قرارګاوو ور توغولي دي.

دوی نن هم پنځوس توغندي پر بېلابېلو ځایونو ور توغولي وو.

ددغه توغندیو له کبله د اوښتو زیانونو په اړه تر اوسه معلومات نشته.

دا په داسې حال کې ده، چې اسرائیل هم پر حزب الله تر ټولو خونړۍ حملې پیل کړې دي او زرګونه کسانو ته پکې مرګ ژوبله رسېدلې ده.

د خبریالانو د خوندیتوب کمېټې د طالبانو له حکومت غوښتي، چې پر رسنیو بندیزونه پای ته ورسوي.

یاد سازمان تېره ورځ په یوه اعلامیه کې ویلي، طالبان غواړي، چې د افغانستان رسنۍ د خپلو تبلیغاتي د وسیلو په توګه وکاروي.

د سرچینې د معلوماتو له مخې، طالبانو کابل کې د زیاتو رسنیو مدیران احضار کړي او ځینې دستورونه یې ورکړي، چې باید ترسره یې کړي.

دا په داسې حال کې ده، چې تازه په افغانستان کې په ژوندۍ بڼه د سیاسي خپرونو پر نشر هم بندیز لګېدلی دی.